Babadi ba a Botsa

Ke ka Ntlha Yang fa Modimo a Letlelela Pogo?

Ga se Modimo yo o dirang gore batho ba boge. Baebele ya re: “A go nne kgakala le Modimo wa boammaaruri go dira ka boikepo!” (Jobe 34:10) Ka jalo, ke mang yo o bakang pogo?

Jesu o ne a re Satane ke “mmusi wa lefatshe.” (Johane 14:30) Ke boammaaruri gore Jehofa ke Molaodimogolo wa Lobopo Lotlhe. Ga a kitla a tlogela boemo joo. Le fa go ntse jalo, Modimo o letlile Satane ka nakwana gore a buse batho ba le bantsi.—1 Johane 5:19.

Satane o ile a nna mmusi yo o ntseng jang? Go tloga fela ka nako e a neng a dirisana le batho ka yone, Satane o ile a nna mmolai le moaki. O tlhasela batho ka ditsela tse di bofitlha. Jesu o ne a mo latofatsa jaana: “Ene yoo e ne e le mmolai fa a ne a simologa, mme o ne a se ka a itsetsepela mo boammaaruring, ka gonne boammaaruri ga bo yo mo go ene. Fa a bua maaka, o bua go ya ka tshekamelo ya gagwe, ka gonne ke moaki le ramaaka.” (Johane 8:44) Gape Jesu o ne a re batho ba ba neng ba batla go mmolaya e ne e le bana ba mmolai yono wa kwa tshimologong. Ba ne ba itira bana ba gagwe ka go dira se a se dirang. Ke boammaaruri gore bana ba etsa borraabone.

Satane o sa ntse a rotloetsa batho go nna le boikutlo jwa go batla go bolaya. Ka sekai, R. J. Rummel, porofesara yo o tlogetseng tiro kwa Yunibesithing ya Hawaii, U.S.A. o fopholetsa gore go tloga ka 1900 go ya go 1987, mebuso e e farologaneng e ne ya bolaya batho ba le 169 198 000 ka nako ya dintwa tsa go lwela puso, go gailwa ga merafe, le go bolawa ga batho ntle le lebaka lepe. Palo eno ya batho ba ba suleng ga e akaretse batho ba le dimilione di le masomesome ba ba bolailweng kwa ntweng ka dingwaga tseo.

Fa e le gore ga se Modimo a bakang pogo, ke ka ntlha yang fa a e letlelela? Ke ka gonne dikgang tse di amang lobopo lotlhe, tse di kaga se se molemo le se se bosula tse di ileng tsa tsosiwa kwa tshimologong di tshwanetse go arabiwa. A re sekasekeng e le nngwe fela ya tsone.

Kwa tshimologong ya hisitori ya batho, Adame le Efa ba ne ba tsaya letlhakore la ga Satane. Ba ne ba gana go busiwa ke Modimo mme ba tlhopha go ipusa, le fa gone seo se ne se bolela gore ba ne ba tla busiwa ke Diabolo.—Genesise 3:1-6; Tshenolo 12:9.

Jehofa o ne a bona go siame gore go fete nako gore go tle go nne le bosupi jo bo lekaneng jwa go rarabolola kgang eno. Re swetsa ka go reng? Puso ya batho e e tlhotlhelediwang ke Satane e tlisa pogo. Totatota, go letla ga Modimo nako e feta kgabagare go ile ga solegela batho molemo. Ka tsela efe? Batho ba ba sekasekang bosupi e bile ba bo dumela ba na le tshono ya go bontsha gore ba iketleeleditse go busiwa ke Modimo. Ba ba ithutang melao ya Modimo le go e dirisa mo matshelong a bone, ba na le tsholofelo ya go tshelela ruri.—Johane 17:3; 1 Johane 2:17.

Ke boammaaruri gore gone jaanong Satane o busa lefatshe ka bosetlhogo. Mme ga a kitla a le busa ka lobaka lo loleele. Go ise go ye kae, Jehofa o tla dirisa Morwawe “go senya ditiro tsa ga Diabolo.” (1 Johane 3:8) Jesu a kaelwa ke Modimo, o tla fodisa batho ba ba utlwisitsweng botlhoko ke pogo le go baakanya ditlamorago tse di botlhoko tse batho ba nnileng le tsone mo matshelong a bone. O tla tsosa batho ba le dibilione mo lefatsheng ba ba ileng ba boga le go swa go ralala makgolokgolo a dingwaga.—Johane 11:25.

Go tsosiwa ga ga Jesu mo baswing ke sekai se se bontshang gore Modimo o fentse ditiro tsa ga Diabolo—go supa se se tla tlelang batho ba ba tlhophang go busiwa ke Modimo. (Ditiro 17:31) Baebele e dira gore re akanye ka nako eo e e tlang ka mafoko ano a a gomotsang: “Modimo ka boene o tla nna le [batho]. Mme o tla phimola dikeledi tsotlhe mo matlhong a bone, mme loso lo tla bo lo seyo, le fa e le khutsafalo le fa e le selelo le fa e le botlhoko di tla bo di sa tlhole di le gone. Dilo tsa pele di fetile.”—Tshenolo 21:3, 4.