1. Basha ba le bantsi ba Bakeresete ba na le ditshono dife tse di itumedisang?

RE TSHELA mo dinakong tse di kgatlhang. Dimilionemilione tsa batho go tswa mo ditšhabeng tsotlhe di thologela mo kobamelong ya boammaaruri go feta le fa e le leng pele. (Tshen. 7:9, 10) Basha ba le bantsi ba itumelela maitemogelo a a kgatlhang a go thusa ba bangwe go tlhaloganya dithuto tsa boammaaruri tsa Baebele tse di bolokang matshelo. (Tshen. 22:17) Basha bangwe ba tshwara dithuto tsa Baebele, ba thusa batho go itumelela botshelo jo bo nang le bokao. Ba bangwe ba rera dikgang tse di molemo ka tlhagafalo kwa mafelong a go buiwang puo e sele gone. (Pes. 110:3; Isa. 52:7) O ka itumelela jang go nna le seabe mo tirong e e kgotsofatsang e batho ba ga Jehofa ba e dirang?

2. Sekao sa ga Timotheo se bontsha jang gore Jehofa o iketleeleditse go naya basha maikarabelo? (Bona setshwantsho se se kwa tshimologong ya setlhogo seno.)

² E re ka o le mosha, o ka dira ditshwetso tse moragonyana di ka go thusang gore o nne le ditshono tse di itumedisang mo tirelong ya Modimo. Ka sekai, go lebega Timotheo wa kwa Lisetera a ile a dira ditshwetso tse di botlhale tse di neng tsa dira gore a amogele kabelo ya go nna morongwa, gongwe fa a ne a wetsa dingwaga tsa bolesome kgotsa a le mo masimologong a dingwaga tsa bo20. (Dit. 16:1-3) Go lebega dikgwedi di le mmalwa fela morago ga gore moaposetoloi Paulo a tlhaselwe mme a patelesege go tlogela phuthego ya  kwa Thesalonika e e neng e sa tswa go tlhomiwa, a ile a naya Timotheo yo mosha maikarabelo a gore a ye kwa Thesalonika go ya go nonotsha bakaulengwe koo. (Dit. 17:5-15; 1 Bathes. 3:1, 2, 6) Akanya fela kafa Timotheo a neng a ikutlwa ka gone fa a ne a newa kabelo eo!

3. Ke tshwetso efe ya botlhokwa thata e o ka e dirang mo botshelong, mme o ka e dira leng?

³ Nako ya bosha ke nako ya go dira ditshwetso tse di botlhokwa. Le fa go ntse jalo, go na le tshwetso e e botlhokwa go di gaisa tsotlhe—tshwetso ya go direla Jehofa. Ke nako efe e e molemo ya go dira tshwetso eo? Jehofa a re: “Gakologelwa Mmopi wa gago yo Mogolo mo malatsing a bokau jwa gago.” (Mor. 12:1) Tsela e le esi fela ya go “gakologelwa” Jehofa ke go mo direla ka botlalo. (Dute. 10:12) Tshwetso ya gago ya go direla Modimo ka pelo ya gago yotlhe ke tshwetso ya botlhokwa thata e o ka e dirang. E tla ama isagwe yotlhe ya gago.—Pes. 71:5.

4. Kwantle ga go direla Jehofa, ke ditshwetso dife tse dingwe tse di botlhokwa mo botshelong tse di tla amang kafa o direlang Modimo ka gone?

⁴ Boammaaruri ke gore, tshwetso e o e dirang ya go direla Jehofa ga se yone fela e e amang isagwe ya gago. Ka sekai, o ka tswa o ipotsa gore a o tla nyala kgotsa o tla nyalwa, o tla nyalana le mang le gore o tla itshedisa ka eng. Tseno ke ditshwetso tse di botlhokwa, mme gone go molemo gore o simolole ka go dira tshwetso ya gore a o tla direla Jehofa ka botlalo ka mo o ka kgonang ka teng. (Dute. 30:19, 20) Ka ntlha yang? Ka gonne ditshwetso tseno di a amana. Tshwetso e o e dirang malebana le lenyalo le tiro e tla ama kafa o tla direlang Modimo ka gone. (Bapisa le Luke 14:16-20.) Ka fa letlhakoreng le lengwe, keletso ya gago ya go direla Modimo e tla ama ditshwetso tse o di dirang malebana le lenyalo le tiro. Ka jalo, simolola pele ka go dira ditshwetso tse di botlhokwa thata mo botshelong jwa gago.—Bafil. 1:10.

5, 6. Bontsha kafa go dira ditshwetso tse di siameng go ka felelang ka maitemogelo a a molemo ka gone. (Bona gape le setlhogo se se reng, “Tshwetso E ke E Dirileng Fa ke Le Ngwana” mo makasineng ono.

⁵ Fa o setse o dirile tshwetso ya go direla Modimo, o ka nna wa batlisisa gore ke eng se a batlang gore o se dire, o bo o dira tshwetso ya gore o tla mo direla jang. Mokaulengwe mongwe wa kwa Japane o ne a kwala jaana: “Fa ke ne ke na le dingwaga di le 14, ke ne ke tsamaya le mogolwane wa phuthego kwa tirong ya go rera mme o ne a lemoga gore ke ne ke sa itumelele bodiredi. O ne a bua le nna jaana ka bonolo: ‘Ya gae Yuichiro. O nne fa fatshe mme o akanye ka kelotlhoko ka se Jehofa a go diretseng sone.’ Ke ne ka dira jaaka a ne a bua. Tota e bile, ke ne ka fetsa malatsi a le mmalwa ke akanya e bile ke rapela. Ka bonya ka bonya, tsela e ke neng ke ikutlwa ka yone e ne ya fetoga. Go ise go ye kae ke ne ka itumelela go direla Jehofa. Ke ne ke itumelela go bala ka barongwa, mme ke ne ka simolola go akanya ka go direla Modimo ka botlalo.”

⁶ Yuichiro o tswelela ka go re: “Ke ne ka simolola go dira ditshwetso tse di neng di tla nthusa gore ke kgone go direla Jehofa kwa moseja. Ka sekai, ke ne ka ithuta Seesemane. Fa ke fetsa sekolo, ke ne ka dira tiro ya nakwana ya go ruta Seesemane, gore ke kgone go nna mmulatsela. Fa ke le dingwaga di le 20, ke ne ka simolola go ithuta Se-Mongolia mme ka nna le tshono ya go etela setlhopha sa baboledi ba ba buang Se-Mongolia. Dingwaga di le pedi morago ga foo ka 2007, ke ne ka etela Mongolia. Fa ke ne ke ya go rera le babulatsela bangwe, ke ne ka lemoga gore batho ba le bantsi ba batla boammaaruri, mme seno se ne sa dira gore ke batle go fudugela koo go ya go ba thusa. Ke ne ka boela Japane go ya go dira dithulaganyo. Ke ntse ke le mmulatsela mo Mongolia fa e sa le ka Moranang 2008. Botshelo bo thata fano. Le fa go ntse jalo, batho ba amogela dikgang tse di molemo, e bile ke kgona go ba thusa gore ba atamalane le Jehofa. Ke akanya gore ke tlhophile tsela e e molemolemo ya botshelo.”

7. Re tshwanetse go itirela ditshwetso dife, mme Moshe o re tlhometse sekao sefe?

 ⁷ Mongwe le mongwe o tshwanetse go itirela tshwetso ya kafa a tla dirisang botshelo jwa gagwe ka gone e le mongwe wa Basupi ba ga Jehofa. (Josh. 24:15) Re ka se go bolelele gore o nyale kgotsa nnyaa, o nyale mang le gore o batle tiro ya mofuta ofe. A o tla tlhopha tiro e e sa tlhokeng thapiso e e tsayang nako e telele? Bangwe ba lona basha ba Bakeresete lo nna mo metseng e e humanegileng; ba bangwe ba lona lo nna mo ditoropong tse di humileng. Lo farologane thata ka botho, bokgoni, maitemogelo, dilo tse lo di kgatlhegelang le tumelo ya lona. Go ka direga gore lo farologane thata fela jaaka basha ba Bahebera ba ne ba farologane le Moshe yo mmotlana kwa Egepeto ya bogologolo. O ne a na le tshono ya go atlega mo botshelong e re ka e ne e le morwa morwadia Faro, fa Bahebera ba bangwe bone e ne e le makgoba. (Ekes. 1:13, 14; Dit. 7:21, 22) Fela jaaka wena le bone ba ne ba tshela mo dinakong tse di kgatlhang. (Ekes. 19:4-6) Mongwe le mongwe wa bone o ne a tshwanelwa ke go dira tshwetso ya gore o tla dira eng ka botshelo jwa gagwe. Moshe o ne a dira tshwetso e e siameng.—Bala Bahebera 11:24-27.

8. Basha ba ba akanyetsang go dira ditshwetso mo botshelong ba ka thusiwa ke eng?

⁸ Jehofa o go thusa gore o dire ditshwetso tse di botlhale fa o sa ntse o le mosha. O go naya kgakololo a dirisa melaometheo e o ka e dirisang mo maemong a wena o lebaneng le one. (Pes. 32:8) Batsadi ba gago ba Bakeresete mmogo le bagolwane ba phuthego ba ka go thusa gore o bone kafa o ka dirisang melaometheo eno ka gone. (Dia. 1:8, 9) A re sekasekeng melaometheo e meraro ya konokono e e ka go thusang gore o dire ditshwetso tse di botlhale tse di tla amang isagwe ya gago ka tsela e e molemo.

9. (a) Jehofa o re bontsha jang gore o a re tlotla ka go re naya kgololesego ya go itlhophela? (b) ‘Go batla pele Bogosi’ go tla re bulela ditshono dife?

⁹ Batlang pele Bogosi jwa Modimo le tshiamo ya gagwe. (Bala Mathaio 6:19-21, 24-26, 31-34.) Jehofa o re bontsha gore o a re tlotla ka go re naya kgololesego ya go itlhophela. Ga a go bolelele gore o dirise nako e e kana kang ya bosha jwa gago o rera ka Bogosi. Le fa go ntse jalo, Jesu o re neile molaomotheo o o ka re thusang wa gore re batle pele Bogosi. Tsela e o dirisang se a se buileng ka yone e tla dira gore o nne le ditshono tsa go bontsha gore o rata Modimo, o amegile ka baagelani ba gago le gore o anaanela tsholofelo ya botshelo jo bo sa khutleng. Fa o ntse o akanya ka lenyalo le tiro, akanyetsa gore a ditshwetso tsa gago di tla dira gore o tlhobaele ka dithoto kgotsa di tla bontsha gore o tlhagafaletse Bogosi jwa Modimo le tshiamo ya gagwe.

10. Ke eng se se neng se dira gore Jesu a itumele, mme ke ditshwetso dife tse di tla dirang gore o itumele?

¹⁰ Nna le boitumelo ka ntlha ya go direla ba bangwe. (Bala Ditiro 20:20, 21, 24, 35.) Jesu o re rutile molaomotheo ono o o botlhokwa wa botshelo. O ne a itumetse thata mo botshelong e re ka a ne a dira thato ya ga Rraagwe go na le go dira se ene a se batlang. Jesu o ne a itumelela go bona batho ba ba bonolo ba amogela dikgang tse di molemo. (Luke 10:21; Joh. 4:34) Gongwe o setse o bone boitumelo jo bo nnang gone ka ntlha ya go thusa ba bangwe. Fa o dira gore ditshwetso tsa gago tse dikgolo di remelele mo melaometheong e Jesu a neng a e ruta, ga go pelaelo gore o tla itumela mme o tla itumedisa le Jehofa.—Dia. 27:11.

11. Ke ka ntlha yang fa Baruke a ne a sa tlhole a itumetse, mme Jehofa o ne a mo naya kgakololo efe?

¹¹ Re itumela thata fa re direla Jehofa. (Dia. 16:20) Go bonala mokwaledi wa ga Jeremia e bong Baruke a ne a lebala seo. Nako nngwe o ne a sa tlhole a itumelela tirelo ya ga Jehofa. Jehofa o ne a mmolelela jaana: “O nna o ntse o ipatlela dilo tse dikgolo. Se nne o ntse o batla. Gonne bona, ke tlisa masetlapelo mo nameng yotlhe, . . . mme ke tla go naya moya wa gago e le thopo mo mafelong otlhe a o tla yang kwa go one.” (Jer. 45:3, 5) O akanya eng? Ke eng se se neng se tla dira gore Baruke a itumele—go batla dilo tse dikgolo kgotsa go falola go  senngwa ga Jerusalema e le motlhanka yo o ikanyegang wa Modimo?—Jak. 1:12.

12. Ramiro o dirile tshwetso efe e e neng ya dira gore a itumelele botshelo?

¹² Ramiro ke mokaulengwe mongwe yo o neng a bona boitumelo ka ntlha ya go direla ba bangwe. O ne a re: “Ke tswa mo lelapeng le le humanegileng le le neng le nna mo motseng o o mo Dithabeng tsa Andes. Ka jalo, fa nkgonne a ne a re o tla ntuelela madi a yunibesithi, seo se ne se lebega e le tshono e kgolo. Le fa go ntse jalo, ke ne ke sa tswa go kolobediwa go nna mongwe wa Basupi ba ga Jehofa mme gape mmulatsela mongwe o ne a nkopile gore ke tle go rera le ene kwa torotswaneng nngwe. Ke ne ka ya koo, ka ithuta go beola meriri, mme ka ipulela lefelo la go beola meriri gore ke itshedise. Fa re ntse re kopa batho go ba ruta Baebele, bontsi jwa bone bo ne jwa dumela. Moragonyana ke ne ka kopanela le phuthego e e sa tswang go tlhomiwa e e buang puo e e buiwang koo. Gone jaanong ke na le dingwaga di le lesome ke le modiredi wa nako e e tletseng. Ga go tiro epe e nngwe e e ka dirang gore ke bone boitumelo jo ke nang le jone fa ke ntse ke thusa batho go ithuta dikgang tse di molemo ka puo ya bone.”

13. Ke eng fa nako ya bosha e le nako e e molemo ya go direla Jehofa ka botlalo?

¹³ Itumelele go direla Jehofa mo bosheng jwa gago. (Bala Moreri 12:1.) Ga o a tshwanela go akanya gore o tshwanetse go bona tiro e e duelang sentle pele, gore o kgone go direla Jehofa moragonyana. Nako ya bosha ke nako e e molemo ya go simolola go direla Jehofa ka botlalo. Basha ba le bantsi ga ba na maikarabelo a le mantsi a lelapa, e bile ba na le botsogo jo bo siameng le maatla a go dira dikabelo tse di gwetlhang. O ka rata go direla Jehofa eng mo bosheng jwa gago? Gongwe o ipeetse mokgele wa go nna mmulatsela. O ka tswa o batla go direla kwa tshimong ya puo e sele. Kgotsa gongwe o bona ditsela tsa go direla ka mo go oketsegileng mo phuthegong e o leng mo go yone. Le fa o ka tswa o ipeetse mokgele ofe mo tirelong ya Modimo, o tla tlhoka go bona kafa o ka itshedisang ka gone. O tla tlhoka thapiso e e kana kang? O tla tlhopha eng?

14. Ke dilo dife tse motho a tshwanetseng go di ela tlhoko fa a rulaganyetsa isagwe ya gagwe?

¹⁴ Melaometheo e meraro ya Baebele e re setseng re e sekasekile e ka go thusa gore o dire tshwetso ya gore o tla tlhopha tiro efe. Ga go pelaelo gore bagakolodi ba gago ba kwa sekolong ba itse gore ke ditiro dife tse di leng teng mo lefelong le o nnang mo go lone. Kgotsa go ka tswa go na le mokgatlho wa puso o o ka go bolelelang gore ke tiro efe e e tlhokegang mo o nnang gone kgotsa kwa o batlang go direla gone. Tshedimosetso e e tswang mo bathong bano e ka nna mosola—mme gone ikele tlhoko. Batho ba ba sa rateng Jehofa ba ka nna ba leka go jala lorato lwa lefatshe mo pelong ya gago. (1 Joh. 2:15-17) Fa o leba dilo tse di mo lefatsheng, go ka nna motlhofo gore pelo ya gago e go tsietse.—Bala Diane 14:15; Jer. 17:9.

15, 16. Ke mang yo o ka go neelang kgakololo e e molemolemo malebana le tiro?

¹⁵ Fa o setse o itse gore ke mefuta efe e e leng gone ya tiro, o tlhoka kgakololo e e molemo. (Dia. 1:5) Ke mang yo o ka go thusang gore o kgone go tlhopha tiro e e tshwanetseng o dirisa melaometheo ya Baebele? Reetsa batho ba ba ratang Jehofa, ba ba go ratang le ba ba go itseng e bile ba itse le maemo a gago sentle. Ba tla go thusa gore o sekaseke bokgoni jwa gago le maitlhomo a gago. Gongwe se ba se buang se tla go thusa gore o akanye gape ka mekgele ya gago. A bo o segofaditswe jang ne fa o na le batsadi ba ba ratang Jehofa! Bagolwane ba ba mo phuthegong ya gago le bone ke banna ba ba tshwanelegang ba semoya ba ba ka go kaelang. Mo godimo ga moo, o ka bua le babulatsela le balebedi ba ba etang. Ke eng fa ba ile ba dira tshwetso ya go direla Modimo ka nako e e tletseng? Ba simolotse jang go nna babulatsela, mme ba itlamela jang? Bodiredi bo ba thusa jang gore ba kgotsofale?—Dia. 15:22.

¹⁶ Batho ba ba go itseng sentle ba ka go naya kgakololo ba dirisa temogo. Ka sekai, a re re o batla go tlogela sekolo se segolwane mme o simolole go nna mmulatsela e le fela ka gonne o sa rate tiro e ntsi e e tlhokegang kwa sekolong. Motho yo o go ratang a ka lemoga maitlhomo a gago mme a go thusa gore o lemoge gore, sekolo se ka go thusa gore o se ka wa ineela motlhofo mo botshelong, e leng nonofo e e botlhokwa thata fa o batla go direla Jehofa ka botlalo.—Pes. 141:5; Dia. 6:6-10.

17. Ke ditshwetso dife tse rotlhe re tshwanetseng go di tila?

¹⁷ Mongwe le mongwe yo o direlang Jehofa o tla lebana le dikotsi tsa semoya, e leng ditlhotlheletso tse di ka mo katosetsang kgakala le Jehofa. (1 Bakor. 15:33; Bakol. 2:8) Le fa go ntse jalo, mefuta mengwe ya tiro e na le dikotsi tsa semoya go feta e mengwe. A go na le bangwe mo lefelong la lona ba ba ileng ba “senyegelwa ke tumelo jaaka go thubega ga sekepe” morago ga go tlhopha mofuta mongwe wa tiro? (1 Tim. 1:19) Ruri go tla bo go le botlhale gore o tile go dira ditshwetso tse di ka tsenyang kamano ya gago le Modimo mo kotsing.—Dia. 22:3.

18, 19. Fa mongwe a ise a ikutlwe a eletsa go direla Jehofa, ke eng se a tshwanetseng go se dira?

¹⁸ Fa e le gore tota o batla go direla Jehofa ka pelo yotlhe, itumelele ditshono tse di tsamaisanang le go nna motlhanka wa Modimo, yo o sa ntseng a le mosha. Dira ditshwetso tse di tla go thusang gore o itumelele go direla Jehofa mo dinakong tseno tse di kgatlhang.—Pes. 148:12, 13.

¹⁹ Ka fa letlhakoreng le lengwe, ke eng se o tshwanetseng go se dira fa e le gore gone jaanong ga o ise o ikutlwe o eletsa go direla Jehofa? O se ka wa tlogela go leka go nonotsha tumelo ya gago. Fa moaposetoloi Paulo a sena go tlhalosa maiteko a gagwe a go leka go latelela tsela ya botshelo e Modimo a ka e segofatsang, o ne a re: “Fa mogopolo wa lona o sekametse go sele ka tsela epe, Modimo o tla lo senolela boikutlo jo bo fa godimo. Le fa go ntse jalo, go ya bokgakaleng jo re dirileng kgatelopele mo go jone, a re tsweleleng re tsamaya ka thulaganyo ka one mokgwa ono.” (Bafil. 3:15, 16) Tswelela o akanya ka lorato lwa Modimo le ka kgakololo ya gagwe e e botlhale. Ga go ope yo o ka go thusang go dira ditshwetso tse di botlhale fa o sa ntse o le mosha go feta Jehofa.