Fa babulatsela ba babedi ba ne ba tsena mo ntlong nngwe kwa Kenya, ba ne ba gakgamala fa ba fitlhela monna mongwe yo monnye a robetse mo bolaong. O ne a na le mmele o monnye thata le matsogo a makhutshwane. Fa ba ntse ba mmolelela tsholofetso ya Modimo ya gore “setlhotsa se tla palama fela jaaka kgama e tonanyana,” monna yoo o ne a nyenya fela thata.—Isa. 35:6.

Babulatsela bao ba ne ba utlwa gore Onesmus, yo jaanong a wetsang dingwaga tsa gagwe tsa bo30, o tshotswe a na le bolwetse jwa osteogenesis imperfecta kgotsa bolwetse jwa marapo a a bokoa. Marapo a gagwe a bokoa thata jaana mo e leng gore fa a ka utlwa kgatelelo e e sa reng sepe fela, a ka robega. E re ka bolwetse jono bo se na kalafi, Onesmus o a itse gore o tlile go fetsa botshelo jwa gagwe jotlhe a le mo ditlhabing e bile a nna mo setulong sa maotwana.

Onesmus o ne a amogela thuto ya Baebele. Le fa go ntse jalo, mmaagwe o ne a gana a ya dipokanong tsa Bokeresete, a re a ka gobala e bile seno se tla mmakela ditlhabi tse dintsi. Ka jalo, bakaulengwe ba ne ba mo rekotela dipokano mme o ne a di reetsa kwa gae. Morago ga go ithuta dikgwedi di le tlhano, Onesmus o ne a dira tshwetso ya gore o batla go ya dipokanong le fa seo se ka nna kotsi jang.

A go ya dipokanong tsa Bokeresete go ne ga oketsa ditlhabi tsa ga Onesmus? Le e seng. Onesmus a re: “Go ne go bonala ditlhabi tsa me tse di neng di sa fele di okobala fa ke le kwa dipokanong.” O ne a akanya gore tsholofelo ya gagwe e ntšha e ne e le lebaka la go bo a ikutlwa botoka. Mmaagwe Onesmus o ne a lemoga gore morwawe o itumetse, mme o ne a itumelela seo mo a neng a amogela thuto ya Baebele. O ne a tle a re: “Go direla Modimo ke molemo mo go morwaake.”

Go ise go ye kae, Onesmus o ne a nna mmoledi yo o sa kolobediwang. Fa nako e ntse e ya, o ne a kolobediwa mme gone jaanong ke motlhanka wa bodiredi. Le fa Onesmus a sa kgone go dirisa maoto a gagwe le letsogo le lengwe, o ne a eletsa go dira sotlhe se a ka se kgonang mo tirelong ya ga Jehofa. O ne a batla go nna mmulatsela yo o thusang mme gone a okaoka go tlatsa foromo. Ka ntlha yang? Ka gonne o ne a itse gore o tla tshwanelwa ke go ikaega gotlhelele ka mongwe gore a mo kgorometse ka setulo sa gagwe sa maotwana. Fa a bolelela Bakeresetemmogo le ene kafa a ikutlwang ka gone, ba ne ba mo solofetsa gore ba tla mo ema nokeng. Mme ruri ba ne ba dira jalo, ba thusa Onesmus gore e nne mmulatsela yo o thusang.

Fa Onesmus a ne a batla go nna mmulatsela wa ka metlha, o ne a tshwenyegile ka se se tshwanang. Le fa go ntse jalo, nako nngwe, temana ya letsatsi e ne ya mo naya kgothatso e a neng a e tlhoka. Temana eo e ne e le mo go Pesalema 34:8: “Lekang mme lo bone gore Jehofa o molemo.” Fa a sena go tlhatlhanya ka temana eno, o ne a dira tshwetso ya go nna mmulatsela wa ka metlha. Gone jaanong o rera malatsi a le manè mo bekeng mme o na le dithuto di le mmalwa tsa Baebele tse di gatelang pele sentle semoyeng. Ka 2010, o ne a nna gone mo Sekolong sa Tirelo ya Bobulatsela. Ruri Onesmus o ne a itumela fa a bona gore mongwe wa batlhatlheledi ba gagwe e ne e le mongwe wa bakaulengwe ba ba neng ba mo etela lekgetlho la ntlha!

Gone jaanong, batsadi ba ga Onesmus ba tlhokafetse, mme gone, bakaulengwe le bokgaitsadi mo phuthegong ba mo tlhokomela ka se a se tlhokang letsatsi le letsatsi. O itumelela masego a a a bonang gone jaanong mme o lebile pele go bona letsatsi le go seng “monni ope yo o tla reng: ‘Ke a bobola.’”—Isa. 33:24.