BAEBELE ya re: “Bonang! Bana ke boswa jo bo tswang kwa go Jehofa; maungo a sebopelo ke tuelo.” (Pes. 127:3) Ka jalo, ga go gakgamatse go bo batsadi ba Bakeresete ba itumelela go tsholwa ga lesea la bone.

Mme gone, le fa batsadi ba ka itumelela go tsholwa ga lesea, seno se tsamaisana le maikarabelo a a masisi. Gore ngwana a gole a itekanetse sentle, o tlhoka dijo tse di nang le dikotla ka metlha. Batsadi ba tlhoka go dira ka natla go fepa ngwana wa bone semoyeng le go mo kaela ba dirisa melaometheo ya Modimo, gore ngwana a nne a nitame mo kobamelong ya boammaaruri. (Dia. 1:8) Batsadi ba tshwanetse go simolola leng go thapisa ngwana, mme seo se akaretsa eng?

Akanya ka kgang ya ga Manoa yo e neng e le wa lotso lwa Badana, yo o neng a nna mo motseng wa Sora kwa Iseraeleng wa bogologolo. Moengele wa ga Jehofa o ne a bolelela mosadi wa ga Manoa yo e neng e le moopa gore o tla tshola morwa. (Baatlh. 13:2, 3) Ga go pelaelo gore Manoa le mosadi wa gagwe ba ba neng ba ikanyega ba ne ba itumedisiwa ke dikgang tseno. Le fa go ntse jalo, gape go ne go na le dilo tse ba neng ba tshwenyegile thata ka tsone. Ka jalo, Manoa o ne a rapela jaana: “Tshwarelo Jehofa. Monna wa Modimo wa boammaaruri yo o sa tswang go mo romela, tsweetswee mma a tle gape kwa go rona mme a re rute se re tshwanetseng go se dira ngwana yo o tla tsholwang.” (Baatlh. 13:8) Manoa le mosadi wa gagwe ba ne ba tshwenyegile ka gore ba tla godisa ngwana wa bone jang. Ga go pelaelo gore ba ne ba ruta morwaabone e bong Samesone molao wa Modimo, mme maiteko a bone ga a ka a itaya sefololetse. Baebele ya re: “Fa nako e ntse e tsamaya moya wa ga Jehofa wa simolola go tlhotlheletsa [Samesone].” Mme seno se ne sa dira gore Samesone yo e neng e le moatlhodi mo Iseraele a dire dilo di le dintsi tse di bontshang gore o na le maatla.—Baatlh. 13:25; 14:5, 6; 15:14, 15.

Ngwana o tshwanetse go simolola go thapisiwa leng? Mmaagwe Timotheo e bong Yunise le nkokoagwe e bong Loise ba ne ba simolola go mo thapisa ka “mekwalo e e boitshepo go tswa boseeng.” (2 Tim. 1:5; 3:15) Timotheo o ne a simolola go thapisiwa ka Dikwalo a sa ntse a le monnye.

Go botlhale gore batsadi ba Bakeresete ba rapelele kaelo le go rulaganya dilo e sa le gale gore ba kgone go thapisa ngwana wa bone “go tswa boseeng.” Diane 21:5 ya re: “Dithulaganyo tsa yo o tlhoafetseng ruri di solegela molemo.” Ga go pelaelo gore batsadi ba tla dira dithulaganyo ka kelotlhoko, pele ga ngwana wa bone a tsholwa. Ba ka nna ba bo ba dira lenaane la dilo tse lesea le tla di tlhokang. Mme gape go botlhokwa gore ba dire le dithulaganyo tsa go mo thapisa semoyeng. Ba tshwanetse go ipeela mokgele wa gore ba simolole thapiso eo fa ngwana wa bone e sa ntse e le lesea.

Buka ya Early Childhood Counts—A Programming Guide on Early Childhood Care for Development ya re: “Dikgwedi tsa ntlha fa lesea le sena go tsholwa, di botlhokwa thata mo goreng boboko jwa lone bo gole sentle. Ka nako eno, palo ya di-synapse—methapo e e golaganyang disele e e dirang gore motho a kgone go ithuta—e oketsega makgetlho a le masomeamabedi.” Ruri go botlhale gore batsadi ba dirise nako eno e khutshwane ya go gola ga boboko jwa ngwana go simolola go mo ruta ka Jehofa le ka melao ya gagwe!

Mmè mongwe yo e leng mmulatsela o ne a bua jaana malebana le mosetsanyana wa gagwe: “Ke simolotse go ya bodireding le ene a na le kgwedi fela. Le fa gone a ne a sa tlhaloganye se se diragalang, ke dumela gore go nna gone mo bodireding a sa ntse a le monnye jalo, go ne ga mo solegela molemo. Fa a na le dingwaga di le pedi, o ne a kgona go tsamaisetsa batho ba re neng re kopana le bone mo bodireding dipampitshana a sa tshoge.”

Go thapisa ngwana go tswa boseeng go nna le diphelelo tse di molemo. Le fa go ntse jalo, batsadi ba lemogile gore go thapisa bana semoyeng ga se kgetsi e potlana.

Go sa nnisege ga ngwana kgotsa go sa kgone go tlhoma mogopolo ka nako e telele ga gagwe, e ka nna kgwetlho e kgolo mo batsading. Bana ba bannye ga ba kgone go tlhoma mogopolo mo selong se le sengwe. Tota e bile, ba rata go itse dilo e bile ba leka go ithuta sengwe le sengwe se ba se bonang. Batsadi ba ka dira eng go thusa ngwana wa bone gore a tlhome mogopolo mo go se ba lekang go mo ruta sone?

Akanya ka se Moshe a neng a se bua. Duteronome 6:6, 7 ya re: “Mafoko ano a ke a go laolelang gompieno a nne mo pelong ya gago; o a jalele kwa teng mo go morwao o bo o bue ka one fa o ntse mo ntlong ya gago le fa o tsamaya mo tseleng le fa o rapama le fa o tsoga.” Lefoko go “jalela” le naya kgopolo ya go ruta ka go nna o boaboeletsa. Ngwana yo monnye o tshwana le sejalo se sennye se se tlhokang go nosediwa ka metlha. Fa e le gore go boaboeletsa go thusa bagolo go gakologelwa dilo tsa botlhokwa, eleruri go tla thusa le bana ba bannye!

Batsadi ba tlhoka go ipha nako le bana ba bone gore ba ba rute dithuto tsa boammaaruri ka Modimo. Mo lefatsheng la gompieno la ditshwarego, e ka nna kgwetlho mo batsading gore ba iphe nako e e ntseng jalo le bana ba bone. Le fa go ntse jalo, moaposetoloi Paulo o ne a re rotloetsa gore re ‘ithekele nako e e re siametseng’ gore re dire dilo tse di botlhokwa tsa Bokeresete. (Baef. 5:15, 16) Re ka dira seno jang? Molebedi mongwe wa Mokeresete yo mosadi wa gagwe a nnang a tshwaregile thata e re ka e le mmulatsela wa ka metlha, o ne a lebana le kgwetlho ya gore o tla rulaganya  dilo jang gore a thapise ngwana wa gagwe, a dire maikarabelo a gagwe a semoya mmogo le go dira tiro ya boitshediso. Ba ne ba dira jang gore ba nne le nako ya go thapisa morwadiabone? Rre a re: “Moso mongwe le mongwe pele ga ke ya tirong, nna le mosadi wa me re mmalela Buka ya Me ya Dipolelo Tsa Bibela kgotsa bukana ya Go Tlhatlhoba Dikwalo ka Malatsi Otlhe. Mo maitseboeng, re tlhomamisa gore re a mmalela pele ga a robala, mme fa re ya bodireding re tsamaya le ene. Re batla go dirisa nako eno ya fa a sa ntse a le monnye ka botlalo.”

Tota re batla gore fa bana ba rona ba gola e nne batho ba ba nang le maikarabelo. Le fa go ntse jalo, lebaka la rona la konokono la go ba thapisa ke go dira gore ba rate Modimo go tswa pelong.—Mar. 12:28-30.

Pesalema 127:4 ya re: “Jaaka metswi mo seatleng sa monna yo o thata, bana ba bosha ba ntse fela jalo.” Ka jalo, bana ba tshwana le metswi e o tshwanetseng go e korola sentle gore e iteye sengwe. Mohulamotswi a ka se ka a busa motswi fa a setse a o hutse. Batsadi ba na le “metswi”—bana ba bone—ka nako e nnye fela. Ba tshwanetse go dirisa nako eo go jalela melaometheo ya Modimo mo megopolong le mo dipelong tsa bana ba bone.

Moaposetoloi Johane o ne a bua jaana malebana le bana ba gagwe ba semoya: “Ga go na lebaka le legolo la go leboga le ke nang le lone go feta dilo tseno, gore ke bo ke ntse ke utlwa gore bana ba me ba tswelela ba tsamaya mo boammaaruring.” (3 Joh. 4) Batsadi ba Bakeresete le bone ba ka bua mafoko a a tshwanang le ao, fa ba bona bana ba bone “ba tswelela ba tsamaya mo boammaaruring.”