“SENGWE SE SE SA LEBALESEGENG!” Ke kafa batho ba le bantsi ba neng ba tlhalosa “Creation Drama” ka gone. E tlile ka nako e e tshwanetseng, e bile e ne ya kgatlha batho ba le bantsi ba ba neng ba e lebile. Eleruri “Creation Drama” e ne ya neela bosupi ka ga Jehofa pelenyana fela ga puso ya ga Hitler e bogisa batho ba Modimo ka tsela e e setlhogo kwa Yuropa. Tota “Creation Drama” eno e ne e le eng?

Ka 1914, go ne ga gololwa “Photo-Drama of Creation” kwa ntlokgolo ya batho ba ga Jehofa e e kwa Brooklyn, New York, U.S.A. E ne e le baesekopo ya diselaete tsa mmala tse di nang le modumo, mme e ne e tsaya diura di le robedi. “Photo-Drama” e ne e lebelelwa ke batho ba le dimilionemilione lefatshe ka bophara. Baesekopo e nngwe e e khutswafaditsweng e e tshwanang le yone—“Eureka Drama”—le yone e ne ya gololwa ka 1914. Le fa go ntse jalo, ka bo1920, diselaete, difilimi le metšhini ya yone e e tlhagisang ditshwantsho, e ne e setse e onetse thata. Mme gone, batho ba ne ba sa ntse ba batla go lebelela “Photo-Drama.” Ka sekai, baagi ba kwa Ludwigsburg kwa Jeremane ba ne ba botsa jaana, “Lo tla re bontsha leng ‘Photo-Drama’ gape?” Tota go ne go tla dirwa eng?

E le gore baemedi ba lelapa la Bethele kwa Magdeburg kwa Jeremane ba kgone go tswelela ba bontsha batho Photo-Drama, ka bo1920 ba ne ba reka difilimi kwa mokgatlhong wa dikgang kwa Paris, Fora, ba bo ba reka le diselaete kwa dikhampaning dingwe tsa kwa Leipzig le kwa Dresden tse di dirang ditshwantsho. Di ne tsa kopanngwa le diselaete tsa “Photo-Drama” tse di neng di sa ntse di bereka sentle.

Mokaulengwe Erich Frost yo e neng e le setswerere sa mmino, o ne a tlhama mmino o o neng wa tsenngwa mo difiliming le mo diselaeteng. Moanedi o ne a tsaya mangwe a mafoko a gagwe mo bukeng ya Creation. Ke gone ka moo diselaete tseno tse disha tsa “Photo-Drama” di neng tsa nna le leina le lesha e leng, “Creation Drama.”

“Creation Drama” e ne e le boleele jo bo lekanang le “Photo-Drama”—diura di le robedi—mme e ne e bontshiwa ka dikarolwana mo maitseboeng a a latelanang. E ne e na le dintlha tse di kgatlhang malebana le popo, e tlhalosa hisitori ya Baebele le ya lefatshe mme e bontsha gore bodumedi jwa maaka ga bo a kgona go thusa batho. “Creation Drama” e ne ya bontshiwa kwa Austria, Jeremane, Luxemburg, Switzerland, le kwa mafelong ape fela a go neng go na le batho ba ba buang Sejeremane kwa go one.

Erich Frost o tlhalosa jaana: “Fa go ne go bontshiwa diselaete tsa ‘Creation Drama,’ ke ne ka kgothaletsa badirimmogo le nna, segolobogolo ba ba neng ba tshameka okhesetara gore ba dirise nako ya go ikhutsa gore ba neye batho dibuka le dibukana tsa rona tse di molemo. Fa re dira jalo re ne re kgona go tsamaisa dikgatiso tse dintsi go  feta kafa re neng re dira ka gone fa re tsamaya ka ntlo le ntlo.” Johannes Rauthe yo o neng a rulaganya gore go bontshiwe diselaete tseno kwa Poland le kwa nageng e gone jaanong e bidiwang Czech Republic, o gopola gore batho ba le bantsi ba ba neng ba nna gone ba ne ba tlogela diaterese tsa bone gore ba ba etele. Diaterese tseo di ne tsa ba thusa thata gore ba kgone go boela kwa bathong bao mme ba tlotle le bone ka Baebele.

Mo masimologong a bo1930, batho ba ne ba tlala mo diholong go tla go bona diselaete tsa “Creation Drama,” mme batho ba le bantsi ba ne ba bua ka Basupi ba ga Jehofa. Ka 1933, mo e ka nnang batho ba le milione ba ne ba setse ba bone diselaete tseno tse di neng di rulagantswe ke ofisi ya rona ya lekala kwa Jeremane. Käthe Krauss a re: “Mo malatsing otlhe a le matlhano re ne re tsamaya dikilometara di le lesome go ya fela, re ralala dikgwa, re tlhatloga le go fologa dithaba, re kgabaganya mekgatšha, e le fela gore re ye go bona ‘Creation Drama.’” Else Billharz le ene a re: “‘Creation Drama’ e ne ya nthusa gore ke rate boammaaruri.”

Alfred Almendinger o tlhalosa gore fa mmaagwe a ne a ile go bona ‘Creation Drama’ o ne a “itumetse thata jaana mo a neng a reka Baebele a bo a batla lefoko ‘pakatori’ mo go yone.” E re ka a ne a sa kgona go bona lefoko leno mo Baebeleng o ne a tlogela kereke, mme a kolobediwa. Erich Frost o gakologelwa jaana: “‘Creation Drama’ e ne ya thusa batho ba le bantsi gore ba itse boammaaruri.”—3 Joh. 1-3.

Ka nako e batho ba le bantsi ba neng ba lebelela “Creation Drama” ka yone, Bonasi le jone bo ne bo oketsega kwa Yuropa mme bo simolola go baka mathata. Go simolola ka 1933, tiro ya Basupi ba ga Jehofa e ne ya thibelwa kwa Jeremane. Go tloga ka nako eo go fitlha kwa bofelong jwa ntwa ya bobedi ya lefatshe ka 1945, batlhanka ba ga Jehofa kwa Yuropa ba ne ba bogisiwa fela thata. Erich Frost o ne a fetsa dingwaga di le robedi a tshwerwe. Le fa go ntse jalo, o ne a falola mme moragonyana a ya go direla kwa Bethele ya kwa Wiesbaden kwa Jeremane. Ruri go a itumedisa gore “Creation Drama” e e sa lebalesegeng e ile ya nonotsha Bakeresete ba le bantsi gore ba nne le bopelokgale jwa go lebana le diteko tsa tumelo ka nako ya Ntwa ya Lefatshe ya II!—Go tswa mo mabolokelong a rona kwa Jeremane.