Jehofa—“Mofalotsi” mo Metlheng ya Baebele

“Ao tlhe Modimo, ntseele kgato ka bonako. O thuso ya me le Mofalotsi wa me.”—PES. 70:5.

1, 2. (a) Baobamedi ba Modimo ba ya kwa go ene ba kopa thuso fa go rileng? (b) Go tsoga potso efe mme re ka bona karabo kae?

FA BATSADI ba mosadi mongwe yo o nyetsweng wa dingwaga tse 23 ba ntse ba le mo malatsing a boikhutso, ba utlwalela gore morwadiabone o nyeletse. Go belaelwa gore o tserwe ke dikebekwa. Gone fela foo batsadi bano ba phutha dilwana tsa bone ba bo ba boela gae, ba ntse ba rapela Jehofa gore a ba thuse. Fa Mosupi mongwe yo o nang le dingwaga tse 20 a tlhatlhobiwa o fitlhelwa a na le bolwetse jo bo tla dirang gore kgabagare a swe ditokololo gotlhelele. Gone fela foo o rapela Jehofa. Mmè mongwe yo o sa nyalwang yo o lekang ka natla go batla tiro ga a na madi a a lekaneng go reka dijo tse di ka mo tlamelang ene le morwadie wa dingwaga tse 12. O tshololela Jehofa mafatlha a gagwe. Ee, gantsi fa baobamedi ba Modimo ba lebane le diteko tse di botlhoko kgotsa mathata, ba batla thuso kwa go ene. A o kile wa rapela Jehofa o tlaletswe o tlhoka thuso?

² Go tsoga potso eno ya botlhokwa: A ruri re ka solofela gore Jehofa a re thuse fa re mo rapela re kopa thuso? Karabo e e nonotshang tumelo e fitlhelwa mo go Pesalema 70. Pesalema eno e e amang maikutlo e ne ya kwalwa ke Dafide, moobamedi yo o ikanyegang wa ga Jehofa yo o neng a lebana le diteko tse dintsi le mathata mo botshelong jwa gagwe. Mopesalema yono yo o tlhotlheleditsweng o ne a tlhotlheletsega go raya Jehofa a re: “Ao tlhe Modimo, . . . o thuso ya me le Mofalotsi wa me.” (Pes. 70:5) Fa re sekaseka Pesalema 70, re tla kgona go bona gore ke ka ntlha yang fa le rona re ka ya kwa go Jehofa fa re tlhoka thuso mme re dumela ka botlalo gore o tla nna “Mofalotsi” wa rona.

“O . . . Mofalotsi”

3. (a) Mo go Pesalema 70, Dafide o kopa thuso efe ka potlako? (b) Dafide o bontsha jang gore o tshepa Modimo mo go Pesalema 70?

³ Mo temaneng e e simololang le e e konelang ya Pesalema 70, Dafide o kopa thuso ka potlako mo Modimong. (Bala Pesalema 70:1-5.) Mo temaneng ya ntlha, o kopa Jehofa gore a ‘potlakele’ go mo golola, mme mo go ya botlhano o kopa gore a mo ‘tseele kgato ka bonako.’ Mo ditemaneng tse di fa gare, Dafide o kopa dilo tse tlhano mme nako le nako o simolola ka mafoko “e kete,” a bo a tlhalosa sengwe se a se eletsang. Dikopo tsa ntlha tse tharo di malebana le batho  ba ba lekang go mmolaya. Dafide o kopa Jehofa ka tlhoafalo gore a fenye baba bano mme a ba tlhabise ditlhong ka ntlha ya boikepo jwa bone. Dikopo tse pedi tse di latelang tse di mo temaneng ya 4, di bua ka batho ba Modimo. Dafide o rapelela gore batho ba ba batlang Jehofa ba tlhotlheletsege go ipela le go mo tlotlomatsa. Fa Dafide a konela pesalema ya gagwe, o raya Jehofa a re: “O thuso ya me le Mofalotsi wa me.” Ela tlhoko gore Dafide ga a re, “E kete o ka nna thuso ya me,” jaaka e kete le fano o a kopa. Mme a re, “O thuso ya me,” a bontsha kafa a tshepang Modimo ka teng. Dafide o dumela gore Modimo o tla mo thusa.

4, 5. Re ithuta eng ka Dafide mo go Pesalema 70, mme re ka tlhomamisega ka eng?

⁴ Pesalema 70 e bontsha eng ka Dafide? Fa Dafide a ne a lebane le baba ba ba neng ba ikemiseditse go mmolaya, ga a ka a tlhopha go rarabolola kgang ka boene. Go na le moo, o ne a dumela gore Jehofa o tla otlhaya baganetsi bano ka nako ya gagwe le ka tsela ya gagwe. (1 Sam. 26:10) Dafide o ne a tswelela a tlhomamisegile tota gore Jehofa o thusa batho ba ba mmatlang e bile o a ba namola. (Baheb. 11:6) O ne a dumela gore baobamedi ba ba ntseng jalo ba boammaaruri ba na le mabaka a a utlwalang a go ipela le go tlotlomatsa Jehofa ka go bolelela batho ba bangwe ka bogolo jwa gagwe.—Pes. 5:11; 35:27.

⁵ Fela jaaka Dafide, re ka tlhomamisega ka botlalo gore Jehofa ke Mothusi wa rona le “Mofalotsi” wa rona. Ka jalo, fa re lebane le diteko tse di boima kgotsa re bona re le mo dipharagobeng re tlhoka thuso thata, go a tshwanela gore re ka rapela Jehofa gore a re thuse ka bonako. (Pes. 71:12) Mme Jehofa a ka araba jang fa re mo rapela re kopa thuso? Pele re sekaseka kafa Jehofa a ka re thusang ka teng, a re tlotleng ka ditsela tse tharo tse a neng a falotsa Dafide ka tsone, a mo thusa ka nako ya fa a ne a tlhoka thuso ka potlako.

O ne A Namolwa mo Baganetsing

6. Ke eng se se neng sa thusa Dafide go itse gore Jehofa o falotsa basiami?

⁶ Dafide o ne a itse go tswa mo dipegong tse di tlhotlheleditsweng tse di neng di le teng ka nako eo tsa Baebele gore basiami ba ka ikaega ka Jehofa gore a ba thuse. Fa Jehofa a ne a tlisa Morwalela mo lefatsheng le le boikepo, o ne a falotsa Noa le lelapa la gagwe le le boifang Modimo. (Gen. 7:23) Fa Jehofa a ne a nesetsa banni ba ba boikepo ba Sodoma le Gomora molelo le sulefera, o ne a thusa mosiami Lote le bomorwadie ba babedi gore ba falole. (Gen. 19:12-26) Fa Jehofa a ne a senya Faro yo o ikgogomosang le mephato ya gagwe ya masole kwa Lewatleng le Lehibidu, O ne a boloka batho ba gagwe, ka jalo a ba sireletsa gore ba se ka ba swa botlhoko. (Ekes. 14:19-28) Ruri ga go gakgamatse go bo mo pesalemeng e nngwe Dafide a ile a baka Jehofa a re ke “Modimo wa ditiro tsa poloko.”—Pes. 68:20.

7-9. (a) Ke ka ntlha yang fa Dafide a ne a ka ikanya Modimo gore o na le maatla a go mo falotsa? (b) Dafide o ne a tsaya gore o golotswe ke mang?

⁷ Gape Dafide o ne a na le lebaka le le mo amang ka namana la gore a ikanye Jehofa ka pelo yotlhe gore a ka mo falotsa. Dafide o ne a iponetse ka boene gore “mabogo a a nnang ka bosakhutleng” a ga Jehofa a ka golola ba ba mo direlang. (Dute. 33:27) Jehofa o ne a namotse Dafide ka makgetlho a le mmalwa mo diatleng tsa ‘baba ba ba galefileng.’ (Pes. 18:17-19, 48) Sekai ke se.

⁸ Fa basadi ba Iseraele ba ne ba simolola go baka Dafide ka ntlha ya bokgoni jwa gagwe jwa bosole, Kgosi Saulo o ne a fufega mo a neng a kolopa Dafide ka lerumo ka makgetlho a le mabedi. (1 Sam. 18:6-9) Dafide o ne a falola lerumo ka makgetlho ao oomabedi. A Dafide o ne a kgona go dira jalo fela ka ntlha ya bokgoni le majato a a neng a na le one ka gonne e le lesole le le nang le maitemogelo? Nnyaa. Pego ya Baebele e tlhalosa gore “Jehofa o ne a na le ene.” (Bala 1 Samuele 18:11-14.) Moragonyana fa leano la ga Saulo la gore Dafide a bolawe ke Bafilisitia le sena go folotsa, “Saulo [o ne] a bona a ba a itse gore Jehofa o ne a na le Dafide.”—1 Sam. 18:17-28.

⁹ Dafide o ne a tsaya gore o golotswe ke mang? Mafoko a a fa godimo ga Pesalema 18 a re Dafide o ne a “bua le Jehofa mafoko a pina eno mo letsatsing le Jehofa a neng a mo golotse . . . mo seatleng sa ga Saulo.” Dafide o ne a tlhalosa maikutlo  a gagwe ka go opela a re: “Jehofa ke lefika la me le legolo le kago ya me e e thata le Mofalotsi wa me. Modimo wa me ke lefika la me. Ke tla tshabela kwa go ene.” (Pes. 18:2) A ga go nonotshe tumelo go itse gore Jehofa o kgona go golola batho ba gagwe?—Pes. 35:10.

O ne A Nonotshiwa fa a Lwala

10, 11. Ke eng se se re thusang go bona gore Dafide o ka tswa a ile a tshwarwa leng ke bolwetse jo bo umakwang mo go Pesalema 41?

¹⁰ Kgosi Dafide o kile a lwala thata, jaaka go umakilwe mo go Pesalema 41. Dafide o ne a gatelelwa ke bolwetse ka lobaka lo lo rileng, mme o ne a lwala thata mo bangwe ba baba ba gagwe ba neng ba akanya gore a ka se tlhole a “tsoga gape.” (Temana 7, 8) Ke leng mo Dafide a neng a lwala thata jalo? Maemo a a umakiwang mo pesalemeng eno a ka tswa a amana le nako e e thata mo botshelong jwa ga Dafide fa morwawe e bong Abesalome a ne a leka go itseela bogosi.—2 Sam. 15:6, 13, 14.

¹¹ Ka sekai, Dafide a re tsala nngwe e a neng a e ikanya, a a ja senkgwe le yone, e mo tlhanogetse. (Temana 9) Seno se ka re gopotsa tiragalo nngwe mo botshelong jwa ga Dafide. Ka nako ya botsuolodi jwa ga Abesalome, mogakolodi wa ga Dafide yo a neng a mo ikanya e bong Ahitofele o ne a mo tlhanogela mme a inaakanya le Abesalome ba tsuologela kgosi. (2 Sam. 15:31; 16:15) Akanya fela kgosi e setse e le bokoa e gateletswe ke bolwetse, e sa kgone le go emelela, mme e itse gore e dikologilwe ke batho ba ba e logelang maano ba ba eletsang gore e swe gore ba kgone go dira maano a bone a a bosula.—Temana 5.

12, 13. (a) Dafide o ne a bontsha gore o tlhomamisegile ka eng? (b) Modimo o ka tswa a ile a nonotsha Dafide jang?

¹² Dafide o ne a ikanya “Mofalotsi” ka dinako tsotlhe. O ne a bua jaana ka moobamedi yo o siameng yo o lwalang: “Jehofa o tla mo falotsa mo letsatsing la masetlapelo. Jehofa ka boene o tla mo tshegetsa mo bolawaneng jwa bolwetse; ruri o tla fetola bolao jotlhe jwa gagwe fa a sa ntse a bobola.” (Pes. 41:1, 3) Le fano gape, ela tlhoko kafa Dafide a tlhomamisegang ka teng, jaaka re bona mo mafokong a a reng “Jehofa ka boene o tla.” Dafide o ne a tlhomamisegile gore Jehofa o ne a tla mo falotsa. A mo falotsa jang?

¹³ Dafide o ne a sa lebelela gore Jehofa a mo fodise ka kgakgamatso. Mo boemong jwa moo, o ne a tlhomamisegile gore Jehofa o ne a tla “mo tshegetsa”—ke gore o ne a tla mo ema nokeng le go mo nonotsha fa a ntse a robetse a lwala. Ruri Dafide o ne a tlhoka thuso e e ntseng jalo. Kwantle ga bolwetse jo bo neng bo mo koafatsa, o ne a na le baba ba bantsi ba ba neng ba mmua bosula. (Temana 5, 6) Jehofa o tshwanetse a bo a ile a nonotsha Dafide ka go mo thusa gore a akanye ka dilo tse di gomotsang. Ela tlhoko gore Dafide o ne a re: “O ntshegeditse ka ntlha ya bothokgami jwa me.” (Temana 12) Gape Dafide o ka tswa a ile a nonotshiwa ke go akanya ntlha ya gore le fa a le sekoa e bile baba ba gagwe ba bua bosula ka ene, Jehofa o ne a mo tsaya e le motho yo o ikanyegang. Kgabagare Dafide o ne a fola. A ga go kgothatse go itse gore Jehofa a ka nonotsha batho ba ba lwalang?—2 Bakor. 1:3.

O ne A Tlamelwa ka Dijo

14, 15. Ke leng mo Dafide le banna ba gagwe ba ileng ba iphitlhela ba tlhoka dijo, mme ba ne ba thusiwa ka tsela efe?

¹⁴ Fa Dafide a nna kgosi ya Iseraele, o ne a ja dijo le dino tsa maemo a a kwa godimo e bile o ne a ka laletsa batho ba bangwe ba bantsi gore ba tle go ja le ene. (2 Sam. 9:10) Le fa go ntse jalo, gape Dafide o ne a itse gore go bolawa ke tlala go ntse jang. Fa morwawe e bong Abesalome a ne a rulaganya gore batho ba mo tsuologele a bo a leka go thankgola puso, Dafide mmogo le bangwe ba ba neng ba mo ema nokeng ka boikanyegi ba ne ba fuduga ba tswa mo Jerusalema. Ba ne ba tshabela kwa Gileade, kwa botlhaba jwa Noka ya Joredane. (2 Sam. 17:22, 24) Dafide le banna ba gagwe ba ne ba patelesega go nna bafaladi mme go ise go ye kae ba iphitlhela ba se na sepe se ba ka se jang le se ba ka se nwang, e bile ba tlhoka go ikhutsa. Mme ba ne ba tla bona dijo kae mo nageng e e ntseng jalo?

¹⁵ Kgabagare, Dafide le banna ba gagwe ba ne ba goroga kwa motseng wa Mahanaime. Fa ba le koo ba ne ba kopana le banna ba bararo ba ba pelokgale—Shobi, Makire le Barisilai. Banna  bano ba ne ba ikemiseditse go tsenya matshelo a bone mo kotsing gore ba thuse kgosi e e tlhomilweng ke Modimo, ka gonne fa Abesalome a ne a ka tsaya bogosi, ruri o ne a tla otlhaya motho ope fela yo o neng a ntse a le kafa letlhakoreng la ga Dafide. E re ka banna ba bararo bano ba ba ikanyegang ba ne ba lemoga gore Dafide le banna ba gagwe ba mo dipharagobeng, ba ne ba ba tlisetsa dilo tse ba neng ba di tlhoka thata, tse di jaaka malao, korong, barele, dijo tsa ditlhaka tse di gadikilweng, dinawa tse dikima, dilentele, tswina ya dinotshe, botoro le dinku. (Bala 2 Samuele 17:27-29.) Boikanyegi le bopelotshweu jo bo sa tlwaelegang jwa banna bano ba bararo bo tshwanetse jwa bo bo ile jwa ama Dafide fela thata. Ruri Dafide o ne a ka se tsamaye a lebale se ba mo diretseng sone!

16. Tota ke mang yo o neng a tlamela Dafide le banna ba gagwe ka dijo?

¹⁶ Mme tota ke mang yo o neng a tlamela Dafide le banna ba gagwe ka dijo? Dafide o ne a tlhatswegile pelo gore Jehofa o tlhokomela batho ba gagwe. Ruri Jehofa a ka tlhotlheletsa batlhanka ba bangwe ba gagwe gore ba thuse moobamedi ka bone yo o tlhokang thuso. Kwantle ga pelaelo fa Dafide a akanya ka se se diragetseng kwa Gileade, o ne a bona gore bopelonomi jwa banna bao ba bararo e ne e le tlhokomelo e e lorato ya ga Jehofa. Fa Dafide a ne a le gaufi le go swa o ne a kwala a re: “Nkile ka bo ke le lekau, jaanong ke tsofetse, mme le fa go ntse jalo ga ke ise ke bone ope yo o siameng [go akaretsa le ene] a tlogetswe gotlhelele, le fa e le bana ba gagwe ba batla senkgwe.” (Pes. 37:25) A ga go gomotse go itse gore ka metlha Jehofa o tlamela batlhanka ba gagwe?—Dia. 10:3.

“Jehofa o Itse Kafa a ka Gololang Batho . . . ka Gone”

17. Jehofa o ile a bontsha eng gangwe le gape?

¹⁷ Dafide e ne e le mongwe fela wa baobamedi ba bantsi ba Jehofa a neng a ba falotsa mo metlheng ya Baebele. Fa e sa le mo motlheng wa ga Dafide, Modimo o ile a bontsha gangwe le gape kafa mafoko ano a ga moaposetoloi Petere a leng boammaaruri ka gone: “Jehofa o itse kafa a ka gololang batho ba boineelo jwa bomodimo mo tekong ka gone.” (2 Pet. 2:9) Akanya ka dikai tse dingwe tse pedi.

18. Jehofa o ne a namola batho jang mo motlheng wa ga Hesekia?

¹⁸ Fa mophato o o maatla wa masole a Asiria o ne o tlhasela Juda o bo o tshosetsa Jerusalema ka lekgolo la borobedi la dingwaga B.C.E., Kgosi Hesekia o ne a rapela a re: “Tlhe Jehofa Modimo wa rona, re boloke . . . gore magosi otlhe a lefatshe a tle a itse gore wena, Jehofa, o Modimo o le nosi.” (Isa. 37:20) Se Hesekia a neng a tshwenyegile thata ka sone e ne e le gore leina la Modimo le se ka la kgobiwa. Jehofa o ne a araba thapelo eo e e tswang pelong. Mo bosigong bo le bongwe fela,  moengele a le mongwe o ne a bolaya Baasiria ba le 185 000, ka go dira jalo a namola batlhanka ba ba ikanyegang ba ga Jehofa.—Isa. 37:32, 36.

19. Bakeresete ba lekgolo la ntlha la dingwaga ba ne ba falola masetlapelo ka go tsaya tlhagiso efe tsia?

¹⁹ Malatsi a se kae fela pele Jesu a swa, o ne a bolela boporofeti jo bo neng bo tlhagisa barutwa ba gagwe ba ba neng ba le kwa Judea. (Bala Luke 21:20-22.) Go ne ga feta masomesome a dingwaga, mme ka 66 C.E., botsuolodi jwa Bajuda bo ne jwa dira gore masole a Roma a tlhasele Jerusalema. Mephato ya masole e e neng e eteletswe pele ke Cestius Gallus e ne ya simolola go senya lobota lwa tempele; mme ka tshoganyetso masole ano a ne a boela morago. Bakeresete ba ba ikanyegang ba ne ba bona eno e le tshono ya gore ba falole tshenyego e Jesu a neng a boleletse pele ka yone, mme ka jalo ba tshabela kwa dithabeng. Mephato ya masole a Roma e ne ya boa ka 70 C.E. Mo lekgetlhong leno ga e a ka ya tlhola e boela morago, mme Jerusalema e ne ya senngwa gotlhelele. Bakeresete ba ba neng ba tsere tlhagiso ya ga Jesu tsia ba ne ba falola masetlapelo ao a magolo.—Luke 19:41-44.

20. Ke ka ntlha yang fa re ka ikanya Jehofa gore ke “Mofalotsi” wa rona?

²⁰ Go akanya ka dilo tse di bontshang gore Jehofa o thusa batho ba gagwe, go nonotsha tumelo. Se a se dirileng mo nakong e e fetileng se dira gore re mo ikanye. Go sa kgathalesege dikgwetlho tse re ka tswang re lebane le tsone gone jaanong kgotsa tse re sa ntseng re tla lebana le tsone mo isagweng, le rona re ka ikanya Jehofa ka pelo yotlhe gore ke “Mofalotsi” wa rona. Mme Jehofa a ka re falotsa jang? Go tweng ka batho ba ba umakilweng kwa tshimologong ya setlhogo seno? Go ile ga felela jang ka bone? A re boneng mo setlhogong se se latelang.

A o A Gakologelwa?

• Pesalema 70 e dira gore re tlhomamisege ka eng?

• Dafide o ne a nonotshiwa jang fa a ne a lwala?

• Ke dikai dife tse di bontshang gore Jehofa a ka kgona go namola batho ba gagwe mo baganetsing?

[Dipotso Tsa Thuto]

[Setshwantsho mo go tsebe 6]

Jehofa o ne a araba thapelo ya ga Hesekia