Se Boikokobetso Jwa ga Jehofa bo se Kayang mo go Rona

DAFIDE ke mongwe wa banna ba ba ileng ba lebana le mathata. O ne a bogisiwa ke mogwagadiagwe yo o lefufa, e bong Kgosi Saulo. Saulo o ne a leka ka makgetlo a le mararo go bolaya Dafide ka lerumo mme o ne a fetsa dingwaga a mo tsoma a sa kgaotse, a dira gore e nne motshabi. (1 Samuele 18:11; 19:10; 26:20) Le fa go ntse jalo, Jehofa o ne a sireletsa Dafide. Jehofa o ne a mo falotsa mo go Saulo le mo babeng ba bangwe. Ka gone, re kgona go lemoga lebaka la go bo Dafide a ile a opela jaana: “Jehofa ke lefika la me le legolo le kago ya me e e thata le Mofalotsi wa me. O [Jehofa] tla nnaya thebe ya gago ya poloko, mme boikokobetso jwa gago ke jone bo ntirang mogolo.” (2 Samuele 22:2, 36) Dafide o ne a nna mongwe wa batho ba bagolo mo Iseraele. Jaanong boikokobetso jwa ga Jehofa bo tsena jang mo kgannyeng eno?

Fa Dikwalo di re Jehofa o boikokobetso, ga di reye gore o na le sengwe se a tlhaelang mo go sone kgotsa gore go na le bangwe ba a ba ikobelang. Go na le moo, nonofo eno e e molemo e bontsha gore o pelonomi thata mo bathong ba ka bopeloephepa ba lekang ka natla go dira gore a ba amogele mme o ba bontsha kutlwelobotlhoko. Pesalema 113:6, 7, ya re: “[Jehofa] o a ikokobetsa gore a lebe legodimo le lefatshe, o tsholetsa motho wa maemo a a kwa tlase go tswa mo loroleng.” Go “ikokobetsa” ga gagwe go raya gore “o inamela kwa tlase go bona” kgotsa “o a ikokobetsa gore a lebe.” (Today’s English Version; Young’s Literal Translation of the Holy Bible) Ka gone Jehofa o ne a ‘inamela kwa tlase,’ kgotsa ‘a ikokobetsa’ go tswa kwa legodimong gore a reetse Dafide, monna yo o sa itekanelang mme gone a le boikokobetso e bile a eletsa go direla Modimo. Ka ntlha ya seo, Dafide o re tlhomamisetsa jaana: “Jehofa o kwa godimo, mme le fa go ntse jalo o bona yo o ikokobeditseng.” (Pesalema 138:6) Tsela e e supang kutlwelobotlhoko, bopelotelele le bopelonomi e Jehofa a neng a dirisana le Dafide ka yone, e tshwanetse ya kgothatsa batho botlhe ba ba batlang go dira thato ya Modimo.

Le fa gone Molaodimogolo Jehofa a na le maemo a a kwa godimo go gaisa mo lobopong, o iketleeditse go dirisana le mongwe le mongwe wa rona. Seno se dira gore re nne le tshepo ya gore re ka ikaega ka ene gore a re thuse le fa re ka tswa re le mo maemong a a boima thata. Ga re a  tshwanela go boifa gore o tla re lebala. Malebana le batho ba gagwe ba Iseraele wa bogologolo, Jehofa o bolelwa sentle e le ‘yo o neng a ba gakologelwa ba le mo boemong jwa bone jo bo kwa tlase: gonne bopelonomi jwa gagwe jwa lorato ke jwa bosakhutleng.’—Pesalema 136:23.

Le rona jaaka batlhanka ba ga Jehofa ba segompieno, re ka nna ra lebana le mathata fela jaaka Dafide. Re ka nna ra bo re kgalwa ke batho ba ba sa itseng Modimo, kgotsa re itshoketse bolwetse kgotsa re tlhokafaletswe ke mongwe yo re mo ratang. Le fa maemo a rona e ka tswa e le a a ntseng jang, re ka rapela Jehofa ka bopeloephepa re mo kopa gore a re utlwele botlhoko. Jehofa o tla ‘inamela kwa tlase’ gore a re ele tlhoko le go reetsa dithapelo tsa rona. Mopesalema o ne a tlhotlhelediwa go kwala jaana: “Matlho a ga Jehofa a mo basiaming, le ditsebe tsa gagwe di ntlheng ya go goa ga bone ba kopa thuso.” (Pesalema 34:15) A go akanya ka nonofo eno ya ga Jehofa e e rategang ya boikokobetso ga go go ame pelo?

[Setshwantsho mo go tsebe 30]

Jehofa o iketleeditse go reetsa dithapelo tsa rona gompieno, fela jaaka a ile a reetsa tsa ga Dafide