Ke Eng Se o Ka Ratang go se Botsa Modimo?

BATHO mo lefatsheng lotlhe ba na le dipotso tse di botlhokwa ka botshelo. A le wena o na le tsone? Batho ba le bantsi ba boditse bakaedi ba bone ba bodumedi dipotso mme ga ba ise ba bone dikarabo tse di kgotsofatsang. Bangwe ba ile ba akanya ka dipotso tseno ba le bosi. Ba bangwe ba ile ba rapela gore ba newe kaelo. A tota go a kgonega gore o bone dikarabo tse di tswang kwa Modimong mabapi le dikgang tse di go akabatsang? Dingwe tsa dipotso tse batho ba le bantsi ba reng ba ka rata go di botsa Modimo ke tseno.

Modimo, tota o mang?

Setso, bodumedi jwa batsadi, gongwe le dilo tse batho ba di tlhophang, di ama tsela e ba lebang Modimo ka yone. Batho bangwe ba bitsa Modimo ka leina lengwe; ba bangwe ba mmitsa Modimo fela. A tota go botlhokwa? A go na le Modimo a le mongwe fela wa boammaaruri yo o re itshenolelang a bo a re senolela leina la gagwe?

Ke ka ntlha yang fa go na le pogo e ntsi jaana?

Fa tsela e motho a tshelang ka yone e e botlhaswa kgotsa ya boitsholo jo bo sa siamang e dira gore a se ka a itekanela mo mmeleng kgotsa e dira gore a humanege, o ka nna a ngongorega. Mme o ka tswa a itse sentle gore ke eng se se dirang gore a boge.

Le fa go ntse jalo, batho ba bangwe ba bantsi ba boga thata mme e se bone ba ipakelang seo. Ba bangwe ba na le malwetse a a sa foleng. Ba bangwe ba na le mathata a magolo a go lebegang a ka se rarabologe a go bona mafelo a bonno le go fepa ba malapa a bone ka dijo tse di lekaneng. Batho ba le bantsi ba amiwa ke bokebekwa, ntwa, thubakanyo e e amang mongwe le mongwe, masetlapelo a tlholego kgotsa ga ba tshwarwe sentle ke batho ba ba nang le taolo.

Go a utlwala gore batho ba le bantsi ba botse jaana: ‘Ke ka ntlha yang fa maemo a a ntseng jalo a aname thata jaana? Ke ka ntlha yang fa Modimo a letlelela pogo?’

 Ke ka ntlha yang fa ke le fano? Bokao jwa botshelo ke eng?

Gantsi motho o botsa dipotso tseno fa a betilwe ke pelo ka gonne se a se dirang letsatsi le letsatsi se sa mo neye kgotsofalo ya mmatota—mme eo ke tsela e batho ba le bantsi ba ikutlwang ka yone. Batho ba bangwe ba ba dimilione ba dumela gore ka tsela nngwe botshelo jwa mongwe le mongwe bo laoletswe gale ke Modimo. A go ntse jalo? Fa e le gore ruri Modimo o na le maikaelelo mangwe a a kgethegileng ka wena, ga go na pelaelo gore o ka rata go a itse.

Mo dibukeng tsotlhe tse di leng teng mo lefatsheng, go na le e le nngwe e e ipolelang gore e tlhotlheleditswe ke Modimo. Jaaka o ne o ka lebelela gore go nne jalo ka molaetsa o ruri o tswang kwa Modimong o o yang kwa bathong botlhe, buka eno e teng ka dipuo tse dintsi go feta buka le fa e le efe e e kileng ya kwalwa. Ke Baebele e e Boitshepo. Mo go yone, Mmopi wa legodimo le lefatshe, Modimo ka boene, o a itshenola gore ke mang le gore leina la gagwe ke mang. A o itse leina la gagwe? A o itse gore Baebele ya re Modimo ke Motho yo o ntseng jang? A o itse gore ya re Modimo o batla gore o direng?

 [Motswedi wa Setshwantsho mo go tsebe 2]

COVER: Chad Ehlers/Index Stock Photography

[Motswedi wa Setshwantsho mo go tsebe 3]

Mountain: Chad Ehlers/Index Stock Photography