Bopelonomi Jwa Lorato bo Botlhokwa go le Kana Kang?

BAEBELE e bolela jaana: “Selo se se eletsegang mo mothong wa mo lefatsheng ke bopelonomi jwa gagwe jwa lorato.” (Diane 19:22) Ee, ditiro tsa bopelonomi tse di tlhotlhelediwang ke lorato di ratega tota. Le fa go ntse jalo, mo Baebeleng polelwana “bopelonomi jwa lorato,” e kaya bopelonomi jo bo theilweng mo kamanong e e setseng e le teng, e e tshwanang le e e nnileng teng ka ntlha ya tiro nngwe ya bopelonomi e e diretsweng motho yo mongwe mo nakong e e fetileng. Ka jalo, e akaretsa kgopolo ya go ikanyega.

Kgosi Jehoashe wa kwa Juda o ne a palelwa ke go bontsha nonofo e e eletsegang eno. O ne a tshwanetse go leboga mmamalomaagwe le malomaagwe e bong Jehoiada thata. Fa Jehoashe a ne a le kafa tlase ga ngwaga, mmaagwemogolo o ne a itira kgosigadi mme a bolaya bomorwarraagwe Jehoashe botlhe, ba e neng e le baruaboswa ba bogosi. Le fa go ntse jalo, ga a ka a kgona go bolaya Jehoashe yo mmotlana, ka gonne mmamalomaagwe le malomaagwe ba ne ba mo fitlhile. Gape ba ne ba mo ruta Molao wa Modimo. Fa Jehoashe a ne a le dingwaga di le supa, malomaagwe o ne a dirisa taolo ya gagwe ya go nna moperesiti yo mogolo go bolaya kgosigadi eno e e boikepo le go tlhoma Jehoashe mo setulong sa bogosi.—2 Ditiragalo 22:10–23:15.

Jehoashe yo mmotlana o ne a busa sentle go fitlha malomaagwe a swa, mme go tswa foo a simolola go obamela medingwana. Modimo o ne a roma Sekarea, yo e neng e le morwa Jehoiada, gore a ye go tlhagisa Jehoashe ka botlhanogi jwa gagwe. Jehoashe o ne a dira gore Sekarea a kgobotlediwe ka maje. A bo seo e ne e le go sa ikanyege jang ne mo lelapeng le le neng le mo diretse molemo o mogolo thata jaana!—2 Ditiragalo 24:17-21.

Baebele ya re: “Kgosi Jehoashe a se ka a gakologelwa bopelonomi jwa lorato jo [rraagwe Sekarea] a neng a bo mo diretse, mo a neng a bolaya morwawe.” Fa Sekarea a ne a tla tloga a swa, o ne a re: “E kete Jehofa a ka bona seno a bo a se batla.” Fela jaaka Sekarea a ne a buile, Jehoashe o ne a lwala thata mme a bolawa ke batlhanka ba gagwe.—2 Ditiragalo 24:17-25.

Mo boemong jwa go felela ka tsela e Kgosi Jehoashe a neng a felela ka yone, batho botlhe ba ba latelang kgakololo eno ba tla nna le isagwe e e itumedisang: “E kete bopelonomi jwa lorato le boammaaruri di ka se go tlogele. . . . Mme o tle o bone kamogelo . . . mo matlhong a Modimo le a motho wa mo lefatsheng.”—Diane 3:3, 4.