O Lalediwa ka Lorato

SELALELO SA MORENA, se Morena Jesu Keresete a neng a se tlhoma dingwaga di ka nna 2 000 tse di fetileng ga se tiragalo fela e e kgatlhang ya hisitori. Se ile sa ama batho thata fa e sa le se tlhongwa la ntlha. E re ka batho ba le bantsi ba ile ba tlhotlhelediwa ke se ba se badileng mo dipegong tsa Efangele malebana le se se neng sa direga mo bosigong joo, ba ile ba leka ka natla go keteka Selalelo sa Morena ka ditsela tse di farologaneng.

Go a utlwala go bo ba dira jalo ka gonne Jesu Keresete ka boene o ne a laela balatedi ba gagwe gore ba keteke tiragalo eno le gore ba e keteke ka metlha. O ne a ba raya a re: “Nnang lo dire seno e le go nkgopola.”—Luke 22:19; 1 Bakorintha 11:23-25.

Mme gone, motho o tshwanetse go tlhaloganya bokao jwa mokete ono sentle gore o tle o mo solegele molemo ka botlalo, go ya kafa bo tlhalosiwang ka teng mo Lefokong la Modimo, e leng Baebele. Mo godimo ga moo, go botlhokwa gore motho a itse gore Baebele ya reng malebana le gore mokete ono o tshwanetse go ketekwa leng le gore o ketekiwe jang.

E re ka Basupi ba ga Jehofa ba ikobela taelo ya ga Jesu, ba tla bo ba kokoane mo lefatsheng lotlhe mo maitseboeng a Laboraro, April 16, 2003, go ikgopotsa loso lwa ga Jesu. E tla bo e le nako ya gore ba sekaseke Dikwalo le go tsosolosa tumelo ya bone le lorato lo ba ratang Morena Jesu Keresete ka lone, yo o neng a re: “Modimo o ratile lefatshe mo go kalo mo a bileng a ntsha Morwawe yo o tsetsweng a le esi, gore mongwe le mongwe yo o dumelang mo go ene a se ka a senngwa mme a nne le botshelo jo bo sa khutleng.” (Johane 3:16) O lalediwa ka lorato gore o kopanele le bone mo maitseboeng ao gore le wena o nonotshe tumelo ya gago le lorato lo o ratang Jesu Keresete le Rraarona yo o kwa legodimong e bong Jehofa Modimo ka lone.