MOLAOMOTHEO WA BAEBELE: “Tlogelang go tlhobaela ka meya ya lona.”—Mathaio 6:25.

Seno se kaya eng? Jesu o ne a bua mafoko ao mo Therong ya gagwe ya kwa Thabeng. Go ya ka dikishinare nngwe ya Baebele, lefoko la Segerika le le ranotsweng e le “go tlhobaela,” le ka kaya “tsela ya tlholego e motho a tsibogelang ka yone go humanega, tlala le mathata a mangwe a letsatsi le letsatsi.” Gantsi go tlhobaela go akaretsa go tshwenyega ka dilo tse di ka diregang mo isagweng. Ke ga tlholego e bile go siame go tshwenyega ka dilo tse re di tlhokang le ka botsogo jwa batho ba re ba ratang. (Bafilipi 2:20) Mme gone, fa Jesu a ne a re: “Lo se ka le ka motlha lwa tlhobaela,” o ne a gakolola balatedi ba gagwe gore ba tile go tshwenyega go sa tlhokege—poifo e e feteletseng kaga dilo tse di ka diregang kamoso, e leng se se ka re amogang boitumelo gone jaanong.—Mathaio 6:31, 34.

A molaomotheo ono o mosola le gompieno? Go molemo gore re latele kgakololo eno ya ga Jesu. Goreng? Dibuka dingwe di tlhalosa gore fa batho ba tshwenyega ka tsela e e feteletseng, thulaganyo ya go bereka ga ditshika tsa bone e dira go feta selekanyo mme “boemo jono bo ka baka mathata a botsogo a a jaaka, ditlhagala tsa mo maleng, bolwetse jwa pelo le bolwetse jwa go hupelwa.”

Jesu o ne a ntsha lebaka leno le le molemo la go bo re tshwanetse go tila go tlhobaela go sa tlhokege: Ga go thuse. O ne a botsa jaana: “Ke mang wa lona yo ka go tlhobaela a ka oketsang lobaka lwa botshelo jwa gagwe ka kubita e le nngwe?” (Mathaio 6:27) Go tlhoma mogopolo mo matshwenyegong a rona go ka se oketse botshelo jwa rona le fa e le ka karolwana ya motsotswana fela, tota e bile go ka se bo tokafatse. Ntle le moo, gantsi dilo ga di nne maswe jaaka re ne re akantse. Mokwadi mongwe o ne a baya kgang eno jaana: “Go tshwenyega ka isagwe ga go thuse, e bile gantsi isagwe e nna botoka thata go feta kafa re neng re akantse ka teng.”

Re ka tila jang go tlhobaela? Sa ntlha, ikanye Modimo. Fa Modimo a kgona go naya dinonyane dijo le go kgabisa dithunya, a a ka se tlamele batho ba ba bayang kobamelo ya gagwe kwa pele mo matshelong a bone? (Mathaio 6:25, 26, 28-30) Sa bobedi, se ingamole tlhogo ka mathata a letsatsi le le latelang. Jesu o ne a re, “lo se ka le ka motlha lwa tlhobaela kaga letsatsi le le latelang, gonne letsatsi le le latelang le tla nna le ditlhobaelo tsa lone.” A ga o dumele gore “letsatsi lengwe le lengwe le lekanwe ke bosula jwa lone”?—Mathaio 6:34.

Fa re ikobela kgakololo eno ya ga Jesu e e botlhale, re tla tila go ikutlwisa botlhoko mo mmeleng. Mo godimo ga moo, re tla nna re ritibetse mo maikutlong e leng se Baebele e se bitsang “kagiso ya Modimo.”—Bafilipi 4:6, 7.