LEFOKO la Segerika le le ranotsweng e le “kara” mo Baebeleng ya Thanolo ya Lefatshe le Lesha le ne le dirisiwa fa go buiwa ka mefuta e e farologaneng ya dikara. (Dit. 8:28, 29, 38) Le fa go ntse jalo, ga go lebege monna yono wa Moethiopia a ne a palame kara e e neng e dirisiwa kwa ntweng kgotsa mo mabelong. Goreng re rialo?

Monna yono e ne e le modiredimogolo e bile o ne a tswa kgakala. Baebele e a re o ne “a na le taolo mo pusong ya ga Kandase, kgosigadi ya Baethiopia, e bile o ne a tlhokometse letlotlo lotlhe la gagwe.” (Dit. 8:27) Naga ya Ethiopia ya bogologolo e ne e akaretsa le naga e gone jaanong e bidiwang Sudan le dikarolo dingwe tsa Egypt. Go ka direga gore monna yono ga a ka a tsamaya ka kara e le nngwe fela go tswa kwa Ethiopia go ya kwa Jerusalema. Mme gone, ntle le pelaelo o ne a tshwere dithoto di le dintsi ka gonne loeto loo lo ne lo le loleele. Dikara dingwe tse batho ba neng ba di dirisa fa ba tsaya maeto ka nako eo, e ne e le dikara tse di nang le maoto a le manê tse di diretsweng moriti. Buka nngwe e e tlhalosang buka ya Baebele ya Ditiro e a re: “Dikara tseo di ne di kgona go pega dithoto di le dintsi e bile motho o ne a ka kgona go tsamaya ka yone sekgala se seleele.”

Monna yono o ne a bala fa Filipo a kopana le ene. Baebele e a re “Filipo o ne a taboga go bapa le [kara] mme a . . . utlwa [monna wa Moethiopia] a balela mekwalo ya ga moporofeti Isaia kwa godimo.” (Dit. 8:30) Dikara tse batho ba neng ba tsaya maeto ka tsone di ne di tsamaya ka bonya. Ke gone ka moo monna yoo a neng a kgona go bala a ntse a le mo go yone e bile Filipo a ileng a kgona go taboga go bapa le yone.

Monna yono “o ne a kopa Filipo gore a palame kara mme a nne le ene.” (Dit. 8:31) Fa motho a palame kara ya mabelo, o ne a ema ka maoto. Mme fa a palame e e tsamayang sekgala se seleele, o ne a nna fa fatshe. Ka jalo, monna wa Moethiopia le Filipo ba ne ba ka kgona go nna fa fatshe.

Ka ntlha ya se se tlhalosiwang mo go Ditiro kgaolo 8 le dintlha dingwe tsa hisitori, bosheng jaana dikgatiso tsa rona di tlhagisa moopafadiwa wa Moethiopia a palame kara e tona, e seng e nnye e e neng e dirisiwa kwa ntweng kgotsa mo mabelong.