MOLAO o ne o letla batho ba ga Jehofa gore ba ntshe ditlhabelo ka maeba le maphoi. Mo melaong e e buang ka ditlhabelo, mefuta eno e mebedi ya dinonyane ka metlha e umakiwa mmogo e bile motho o ne a ka ntsha maphoi kgotsa maeba. (Lefi. 1:14; 12:8; 14:30) Goreng seo se ne se le molemo? Ka gonne maeba a ne a sa nne teng ka metlha. Goreng?

Maeba a nna kwa Iseraele ka dikgwedi tse go leng mogote ka tsone. Ngwaga le ngwaga ka letlhabula a fudugela kwa borwa kwa dinageng tse di mogote, mme a boela kwa Iseraele ka dikgakologo. (Sefela 2:11, 12; Jer. 8:7) Seo se ne se raya gore fa go ne go le mariga kwa Iseraele, go ne go tla nna thata gore Baiseraele ba ntshe ditlhabelo ka maeba.

Maphoi one a ne a sa fuduge, ka jalo a ne a nna a le teng kwa Iseraele ngwaga otlhe. E bile batho ba ne ba kgona go rua maphoi. (Bapisa Johane 2:14, 16.) Go ya ka buka ya Bible Plants and Animals “mo metseng le mo metsaneng yotlhe kwa Palesetina go ne go ruilwe maphoi. Ntlo nngwe le nngwe e ne e na le serobi kgotsa phatlha mo loboteng, kwa dinonyane di neng di ka nna gone.”—Bapisa Isaia 60:8.

Ka jalo, fa Jehofa a ne a letla batho ba gagwe gore ba ntshe ditlhabelo ka dinonyane tse di neng di nna di le teng kwa Iseraele ngwaga otlhe, o ne a bontsha gore o a ba rata le gore o a ba akanyetsa.