Al-Khwarizmi o ne a kwala ka melemo ya go dirisa dinomoro tsa tesimale a bo a tlhalosa kafa go leng motlhofo ka gone go dirisa mofuta mongwe wa go rarabolola dipalo le go dira gore batho ba o tlwaele. O ne a tlhalosa mofuta oo mo bukeng ya gagwe ya The Book of Restoring and Balancing. Lefoko la Seesemane e leng algebra le tswa mo lereong al-jabr le le tlhagang mo setlhogong sa Searabia se se reng Kitab al-jabr wa’l-muqabala. Mokwadi mongwe wa dibuka tsa saense e bong Ehsan Masood a re algebra e tsewa e le “sedirisiwa sa botlhokwa thata sa dipalo se se tlhamilweng e bile se dumalana le saense ka sengwe le sengwe.” *

Mokwadi mongwe a re: “Bana ba bantsi ba ba tsenang sekolo se segolwane ba eletsa e kete [al-Khwarizmi] a ka bo a sa tlhama mofuta ono wa dipalo.” Le fa go ntse jalo,  al-Khwarizmi o ne a tlhalosa gore boikaelelo jwa gagwe e ne e le go tlhofofatsa dipalo tse di dirisiwang mo kgwebong, fa go kgaoganngwa boswa, fa go dirwa dipatlisiso le mo dilong tse dingwe.

Makgolo a dingwaga moragonyana, baitsedipalo ba kwa Bophirima go akaretsa Galileo le Fibonacci ba ne ba tlotla al-Khwarizmi ka gonne a ne a tlhalosa dipalo ka tsela e e utlwalang. Tsela e al-Khwarizmi a neng a tlhalosa dilo ka yone e dirile gore batho ba ithute mo go oketsegileng ka dipalo tsa algebra, arithmetic le trigonometry. Trigonometry e thusitse baithuti ba Botlhabagare gore ba kgone go bala matlhakore a khutlotharo le gore ba ithute tepodinaledi. *

Batho ba ba neng ba bala dibuka tsa ga al-Khwarizmi ba ne ba tlhama ditsela tse disha tsa go bala dipalo tsa tesimale le mefuta e mesha ya go bona bophara, bogodimo le boleele jwa sengwe. Bataki le baagi ba Botlhabagare ba ne ba dirisa mefuta eo ya dipalo e e neng e sa bolo go dirisiwa pele ga e dirisiwa ke batho ba kwa Bophirima ba ba neng ba e tlwaela ka nako ya Batlhabanelatumelo. Fa ba boela gae, ba ne ba dirisa kitso e Bamoseleme ba batshwarwa le batshabi ba ba rutegileng ba ba neileng yone.

Fa nako e ntse e tsamaya, dibuka tsa ga al-Khwarizmi di ne tsa ranolelwa mo Selatineng. Moitsedipalo wa Mo-Italy e bong Fibonacci (c. 1170-1250), yo gape a itsegeng ka Leonardo wa kwa Pisa, o ne a dira gore batho ba kwa Bophirima ba tlwaele dipalo tsa Hindu-Arabic. O ne a ithuta tsone fa a tsaya maeto kwa Mediterranean a bo a kwala ka tsone mo bukeng ya gagwe ya Book of Calculation.

Go tsere dingwaga gore batho ba tlhaloganye tsela e al-Khwarizmi a neng a tlhalosa dipalo ka yone. Mme gone jaanong mefuta eno ya dipalo e dirisiwa thata mo saenseng, mo thekenolojing, mo kgwebong le mo madirelong.