“Mo tshimologong Modimo o ne a bopa magodimo le lefatshe.”—Genesise 1:1.

SE BAEBELE E SE BUANG

Jaaka Genesise 1:1 e bua, Modimo o bopile lobopo, go akaretsa le lefatshe, mo nakong e e fetileng e e sa bolelwang—“mo tshimologong.” Saense ya bosheng e dumela gore lobopo lo nnile le tshimologo. Bosheng jaana baitsesaense ba ne ba fopholetsa gore lo ka tswa lo na le dingwaga di le dibilione di le 14.

Gape Baebele e tlhalosa “malatsi” a le marataro a popo. Le fa go ntse jalo, ga e re malatsi ano e ne e le a diura di le 24. (Genesise 1:31) Tota e bile Baebele e dirisa lefoko “letsatsi” go tlhalosa dipaka tse di farologaneng tsa nako. Ka sekai, e bitsa lobaka lotlhe lwa popo e re ke ‘letsatsi le Jehofa Modimo a neng a dira lefatshe le legodimo ka lone.’ (Genesise 2:4) Go bonala sentle gore “malatsi” ano a popo a tsere dingwaga di le diketekete.—Pesalema 90:4.

LEBAKA LA GO BO O TSHWANETSE GO ITSE

Dikgopolo tsa maaka tsa bangwe ba batho ba ba dumelang mo popong di ka dira gore o se ka wa tsaya Baebele tsia gotlhelele. Ka fa letlhakoreng le lengwe, fa e le gore tota Baebele e na le pego e e ka ikanngwang ka popo, o ka solegelwa molemo ke letlotlo la yone la “botlhale jo bo mosola.”—Diane 3:21.

“Modimo o ne a re: ‘A lefatshe le ntshe dibopiwa tse di tshelang go ya kafa mefuteng ya tsone.’” —Genesise 1:24.

SE BAEBELE E SE BUANG

Modimo ga a ka a dira ditshedi tse di sa raraanang a bo a dira gore di iphetogele go nna tse dingwe tse di raraaneng. Go na le moo, o bopile ‘mefuta’ e e raraaneng ya dimela le diphologolo e go tswa foo e ileng ya ata “kafa mefuteng ya tsone.” (Genesise 1:11, 21, 24) Thulaganyo eno, e e sa ntseng e tswelela le gompieno, e dirile gore lefatshe le tlale ka yone ‘mefuta’ ya ditshedi e Modimo a e bopileng kwa tshimologong.—Pesalema 89:11.

Baebele ga e tlhalose gore mo mofuteng mongwe wa setshedi go ka nna le e mengwe e le kana kang, e leng se se ka diregang fa diphologolo tsa mofuta mongwe di tsala mmogo di bo di fetoga go tsamaisana le tikologo ya tsone. Le fa bangwe ba tsaya seno e le mofuta mongwe wa go iphetogela ga ditshedi go nna tse dingwe, tota ga se dire gore go bopege mefuta e mesha ya ditshedi. Dipatlisiso tsa bosheng di dumalana le kgopolo ya gore mefuta ya kwa tshimologong ya dimela le diphologolo ga e a fetoga go le kalo mo lobakeng lo loleele lwa nako.

LEBAKA LA GO BO O TSHWANETSE GO ITSE

Tsela e Baebele e nepang ka yone fa e tlhalosa ‘mefuta’ ya ditshedi tsa kwa tshimologong e bontsha gore e ka ikanngwa le mo dilong tse dingwe, go akaretsa le mo hisitoring le mo boporofeting.

“Ke ne ka otlolola magodimo ka diatla tsa me.”—Isaia 45:12.

SE BAEBELE E SE BUANG

Modimo ke Motswedi wa maatla a a sa feleng kgotsa nonofo. (Jobe 37:23) Seno se botlhokwa ka gonne baitsesaense ba ithutile gore maatla a kgona go fetolwa go nna selo se se tshwaregang. Baebele ya re Modimo ke ene Motswedi wa “bogolo jwa maatla a a boitshegang” a a dirileng lobopo. (Isaia 40:26) Modimo o solofetsa gore o tla dirisa maatla a gagwe gore dilo tse a di bopileng di nne di le gone ka gonne Baebele e bua jaana malebana le letsatsi, ngwedi le dinaledi: “[Modimo] o dira gore di nne di tlhomame ka bosakhutleng.”—Pesalema 148:3-6.

LEBAKA LA GO BO O TSHWANETSE GO ITSE

Moithutadinaledi mongwe e bong Allan Sandage o kile a re, ‘Saense ga e kgone go araba dipotso tse di kwa teng teng. Ga e kgone go araba potso e e jaaka gore go tlile jang gore go nne le lobopo.’ Baebele ga e tlhalose popo fela ka tsela e e dumalanang le saense mme gape e araba dipotso tse saense e ka se kgoneng go di araba—tse di jaaka, Boikaelelo jwa Modimo ke eng ka lefatshe le batho? *