Mokgatlho wa Lefatshe Lotlhe wa Boitekanelo o ne wa re go hema mosi o o tswang mo dienjeneng tsa diesel “go baya batho mo kotsing ya go tshwarwa ke kankere ya makgwafo” gongwe le go tshwarwa ke kankere ya setlha.

Mmudula le di-spore tse di omeletseng tsa dimela tsa bogologolo tse di neng tsa fitlhelwa mo boalong jwa lewatle di supa gore mo Antarctica go kile ga bo go na le ditlhare tsa mokolane le ditlhare tse jaanong di bonwang fela mo mafelong a dikgwa tsa pula. Batho ba le bantsi ba dumela gore dingwaga di le dimilionemilione tse di fetileng, dipaka tsa mariga kwa Antarctica di ne di se bogale thata mme gantsi dilo “di ne di sa swe dikgapetla” e bile dithemperetšha kwa mafelong a a kwa borwa le a a kwa bokone di ne di sa farologane thata le tsa ekhweitha.

Pego e e gatisitsweng ka 2012 ke Lekgotla la Baruti ba Katoliki kwa Ireland e bontsha gore diperesente di le 87 tsa Bakatoliki ba ba botsoloditsweng mo nageng eno ba dumela gore baruti ba tshwanetse go letlelelwa go nyala; diperesente di le 77 di dumela gore basadi ba tshwanetse go letlelelwa go nna baruti.

Patlisiso nngwe ya melemo e e thibelang malaria e senotse gore kwa mafelong mangwe, gantsi melemo e ne e le ya boleng jo bo kwa tlase kgotsa e se ya mmatota, mo go neng go felela ka gore batho ba se ka ba bona kalafi e e lekaneng kgotsa gore ba se ka ba alafega gotlhelele. Kwa Borwabotlhaba jwa Asia go ne ga fitlhelwa gore diperesente di le 36 tsa melemo e e neng ya sekasekwa e ne e se ya mmatota, fela jaaka go ne go ntse ka diperesente di le 20 tsa melemo e e neng ya sekasekwa kwa dinageng tsa Afrika tse di kwa Borwa jwa Sahara.

Mo magareng a April 2012, badiredi ba puso ba ne ba itsise phatlalatsa letsatsi le go neng go sa bolawa ope mo go lone mme e le lekgetlho la ntlha seo se direga morago ga dingwaga di ka nna tharo kwa El Salvador. E re ka naga eno e aparetswe ke bokebekwa jwa batho ba ba dirisang diokobatsi, ka 2011 go ne ga bolawa batho ba le 69 mo go ba le 100 000—palo e e kwa godimo go di gaisa tsotlhe mo lefatsheng.