“Mongwe le mongwe yo o nnang a lebile mosadi mo a nnang le kgotelo ka ntlha ya gagwe, o setse a dirile boaka le ene mo pelong ya gagwe.”—Mathaio 5:28.

LEBAKA LA GO BO O TSHWANETSE GO ITSE

Gompieno ditshwantsho tse di hepisang di tlwaelegile go feta pele e bile go motlhofo go di bona go feta le fa e le leng pele. Fa o batla go itumedisa Modimo le go tshela botshelo jo bo itumetseng, o tshwanetse go itse gore Modimo o ikutlwa jang ka ditshwantsho tse di hepisang.

SE BAEBELE E SE BOLELANG

Baebele ga e bue ka tlhamalalo ka ditshwantsho tse di hepisang. Le fa go ntse jalo, go leba ditshwantsho tse di hepisang go kgatlhanong le melaometheo e mentsi ya Baebele.

Ka sekai, Baebele e neela tlhagiso e e utlwalang sentle ya gore fa monna yo o nyetseng ‘a nna a lebile mosadi’ yo a sa nyalanang le ene, ka go rialo a itetla gore a nne le keletso ya go tlhakanela dikobo le ene, seo se ka felela ka gore a dire boaka. Molaomotheo wa mafoko ano a Baebele o dira mo go mongwe le mongwe, a nyetse kgotsa a sa nyala, yo o “nnang a lebile” ditshwantsho tse di hepisang a na le keletso ya go dira boitsholo jo bo sa siamang jwa tlhakanelodikobo. Ruri boitshwaro jo bo ntseng jalo ga bo itumedise Modimo.

“Jalo, bolayang ditokololo tsa lona tsa mmele tse di . . . ka ga kgokafalo, boitshekologo, keletso ya tlhakanelodikobo, keletso e e utlwisang botlhoko, le keletso ya bopelotshetlha.”—Bakolosa 3:5.

SE BATHO BA SE BOLELANG

Babatlisisi bangwe ga ba dumele gore ditshwantsho tse di hepisang di ka dira gore motho a dire ditiro tse di sa siamang tsa tlhakanelodikobo. Le fa go ntse jalo, a go lebelela ditshwantsho tse di hepisang ka bogone go phoso?

SE BAEBELE E SE BOLELANG

Baebele ya re “nyao e e ferosang sebete” ga e amogelesege e bile ga e a siama. (Baefeso 5:3, 4) Go ka tla jang gore go lebelela ditshwantsho tse di hepisang gone go se ka ga nna phoso? Gompieno ditshwantsho tse di hepisang gantsi di akaretsa ditshwantsho tse di rekotilweng tsa ditiro tsa mmatota tsa boaka, bosodoma le mefuta e mengwe ya kgokafalo. Eleruri go leba ditshwantsho tse di ntseng jalo tsa boitsholo jo bo sa siamang jwa tlhakanelodikobo go kgopisa Modimo go gaisa puo ya matlhapa.

Babatlisisi ba sa ntse ba ngangisana ka kgang ya gore a batho ba ka diragatsa dilo tse ba di akanyang tse di tlhotlheleditsweng ke go leba ditshwantsho tse di hepisang. Mme Baebele e dumalana sentle le kgang ya gore go lebelela ditshwantsho tse di hepisang ka bogone go senya kamano ya motho le Modimo e bile go kgopisa Modimo fela thata. Baebele e naya kgakololo eno: “Jalo, bolayang ditokololo tsa lona tsa mmele tse di . . . ka ga kgokafalo [le] keletso ya tlhakanelodikobo.” (Bakolosa 3:5) Batho ba ba lebelelang ditshwantsho tse di hepisang ba dira se se farologaneng thata le seo—go na le gore ba bolaye dikeletso tse di ntseng jalo, ba a di tlhotlheletsa le go di gakatsa.

“Batlang se se molemo, mme e seng se se bosula . . . Tlhoang se se bosula, mme lo rate se se molemo.”—Amose 5:14, 15.

SE BAEBELE E SE BOLELANG

Baebele e bua ka batho ba ba neng ba dira mefuta yotlhe ya tlhakanelodikobo e e sa siamang, le ba e neng e le matagwa le magodu, ba ba ileng ba kgona go tlogela mekgwa ya bone e e sa siamang. (1 Bakorintha 6:9-11) Jang? Ba ile ba ithuta go tlhoa se se bosula ka go dirisa botlhale jo bo fitlhelwang mo Lefokong la Modimo.

Go ka kgonega go ithuta go tlhoa ditshwantsho tse di hepisang ka go akanyetsa ka kelotlhoko ditlamorago tse di botlhoko tsa mokgwa ono o o kotsi. Patlisiso e e gatisitsweng bosheng ke Utah State University e bontshitse gore batho bangwe ba ba lebelelang ditshwantsho tse di hepisang ba “tshwenyega mo maikutlong, ba itlhaola mo bathong, ba felelwa ke kamano e e molemo le batho ba bangwe,” gape ba nna le ditlamorago tse dingwe tse di utlwisang botlhoko. Mo godimo ga moo, go lebelela ditshwantsho tse di hepisang go dira sengwe se se kotsi le go feta ka gonne, jaaka go tlhalositswe pelenyana, go kgopisa Modimo. Go tlhoboganya batho le Mmopi wa bone.

Baebele e ka re thusa go ithuta go rata se se siameng. Fa re ntse re bala Baebele, lorato lo re ratang melao ya yone ya boitsholo ka lone lo tla gola. Lorato loo lo tla re thusa gore re eme re nitame gore re se ka ra lebelela ditshwantsho tse di hepisang mme re ikutlwe fela jaaka mopesalema yo o neng a kwala mafoko ano: “Ga nkitla ke tlhoma selo se se se nang molemo wa sepe fa pele ga matlho a me.”—Pesalema 101:3.