Ditiragalo Tsa Lefatshe
“Mo e ka nnang halofo ya dikankere tse di lemogiwang kwa [United Kingdom] ngwaga le ngwaga—palogotlhe ya tse di fetang 130 000—di bakiwa ke dilo tse batho ba tlhophang go di dira mo botshelong mme ba ne ba ka kgona go di tila, tse di akaretsang go goga motsoko, go nwa le go ja dilo tse di sa siamang.”—BBC NEWS, BORITANE.
“Kgwebo e e raraaneng e e ntseng e oketsega ya go rekisiwa go go seng kafa molaong ga dikarolo tsa diphologolo tsa naga go go dirwang ka bokebekwa jo bo rulagantsweng [e] fedisa mefuta e e rategang thata mo lefatsheng ya diphologolo . . . ka selekanyo se se iseng se ko se direge pele.”—WILDLIFE CONSERVATION SOCIETY, U.S.A.
Batho ba ka kakaretso ba fetsang diura tse thataro ka letsatsi ba lebeletse thelebishene ba ka solofela go tshela dingwaga tse di kwa tlase ga tse di tshelwang ke ba ba sa lebeleleng thelebishene ka dingwaga di le 4,8. Ka mafoko a mangwe, ura nngwe le nngwe e mogolo a e fetsang a ntse fela a lebeletse thelebishene e fokotsa lobaka lo a ka lo tshelang ka metsotso e le 22.—BRITISH JOURNAL OF SPORTS MEDICINE, BORITANE.
Kwa Jeremane, diperesente di feta 90 tsa basadi ba go lemogilweng gore bana ba bone ba ba iseng ba tsholwe ba na le Down syndrome ba tlhopha go senya mpa.—DER TAGESSPIEGEL, JEREMANE.
Go Gatelelwa Maikutlo ka Ntlha ya Botshelo Jwa Toropo
Makasine wa kwa Poland o o bidiwang Przekrój wa re patlisiso e bontsha gore “fa batho ba ba nnang mo ditoropong tse dikgolo ba na le kgatelelo ya maikutlo, ba nna dikgoka go gaisa batho ba ba nnang kwa ditoropong tse dinnye.” Mieczysław Jaskulski yo e leng ngaka e e alafang malwetse a tlhaloganyo kwa Psychoeducation Laboratory ya kwa Warsaw o bolela gore “ditoropo tse dikgolo di na le dilo tse dintsi thata tse di bakang kgatelelo ya maikutlo. Batho ba ba nnang mo ditoropong ba mo kotsing ya go fekeediwa ke maikutlo a go tlhobaela go feta ba ba nnang mo metseselegaeng ka diperesente di le 21 mme ba ka nna le bolwetse jwa go fetofetoga maikutlo thata go ba feta ka diperesente di le 39.” Batho ba ba nnang kwa ditoropong ba ka kgona jang go lebana le seemo seno? Makasine wa Przekrój o akantsha gore “o se ka wa tenwa ke dilo tse o ka se kgoneng go di laola,” “o se ka wa tshwenyega ka tiro fa o setse o dule kwa tirong,” “tswa o ye go iphutholola maoto” mme “o se ka wa tshaba go tsaya malatsi a boikhutso.”
Facebook e Boloka Tshedimosetso e e Kana Kang?
Moithuti mongwe yo o ithutelang go nna ramolao kwa Austria o ne a batla go itse gore lefelo la go ikgolaganya le ditsala le le di gogang kwa pele mo lefatsheng lotlhe le ne le bolokile tshedimosetso e e kana kang ka ene dingwaga tsotlhe tse tharo tse a di feditseng e le leloko la lone, ka jalo o ne a kopa khopi ya tshedimosetso eno. Facebook e ile ya mo romelela CD e e nang le ditsebe di le 1 222 tsa tshedimosetso. Jaaka go begilwe mo lokwalodikgannyeng lwa kwa Jeremane lo lo bidiwang Der Tagesspiegel, moithuti yono o ne a re: “Go ne go bolokilwe sengwe le sengwe—molaetsa mongwe le mongwe, puisano nngwe le nngwe, go akaretsa le tshedimosetso e e masisi kaga ditsala.” Gape go ne go na le tshedimosetso e a neng a tlhomamisegile gore o e phimotse!
