Batho ba le Dimilionemilione Ba a Ya—A le Wena O a Ya?

▪ Ba ya kae? Kwa Kopanong ya Kgaolo ya Basupi ba ga Jehofa ya “Kgololo e Atametse!” Dikopano tseno di le makgolokgolo tsa malatsi a le mararo, tse di simolotseng kwa United States mo mafelo bekeng a bofelo a kgwedi ya May, di rulaganyeditswe go tshwarwa mo dikgweding di le dintsi tse di tlang mo ditoropong tse di farologaneng mo lefatsheng lotlhe. Mo ngwageng wa bosheng jaana, mo e ka nnang batho ba le dimilione di le 11 ba ne ba nna gone mo dikopanong tseno tsa malatsi a le mararo di le 2 981!

Mo mafelong a le mantsi thulaganyo e simolola ka 9:30 mo mosong ka pina. Ka Labotlhano, go tla neelwa dipuo tsa ditlhogo tse di reng, “Tsaya Tsia Ditsholofetso Tsa ga Jehofa Tsa Kgololo” le “Kafa Jehofa a Gololang ka Teng ‘Mohumanegi yo o Goang a Kopa Thuso.’” Puo ya setlhogo e e reng “Dithulaganyo Tsa ga Jehofa Tsa ‘Kgololo ya Bosakhutleng,’” e tla konela thulaganyo ya mo mosong.

Thulaganyo ya Labotlhano thapama e tla akaretsa dipuo tsa ditlhogo tse di reng, “Jehofa o Tlhokomela Batsofe ka Bonolo,” “Go Gololwa mo Masetlapelong a a Botlhoko,” le “Seabe sa Baengele mo go ‘Direleng Botlhe.’” Dipuo tse nnè tsa neeletsano tsa setlhogo se se reng, “Jehofa—‘Mofalotsi’” di tla tla pele ga puo ya bofelo e e reng, “Ga go Sebetsa Kgotsa Loleme lo lo Ganetsang lo lo Tla Atlegang.”

Thulaganyo ya Matlhatso mo mosong e tla akaretsa dipuo tse tharo tsa neeletsano tsa setlhogo se se reng, “Tswelelang mo Bodireding ‘lo sa Kgaotse,’” mmogo le dipuo tse di reng, “Go Gololwa mo Seraing sa Motshwaradinonyane” le “Go Tlhatlhoba ‘Dilo Tse di Boteng Tsa Modimo.’” Thulaganyo ya mo mosong e konela ka puo e morago ga yone go tla bong go kolobediwa ba ba tshwanelegang.

Dipuo tsa Matlhatso tsa thapama e tla bo e le tse di reng, “Leba Kalafi ka Tsela ya Dikwalo,” “Botshelo Jwa Gago bo Laolwa Thata ke Moya Ofe?,” “Dira Gore Lenyalo la Gago e Nne e Ntse E le La ‘Mogala o o Menaganeng Seraro,’” le “Basha, ‘Gakologelwang Mmopi wa Lona yo Mogolo Jaanong.’” Puo e e konelang e e reng, “A o Nna o Gopotse Letsatsi la ga Jehofa?,” e naya kgakololo e e mosola mo metlheng eno ya rona.

Thulaganyo ya Sontaga mo mosong e tla bo e na le dipuo tsa neeletsano tsa setlhogo se se reng, “Bogosi Jwa Magodimo bo Tshwana le . . . ” Dipuo tseno tse nnè di tlotla ka bokhutshwane ka ditshwantsho tsa ga Jesu.

Thulaganyo ya mo mosong e tla tswelela ka puo e e tla bong e rola sengwe se se ratwang thata kwa kopanong, e leng terama ya motlha wa Baebele e e theilweng mo kgaolong ya bo13 ya buka ya Baebele ya Dikgosi wa Ntlha. Thulaganyo ya bofelo ya kopano ka Sontaga thapama e tla bo e na le puo ya phatlalatsa e e reng, “Go Gololwa ke Bogosi Jwa Modimo go Atametse!”

Rulaganya dilo tsa gago gone jaanong gore o nne gone. Gore o bone lefelo le le gaufi le wena le kopano e tla bong e tshwaretswe kwa go lone, ikgolaganye le Holo ya Bogosi ya Basupi ba ga Jehofa e e mo lefelong la lona kgotsa o kwalele bagatisi ba makasine ono.