Ke ne Ke Ikemiseditse go Fitlhelela Mokgele wa Me

JAAKA GO BOLETSE MARTHA CHÁVEZ SERNA

Nako nngwe fa ke ne ke le dingwaga di le 16, ke ne ka idibala fa ke ntse ke bereka mo gae. Fa ke thanya, ke ne ka iphitlhela ke le mo bolaong. E re ka ke ne ke tlhakane tlhogo, e bile e opa thata, ke ne ka fetsa metsotso e se kae ke sa kgone go bona le fa e le go utlwa sepe. Ke ne ke tshogile tota. Go ne go diragetse eng ka nna?

ERE KA batsadi ba me ba ne ba tshwenyegile, ba ne ba nkisa kwa ngakeng mme ya nnaya dipilisi tsa dibitamene. O ne a re ke ile ka idibala ka go bo ke robala bosigo thata. Dikgwedi di se kae moragonyana, ke ne ka idibala gape ka makgetlho a le mabedi. Re ne ra ya kwa ngakeng e nngwe gape, e e neng e akanya gore ke ne ke na le mathata a go tshwenyega thata mo maikutlong mme ya mpha dipilisi tse di okobatsang bothata jono.

Le fa go ntse jalo, ke ne ka nna ke ntse ke idibala makgetlho a le mantsi. Ke ne ke a tle ke idibale mme ke bo ke gobala fa ke wa. Ka dinako tse dingwe ke ne ke itoma loleme le molomo. Fa ke thanya, gantsi ke ne ke opiwa ke tlhogo botlhoko thata ke bo ke feroga sebete. Mmele wa me otlhe o ne o nna botlhoko mme gantsi ke ne ke sa kgone go gakologelwa gore go ne go diragetse eng pele ga ke idibala. Gore ke siame gape, gantsi ke ne ke tshwanetse ke rapame mo bolaong letsatsi kgotsa a mabedi. Le fa go ntse jalo, ke ne ke dumela gore bothata jono e ne e le jwa nakwana fela—gore go ise go ye kae ke tla bo ke fodile.

Kafa go Ileng ga Ama Mekgele Ya me Ka Teng

Fa ke ne ke le mmotlana thata, lelapa la gaetsho le ile la simolola go ithuta Baebele le Basupi ba ga Jehofa. Batho ba ba neng ba re ruta e ne e le babulatsela ba babedi ba ba kgethegileng kgotsa badiredi ba nako e e tletseng ba ba dirisang diura di le dintsi kgwedi le kgwedi ba ruta ba bangwe boammaaruri jwa Baebele. Ke ne ke kgona go bona gore babulatsela bao ba itumelela bodiredi jwa bone. Fa ke ne ke ntse ke bua le morutabana wa me le bana ba ke tsenang sekolo le bone ka ditsholofetso tsa Baebele, le nna ke ne ka simolola go nna le boitumelo jo bo ntseng jalo.

Ka bonako morago ga foo, ba le bantsi ba losika lwa rona ba ne ba nna Basupi ba ga Jehofa. A bo ke ne ka itumelela go rera dikgang tse di molemo jang ne! Fa ke ne ke le dingwaga di le supa, ke ne ka ipeela mokgele wa gore le nna ke nne mmulatsela yo o kgethegileng. Fa ke ne ke le dingwaga di le 16, ke ne ka tsaya kgato e kgolo ya go fitlhelela mokgele oo ka go kolobediwa. Morago ga foo, ke ne ka simolola go nna le bothata jwa go idibala.

Tirelo ya Bobulatsela

Le mororo ke ne ke na le bothata jwa botsogo, ke ne ke sa ntse ke akanya gore nka nna modiredi wa nako e e tletseng wa Basupi ba ga Jehofa. Mme e re ka ke ne ke idibala mo e ka nnang gabedi ka beke, bangwe mo phuthegong ba ne ba akanya gore ga ke a tshwanela go amogela boikarabelo jo bo boima joo. Ke ne ka hutsafala ka bo ka kgobega marapo. Le fa go ntse jalo, fa nako e ntse e tsamaya, go ne ga tla banyalani bangwe ba ba neng ba direla kwa ofising ya lekala ya Basupi ba ga Jehofa ya kwa Mexico mo phuthegong ya rona. Fa ba utlwa gore ke batla go nna mmulatsela ba ne ba nkgothatsa thata. Ba ne ba dira gore ke bone gore bolwetse jwa me ga bo a tshwanela go nthibela go nna mmulatsela.

Ka jalo, ka September 1, 1988, ke ne ka tlhomiwa go nna mmulatsela wa ka metlha kwa motseng wa gaetsho kwa San Andrés Chiautla, kwa Mexico. Ke ne ke dirisa diura di le dintsi kgwedi nngwe le nngwe ke rera dikgang tse di molemo. Fa ke ne ke sa kgone go rera phatlalatsa ka ntlha ya go idibala, ke ne ke kwalela batho ba ba mo lefelong la rona makwalo a a buang ka dithuto  tsa Dikwalo mme ka tsela eo, ke ne ke kgona go ba kgothaletsa go ithuta Baebele.

Go Bolelelwa Bolwetse Jwa Me

Ka nako eno, batsadi ba me ba ile ba duela madi a mantsi go nkisa kwa ngakeng e e alafang malwetse a boboko. Ngaka eno e ne ya re ke tshwerwe ke bolwetse jwa mototwane. Ka ntlha ya kalafi e ke neng ka e fiwa ka nako eo, bolwetse jwa me bo ne jwa okobala sebaka sa dingwaga di ka nna nnè. Mo go yone nako eo, ke ne ka kgona go ya kwa Sekolong sa Tirelo sa Bobulatsela, kwa ke neng ka bona kgothatso e e neng ya oketsa keletso ya me ya go ya go direla kwa go tlhokegang baboledi ba ba oketsegileng gone.

Batsadi ba me ba ne ba itse kafa ke neng ke eletsa thata ka gone go oketsa tirelo ya me. E re ka bolwetse jwa me bo ne bo laolesega go se kae, ba ne ba ntetla go ya kwa Zitácuaro kwa Kgaolong ya Michoacán, e e dikilometara di le 200 go tswa kwa gae. Go tsalana le babulatsela ba bangwe kwa kabelong eo go ile ga nthusa gore ke anaanele tirelo ya nako e e tletseng le go feta.

Le fa go ntse jalo, morago ga dingwaga di le pedi kwa Zitácuaro, ke ne ka simolola gape go idibala. Ke ne ka boela kwa lelapeng la batsadi ba me, ke kgobegile marapo, ke hutsafetse e bile ke tlhoka kalafi. Ke ne ka ya kwa ngakeng e e alafang malwetse a boboko e e neng ya lemoga gore kalafi e ke neng ke e dirisa e ne e senya sebete sa me. Ke ne ka simolola go batla kalafi e nngwe, ka gonne re ne re sa kgone go duela ngaka. Bolwetse jwa me bo ne bo etegela mme ke ne ka tshwanelwa ke go tlogela bobulatsela. Nako le nako fa ke idibala e ne e nna poelomorago. Mme e ne ya re fa ke bala Dipesalema ke bo ke rapela Jehofa, ke ne ke utlwa kafa a nkgomotsang le go nnonotsha ka teng.—Pesalema 94:17-19.

Ke ne Ka Fitlhelela Mokgele wa Me

Ka nako ya fa seemo sa me se ne se le maswe thata, ke ne ke idibala gabedi ka letsatsi. Mme morago ga foo dilo di ne tsa fetoga. Ngaka nngwe e ne ya nnaya kalafi e e kgethegileng ya bolwetse jwa mototwane mme ke ne ka simolola go ikutlwa botoka nako e telele. Ka jalo ka September 1, 1995, ke ne ka simolola gape tirelo ya bobulatsela. Botsogo jwa me bo ne jwa nna bo sa fetoge, ka jalo morago ga dingwaga di le pedi go sena letsatsi lepe le ke kileng ka idibala ka lone, ke ne ka dira kopo ya go nna mmulatsela yo o kgethegileng. Seo se ne se raya gore ke tla bereka nako e e oketsegileng mo bodireding le gore ke tla ya go direla gongwe le gongwe kwa go nnang le tlhokego gone. Akanya fela gore ke ne ka ikutlwa jang fa ke itsisiwe gore ke mmulatsela yo o kgethegileng! Ke ne ka fitlhelela mokgele o ke neng ke o ipeetse fa ke ne ke sa le ngwana.

Ka April 1, 2001, ke ne ka simolola kabelo e ntšha kwa motsaneng mongwe wa dithaba wa Hidalgo State. Gone jaanong ke dira tiro ya go rera mo torotswaneng nngwe ya Guanajuato State. Ke tshwanetse go nna kelotlhoko gore ke nwa melemo ya me ka metlha le gore ke ikhutsa sentle. Ke kelotlhoko thata ka dijo tse ke di jang, segolobogolo fa go tla mo dilong tse di mafura, khafeine le dijo tsa dithini. Mme gape, ke leka go laola maikutlo a me, jaaka go dira gore ke se ka ka galefa kgotsa gore ke se ka ka tshwenyega thata. Mme go latela ditekanyetso tse di gagametseng jaana go ile ga ntsholegela molemo thata. Ka nako ya fa ke ne ke le mmulatsela yo o kgethegileng, ke ne ka idibala gangwe fela.

E re ka ke sa nyalwa mme ke sena maikarabelo a lelapa, ke itumelela go tswelela pele ke le mmulatsela yo o kgethegileng. Ke gomodiwa ke go itse gore ‘Jehofa ga a tshiamololo mo a ka lebalang tiro ya rona le lorato lwa rona lo re lo bontshitseng leina la gagwe.’ O lorato tota, ka gonne ga a lebelela gore re mo direle dilo tse re ka se kang ra kgona go di dira! Go amogela boammaaruri go nthusitse gore ke kgone go akanyetsa dilo sentle, ka gonne fa botsogo jo bo bokoa bo ka mpateletsa gore ke tlogele gape go nna mmulatsela, ke a itse gore Jehofa o sa ntse a tla itumedisiwa ke go bo ke mo diretse ka moya otlhe.—Bahebera 6:10; Bakolosa 3:23.

Ga go pelaelo gore, go bolelela ba bangwe ka dilo tse ke di dumelang letsatsi le letsatsi go a nnonotsha. Mme gape go nthusa gore ke nne ke akantse thata ka masego a Modimo a tla re a nayang mo isagweng. Baebele e solofetsa gore mo lefatsheng le lesha, go tla bo go se na bolwetse, “le khutsafalo le fa e le botlhoko di tla bo di sa tlhole di le gone. Dilo tsa pele di [tla bo di ] fetile.”—Tshenolo 21:3, 4; Isaia 33:24; 2 Petere 3:13.

[Ditshwantsho mo go tsebe 14]

Ke na le dingwaga di ka nna 7 (fa godimo); ke le dingwaga di ka nna 16, moragonyana fela fa ke sena go kolobediwa

[Setshwantsho mo go tsebe 15]

Ke rera ke na le tsala ya me