KA August 15-18, 1963, makgolokgolo a baboledi ba Indonesia le baeti ba le 122, ba ne ba tla kopanong kwa toropong ya Bandung, Java Bophirima. E ne e le kopano ya ntlha ya boditšhabatšhaba kwa Indonesia ya setlhogo se se reng, “Dikgang Tse di Molemo Tsa Bosakhutleng.”

Bakaulengwe ba ne ba lebana le dikgoreletsi tse dintsi fa ba baakanyetsa kopano eo. Lefelo le kopano e neng e tla tshwarelwa mo go lone le ne la tshwanelwa ke go fetolwa gararo ka ntlha ya mekete ya Letsatsi la Boipuso. Go tlhatloga ga ditlhwatlhwa go ne ga dira gore balaodi ba oketse madi a dipalangwa thata, ka jalo batlakopanong ba ne ba tshwanelwa ke go batla ditsela tse dingwe tsa go ya kopanong. Mokaulengwe mongwe o ne a tsamaya mosepele wa malatsi a le marataro ka dinao. Batlakopanong ba le 70 go tswa Sulawesi, ba ne ba tsamaya malatsi a le matlhano ba tletse ka dikepe.

Kwa kopanong, Ba-Indonesia ba ne ba itumeletse go bona bakaulengwe le bokgaitsadi ba bone ba ba tswang kwa dinageng tse dingwe, go akaretsa maloko a mabedi a Setlhopha se se Laolang, e bong Frederick Franz le Grant Suiter. Motlakopanong mongwe o ne a re: “Bakaulengwe ba itumetse; ba nna fela ba tshega e bile ba nyenya.”

Batho ba feta 750 ba ne ba nna gone kwa kopanong mme ga kolobediwa ba le 34. Ronald Jacka o ne a re: “Kopano eno e e sa lebalesegeng e ne ya tlhotlheletsa ba ba neng ba kgatlhegela boammaaruri gore ba tseye kgato. Gape e ne ya tlhotlheletsa bakaulengwe ba Indonesia gore ba tlhagafalele tiro ya Modimo.”