Fa bakaulengwe ba kwa ofising ya lekala ba sena go utlwa gore tiro e thibetswe, ba ne ba simolola go rulaganya dilo. Ronald Jacka a re: “Re ne ra fitlha direkoto tsa botlhokwatlhokwa, dikgatiso le madi a lekala mo mafelong a a farologaneng mo Jakarta. Go tswa foo, re ne ra fudusa ofisi ya lekala re bo re rekisa dikago mo sephiring.”

Bakaulengwe ba le bantsi ba ne ba nna ba tlhagafetse e bile ba sa boife sepe. Ba ne ba kile ba itshokela maemo a a masisi pele ga tiro e thibelwa, mme ba ile ba tswelela ba ikantse Jehofa. Le fa go ntse jalo, bakaulengwe ba bangwe ba ne ba itebala. Bagolwane ba le mmalwa ba ne ba tsenwa ke letshogo ba bo ba saena tumalano ya gore ba tla kgaotsa go rera. Ba bangwe ba ne ba ntsha maina a maloko mangwe a phuthego. Ofisi ya lekala e ne ya romela bakaulengwe ba ba nonofileng mo tumelong go ya go kgothatsa diphuthego le go thusa ba ba neng ba ineela. John Booth, wa Setlhopha se se Laolang, le ene o ne a etela kwa Indonesia go ya go ba gakolola jaaka rre a ka gakolola bana ba gagwe.

Go ne go bonala sentle gore Jehofa, Modisa yo Mogolo, o ne a nonotsha le go kgothatsa batho ba gagwe. (Esek. 34:15) Bagolwane ba ne ba simolola go tshwara thipa ka fa bogaleng mme baboledi ba tla ka ditsela tse dingwe tsa go rera ka botlhale. (Math. 10:16) Bakaulengwe ba le bantsi ba ile ba reka Dibaebele tse di tlhwatlhwatlase kwa Mokgatlhong wa Baebele wa Indonesia. Ba ne ba di dirisa ka botlhale mo tirong ya go rera. Basupi ba bangwe ba ne ba naya batho ba ba kgatlhegang dikgatiso ba ntshitse tsebe e e bontshang gore bagatisi ke bomang. Babulatsela ba le bantsi ba ne ba rera ba itirile e kete ba a rekisa, fela jaaka go ne go dirwa ka nako ya puso ya Bajapane.

Ka 1977, ba Lefapha la Merero ya Tsa Bodumedi ba ne ba tla ka tsela e nngwe ya go tlhasela Basupi—ka go gana go naya barongwa tetla ya go tswelela ba nna mo nageng. Barongwa ba le bantsi ba ne ba romelwa kwa dinageng tse dingwe. * Morongwa mongwe e bong Norbert Häusler, yo o neng a direla le mosadi wa gagwe Margarete kwa Manado, Sulawesi Bokone, o ne a re: “Bakaulengwe le bokgaitsadi ba le bantsi ba ne ba tla go re laela kwa boemafofaneng. Fa re ntse re palama ditepisi tsa sefofane re ne ra leba kwa morago mme ra ba bona ba tsholeditse diatla ba re laela e bile ba goa ka lentswe le le lengwe ba re, ‘Re a leboga. Re lebogela go bo lo nnile le rona fano.’ Re na ra thubega ka selelo fa re tsena mo sefofaneng.”

Fa dikgang tsa gore tiro e thibetswe di anama mo nageng yotlhe, Komiti ya Dikereke Tsa Indonesia e ne ya laela maloko a yone gore sengwe le sengwe se Basupi ba se dirang se begelwe balaodi. Seno se ne sa dira gore Basupi ba le bantsi ba tshwarwe le go botsolodiwa mo ditlhaketlhakeng di le dintsi.

Kwa Waingapu, mo setlhaketlhakeng sa Sumba, molaodi wa masole o ne a biletsa bakaulengwe ba le 23 kwa kampeng ya masole a bo a ba laela gore ba saene tumalano ya gore ba tlogela go nna Basupi. Fa bakaulengwe ba gana, molaodi o ne a ba laela gore ba boe letsatsi le le latelang—mosepele wa dikilometara di le 14 ka dinao.

Fa le tlhaba mo go le le latelang, ba ne ba goroga ba bo ba bidiwa ka bongwe ka bongwe go tla go saena tumalano eo. E ne e re fa mokaulengwe a gana go saena, masole a bo a mo itaya ka matlhaku a mitlwa. Masole a ne a itlhakanya tlhogo, a itaya bakaulengwe go fitlha ba idibala. Bakaulengwe ba bangwe bone ba ne ba ntse fela ba letetse go bidiwa. Kgabagare, mokaulengwe mongwe wa mosha e bong Mone Kele o ne a ya go kwala sengwe mo pampiring eo. Dipelo tsa bakaulengwe di ne tsa kotlomana fa ba bona seo mme molaodi ene ke fa e kete o tla tsenwa. Mone o ne a kwadile jaana: “Ke tlile go tswelela ke ntse ke le Mosupi wa ga Jehofa go ya go ile!” Ba ne ba mo itaya botlhoko mo a neng a felela a le kwa bookelong. Le fa Mone a ne a gobetse thata jalo, seno ga se a ka sa ama tumelo ya gagwe mo go Jehofa.

Molaodi o ne a leka ka malatsi a le 11 go dira gore bakaulengwe ba itatole tumelo ya bone. O ne a re ba tlhole mo letsatsing le le fisang la boboatsatsi. Gape a ba pateletsa go gogoba dikilometara di le mmalwa ka mangole le matsogo le go taboga sekgala se seleele ba rwele merwalo e e bokete. A bo a re ba obamele folaga a beile thipa e e tlhometsweng tlhobolo mo dithamong tsa bone; le fa go ntse jalo, ba lala ba padile. Ka jalo a ntsha taelo ya gore ba itewe le go feta.

Moso mongwe le mongwe bakaulengwe ba ne ba goga dinao go ya kampeng ba ipotsa gore ba a bo ba ya go tlhokofadiwa jang. Fa ba le mo tseleng ba ne ba rapela mmogo e bile ba kgothatsana gore ba tswelele ba ikanyega. Bosigo bongwe le bongwe, ba ne ba boela gae ba gobetse e bile ba kgamathetse madi, le fa go ntse jalo ba itumeletse gore ba ile ba ikanyega mo go Jehofa.

E rile ofisi ya lekala e utlwa gore bakaulengwe ba a bogisiwa, e ne ya romela makwalo kwa balaoding ba masole a Waingapu, Timor, Bali, Jakarta le kwa balaodi ba bangwe ba puso. Molaodi wa masole a Waingapu o ne a tlhabisiwa ditlhong ke gore ditiro tsa gagwe tse di bosula di phasaladitswe mo Indonesia, ka jalo a emisa go bogisa bakaulengwe.

Mo dingwageng tse di neng tsa latela, Basupi ba le bantsi kwa Indonesia ba ne ba tshwarwa, ba botsolodiwa le go tlhokofadiwa. Morongwa mongwe e bong Bill Perrie, a re: “Bakaulengwe bangwe mo kgaolong nngwe ba ne ba itewa mo ba neng ba sala ba se na meno a a kwa pele. Fa ba kopana le mokaulengwe yo o nang le meno a a kwa pele ba ne ba dira metlae ka go mmotsa jaana, ‘A o mosha mo boammaaruring? Kgotsa o ntse o itatola tumelo?’ Le fa ba ne ba lebane le diteko, ba ne ba nna ba itumetse e bile ba tlhagafaletse go direla Jehofa.”

Mo lobakeng lwa dingwaga di le 13, Basupi ba le 93 ba ne ba tsenngwa mo kgolegelong dikgwedi di le pedi go ya go dingwaga di le nnè. Go bogisiwa ka tsela eno go ne ga ba thusa go nna ba ikemiseditse go tswelela ba ikanyega mo go Jehofa. Morago ga go fetsa dikgwedi di le robedi mo kgolegelong, Musa Rade o ne a etela bakaulengwe mo kgaolong ya gagwe go ba kgothatsa gore ba tswelele ba rera. O ne a re: “Go nna mo kgolegelong go nthutile go ikaega ka Jehofa le go feta e bile go nonotshitse kamano ya me le ene.” Ka gone, batho ba le bantsi ba ne ba re: “Basupi ba ga Jehofa ba tshwana le dipekere. Fa o di kokotela thata, di tsenelela kwa teng.”