Baobamedi ba boammaaruri mo nageng eno ba ne ba le mo kotsing mme go ne go le botlhokwa gore batlhanka ba ga Jehofa ba ba ikanyegang ba tswelele ba bona dikgatiso le fa tiro e thibetswe. Ka nako eo, bakaulengwe ba le bantsi ba ne ba tshwarwa ba bo ba atlholelwa dingwaga tse dintsi mo kgolegelong.

Juanita Borges o ne a re: “Ke ne ke itse sentle fa ke ithuta boammaaruri ka 1953 gore ke ne ke le mo kotsing ya go ya kgolegelong ka go bo ke le Mosupi wa ga Jehofa. Mme go diragetse fela jalo. Ka November 1958, fa ke etetse Kgaitsadi Eneida Suárez, mapodise a a direlang mo sephiring a ne a tla go re latofatsa ka go re re tshwere pokano. Re ne ra tswalelwa dikgwedi di le tharo mo kgolegelong mme ra duedisiwa di-peso di le 100 e le madi a kotlhao, madi a a neng a le mantsi tota ka nako eo.”

Puso e ne ya dira sotlhe se e ka se kgonang go thibela Basupi go kopana mmogo mme seno ga se a ka sa kgoba  bakaulengwe marapo. Ba ne ba tshwanetse go nna “botlhajana jaaka dinoga mme le fa go ntse jalo [ba] le ba ba se nang molato jaaka maphoi.” (Math. 10:16) Andrea Almánzar o gopola jaana: “Fa re ya dipokanong, re ne re tshwanetse go goroga ka dinako tse di sa tshwaneng. Gantsi re ne re pateletsega go tsamaya bosigo thata gore re se ka ra tsosa dipelaelo dipe.”

Jeremías Glass, yo o tshotsweng fa rragwe e bong León a le kwa kgolegelong, o ne a nna mmoledi ka 1957 a le dingwaga di le supa. O gakologelwa dipokano tse di neng di tshwarelwa mo sephiring kwa gabone le dilo tse ba neng ba sa tshwanela go di dira gore ba se ka ba bonwa. Jeremías a re: “Botlhe ba ba neng ba le gone ba ne ba newa dikarata di na le dinomoro tse di ba kaelang gore ba tshwanetse go tsamaya jang morago ga dipokano. Fa dipokano di tswa, rre o ne a re ke eme fa kgorong gore ke kaele batho go tsamaya ka bobedi ka bobedi go ya ka dinomoro tsa bone mme ba tswe ka ditsela tse di farologaneng.”

Sengwe gape se re neng re tlhoka go nna kelotlhoko ka sone e ne e le nako e re tshwarang dipokano ka yone. Ka sekai, Mercedes García o rutilwe boammaaruri ke malomaagwe e bong Pablo González. Mercedes o ne a tlhokafalelwa ke mmagwe a le dingwaga di le supa fa rragwe a ne a tshwerwe mme ene le bomogolowe le bomonnawe ba le robongwe ba sala ba le bosi. Mercedes o ne a kolobediwa ka 1959 a le dingwaga di le robongwe. Bakaulengwe ba ne ba tshwara puo ya kolobetso ka makuku gore ba se ka ba bonwa ke ope. Puo e ne e tshwaretswe kwa ntlong ya mokaulengwe mongwe mme kolobetso e ne ya nna kwa Ozama River, noka e e kgabaganyang toropokgolo. Mercedes a re: “Re ne ra boela gae ka masa fa batho bone ba tsoga.”