Moreri 3:1-22
3 Sengwe le sengwe se na le nako ya sone,Nako ya tiro nngwe le nngwe mo lefatsheng:
2 Nako ya go tsholwa le nako ya go swa;Nako ya go jala le nako ya go kumola se se neng se jetswe;
3 Nako ya go bolaya le nako ya go boloka;*Nako ya go rutlolola le nako ya go aga;
4 Nako ya go lela le nako ya go tshega;Nako ya go hutsafala le nako ya go bina;*
5 Nako ya go latlha maje le nako ya go kokoanya maje;Nako ya go tlamparela le nako ya go tlogela go tlamparela;
6 Nako ya go batla le nako ya go tlhoboga selo gore se latlhegile;Nako ya go boloka le nako ya go latlha;
7 Nako ya go gagoganya+ le nako ya go rokaganya;Nako ya go didimala+ le nako ya go bua;+
8 Nako ya go rata le nako ya go tlhoa;+Nako ya ntwa le nako ya kagiso.
9 Modiri o boelwa ke eng mo matsapeng otlhe a a a tsayang?+
10 Ke bone tiro e Modimo a e neileng bomorwa batho gore ba nne ba tshwaregile.
11 O dirile sengwe le sengwe se le sentle* mo motlheng wa sone.+ Tota e bile o dirile gore ba nne le keletso ya go tshelela ruri;* le fa go ntse jalo, le ka motlha batho ga ba kitla ba itse ka botlalo tiro e Modimo wa boammaaruri a e dirileng go tloga kwa tshimologong go ya kwa bokhutlong.
12 Ke ne ka swetsa ka gore ga go na sepe se se botoka mo go bone fa e se gore ba itumele ba bo ba dire molemo fa ba sa ntse ba tshela,+
13 le gore mongwe le mongwe a je, a nwe a bo a itumelele tiro yotlhe ya gagwe ya bonatla. Ke mpho ya Modimo.+
14 Ke ne ka lemoga gore sengwe le sengwe se Modimo wa boammaaruri a se dirang se tla nnela ruri. Ga se ka ke sa okediwa ka sepe e bile ga se ka ke sa fokodiwa. Modimo wa boammaaruri o dirile sengwe le sengwe jaana, gore batho ba tle ba mmoife.+
15 Sepe fela se se diregang se setse se diregile, e bile se se tla tlang se setse se le teng;+ mme Modimo wa boammaaruri o senka se se ntseng se latelelwa.*
16 Gape ke ne ka bona seno mo lefatsheng:* Mo boemong jwa tshiamiso go ne go na le bosula, le mo boemong jwa tshiamo go ne go na le bosula.+
17 Ka jalo, ke ne ka bua jaana mo pelong ya me: “Modimo wa boammaaruri o tla atlhola basiami mmogo le badirabosula,+ ka gonne tiragalo nngwe le nngwe le tiro nngwe le nngwe e na le nako ya yone.”
18 Gape ke ne ka bua mo pelong ya me ka ga bomorwa batho gore Modimo wa boammaaruri o tla ba leka a bo a ba bontsha gore ba tshwana le diphologolo,
19 gonne go na le phelelo ya batho le phelelo ya diphologolo; mme tsotlhe di na le phelelo e e tshwanang.+ Fela jaaka phologolo e swa, motho le ene o a swa; e bile tsotlhe di na le moya+ o le mongwe fela. Ka jalo, motho ga a na tlotlomalo epe go feta diphologolo, ka gonne sengwe le sengwe ke lefela.
20 Tsotlhe di ya kwa lefelong le le lengwe.+ Tsotlhe di tswa mo loroleng,+ mme tsotlhe di boela mo loroleng.+
21 Tota ke mang yo o itseng gore a moya wa batho o tlhatlogela kwa godimo, le gore a moya wa diphologolo o fologela kwa tlase mo mmung?+
22 Mme ke ne ka bona gore ga go na sepe se se botoka go na le gore motho a itumelele tiro ya gagwe,+ ka gonne eo ke tuelo* ya gagwe; gonne ke mang yo o ka dirang gore a bone se se tla diragalang fa a sena go swa?+
Dintlha Tse di Kwa Tlase
^ Seheb., “fodisa.”
^ Seheb., “go tlolaka.”
^ Kgotsa “se rulagane sentle; se siame; se tshwanela.”
^ Seheb., “o tsentse bosakhutleng mo pelong ya bone.”
^ Kgotsa gongwe “se se fetileng.”
^ Seheb., “ka fa tlase ga letsatsi.”
^ Kgotsa “kabelo.”
