Jeremia 32:1-44
32 Jehofa o ne a bua le Jeremia mo ngwageng wa bo10 wa puso ya ga Kgosi Sedekia wa Juda, e leng ngwaga wa bo18 wa puso ya ga Nebukadenesare.*+
2 Ka nako eo, masole a kgosi ya Babelona a ne a kampa go dikologa Jerusalema, mme moporofeti Jeremia o ne a tswaletswe mo Lolwapeng Lwa Badisa+ lo lo mo ntlong* ya kgosi ya Juda.
3 Gonne Kgosi Sedekia wa Juda o ne a mo tswaletse,+ a re, “Ke ka ntlha yang fa o porofeta jaana? Wa re, ‘Seno ke se Jehofa a se buang: “Ke tla tsenya motse ono mo seatleng sa kgosi ya Babelona, mme e tla o gapa,+
4 e bile Kgosi Sedekia wa Juda ga a kitla a falola Bakaladia, ka gonne ruri o tla tsenngwa mo seatleng sa kgosi ya Babelona, mme o tla bua le ene ba lebane difatlhego.”’+
5 ‘E tla isa Sedekia kwa Babelona, mme o tla tswelela a le koo go fitlha ke bona gore ke dira eng ka ene,’ go bua Jehofa. ‘Le fa gone lo tswelela lo lwa le Bakaladia, ga lo kitla lo atlega.’”+
6 Jeremia o ne a re: “Jehofa o buile le nna a re,
7 ‘Hanamele morwa Shalume rangwanaago o tla tla kwa go wena a bo a re: “Ithekele tshimo ya me e e kwa Anathothe,+ ka gonne ke wena wa ntlha yo o nang le tshwanelo ya go e rekolola.”’”+
8 Hanamele morwa rangwane o ne a tla kwa go nna ke le mo Lolwapeng Lwa Badisa, fela jaaka Jehofa a ne a buile, mme o ne a nthaya a re: “Tsweetswee, reka tshimo ya me e e kwa Anathothe, kwa lefatsheng la ga Benjamine, ka gonne o na le tshwanelo ya gore e nne ya gago le ya go e rekolola. E ithekele.” Foo ke ne ka lemoga gore e ne e le lefoko la ga Jehofa.
9 Ka jalo, ke ne ka reka tshimo kwa Anathothe mo go Hanamele morwa rangwane. Ke ne ka lekanya madi+ ke bo ke mo a naya, dishekele* di le supa le dishekele tsa selefera di le lesome.
10 Go tswa foo, ke ne ka kwala seno mo setlankaneng,+ ka se kana,* ka bitsa basupi+ ke bo ke lekanya madi mo dikaleng.
11 Ke ne ka tsaya setlankana sa theko, se se neng se kannwe go ya ka ditaelo le dilo tse di tlhokegang go ya ka molao, mmogo le se se neng se sa kanwa,
12 mme ke ne ka naya Baruke+ morwa Neria+ morwa Maseia setlankana sa theko fa pele ga ga Hanamele morwa rangwane, basupi ba ba kwadileng mo setlankaneng sa theko, le fa pele ga Bajuda botlhe ba ba neng ba ntse mo Lolwapeng Lwa Badisa.+
13 Jaanong ke ne ka laela Baruke jaana ba ntse ba le teng:
14 “Jehofa wa masomosomo, Modimo wa Iseraele, a re, ‘Tsaya ditlankana tseno, setlankana seno sa theko se se kannweng le setlankana se sengwe se se sa kanwang, mme o di tsenye mo nkgong, gore di tle di nne lobaka lo loleele.’
15 Gonne Jehofa wa masomosomo, Modimo wa Iseraele, a re, ‘Matlo le masimo le masimo a morara* a tla rekwa gape mo lefatsheng leno.’”+
16 Go tswa foo, fa ke sena go naya Baruke morwa Neria setlankana sa theko ke ne ka rapela Jehofa, ka re:
17 “Ao, Morena Molaodimogolo Jehofa! O dirile magodimo le lefatshe ka maatla a gago a magolo+ le ka lebogo la gago le le otlologileng. Ga go na sepe se se ka go palelang,
18 Wena yo o ratang diketekete ka lorato lo lo sa kgaotseng, le fa go ntse jalo, o otlhaela barwa molato wa borraabone,*+ Modimo wa boammaaruri, yo mogolo le yo o maatla, yo leina la gagwe e leng Jehofa wa masomosomo.
19 O na le maikaelelo* a magolo e bile ditiro tsa gago di dikgolo,+ wena yo matlho a gago a bonang ditsela tsotlhe tsa batho,+ gore o duele mongwe le mongwe go ya ka ditsela tsa gagwe le go ya ka se a se dirang.+
20 O ne wa dira ditshupo le dikgakgamatso kwa lefatsheng la Egepeto, tse di itsegeng go tla go fitlha mo letsatsing leno, mme ka ntlha ya seo o itiretse leina mo Iseraele le mo bathong,+ jaaka go ntse gompieno.
21 Mme o ne wa ntsha batho ba gago ba Iseraele kwa lefatsheng la Egepeto ka ditshupo, ka dikgakgamatso, ka seatla se se nonofileng, ka lebogo le le otlologileng le ka ditiro tse di boifisang.+
22 “Fa nako e ntse e tsamaya, o ne wa ba naya lefatshe leno le o neng o ikanne gore o tla le naya borraabonemogolo,+ lefatshe le le elelang mashi le tswina ya dinotshe.+
23 Mme ba ne ba tla mo go lone ba bo ba le rua, le fa go ntse jalo ga ba a ka ba ikobela lentswe la gago kgotsa ba tsamaya mo molaong wa gago. Ga ba a ka ba dira sepe se o neng o ba laetse gore ba se dire, mo o neng wa dira gore ba welwe ke masetlapelo ano otlhe.+
24 Batho ba dirile dithotana go dikologa motse gore ba o tlhasele,+ mme ka ntlha ya tšhaka,+ leuba le bolwetse jwa leroborobo,+ motse ono o tla tsenngwa mo diatleng tsa Bakaladia ba ba tlhabanang le one; sotlhe se o se buileng se diragetse, fela jaaka o bona.
25 Mme wena Morena Molaodimogolo Jehofa, o ntheile wa re, ‘Ithekele tshimo ka madi mme o bitse basupi,’ le fa gone motse ono o tlile go tsenngwa mo seatleng sa Bakaladia.”
26 Foo Jehofa o ne a raya Jeremia a re:
27 “Ke nna Jehofa, Modimo wa batho botlhe.* A go na le sengwe se se ka mpalelang?
28 Ka jalo, Jehofa a re, ‘Ke tsenya motse ono mo seatleng sa Bakaladia le mo seatleng sa ga Kgosi Nebukadenesare* wa Babelona, mme o tla o gapa.+
29 Mme Bakaladia ba ba tlhabanang le motse ono ba tla tla ba bo ba tshuba motse ono ka molelo, mme ba tla o fisa+ mmogo le matlo a batho ba neng ba ntshetsa Baale ditlhabelo mo marulelong a one le a ba neng ba tshelela medimo e mengwe ditlhabelo tsa senô mo go one gore ba nkgopise.’+
30 “‘Gonne batho ba Iseraele le ba Juda ba dirile se se bosula fela mo matlhong a me, go tloga bosheng jwa bone go ya pele;+ batho ba Iseraele ba nna ba nkgopisa ka dilo tse ba di dirang,’ go bua Jehofa.
31 ‘Gonne motse ono e ntse e le selo se se nkgopisang le se se nkgalefisang,+ go tloga ka letsatsi le ba o agileng ka lone go fitlha mo letsatsing leno, ke gone ka moo ke tshwanetseng go o tlosa fa pele ga sefatlhego sa me,+
32 ka ntlha ya bosula jotlhe jo batho ba Iseraele le ba Juda ba bo dirileng gore ba nkgopise: bone, dikgosi tsa bone,+ dikgosana tsa bone,+ baperesiti ba bone, baporofeti ba bone+ le batho ba Juda le banni ba Jerusalema.
33 Ba ne ba nna ba mphularela;*+ le fa gone ke ne ke leka go ba ruta gangwe le gape,* go ne go se na ope wa bone yo o reetsang gore a amogele kotlhao.+
34 Ba ne ba baya medingwana ya bone e e ferosang sebete mo ntlong e leina la me le leng mo go yone, gore ba e leswafatse.+
35 Mo godimo ga moo, ba ne ba dira gore Juda a leofe ka go aga mafelo a a kwa godimo a a boitshepo a ga Baale mo Mokgatšheng wa ga Morwa Hinoma,*+ gore ba tle ba fise bomorwaabone le bomorwadiabone mo molelong ba ntshetsa Moleke+ ditlhabelo, e leng sengwe se ke neng ke sa se ba laela,+ e bile ke ise nke ke akanye go dira selo se se ntseng jalo se se makgapha.’
36 “Ka jalo, seno ke se Jehofa, Modimo wa Iseraele a se buang ka motse ono o lo reng o tla tsenngwa mo seatleng sa kgosi ya Babelona ka tšhaka, ka leuba le ka bolwetse jwa leroborobo,
37 ‘Ke tla ba phutha mmogo ke ba ntsha kwa dinageng tsotlhe tse ke neng ke ba phatlalaleditse kwa go tsone ke galefile, ke shakgetse e bile ke gaketse thata,+ mme ke tla ba busetsa mo lefelong leno ke bo ke dira gore ba nne ka polokesego.+
38 Ba tla nna batho ba me, mme nna ke tla nna Modimo wa bone.+
39 Ke tla ba naya pelo e le nngwe+ le tsela e le nngwe gore ba tle ba mpoife ka metlha, gore bone le bana ba bone ba solegelwe molemo.+
40 E bile ke tla dira kgolagano le bone e e nnelang ruri,+ ya gore ga nkitla ke tlogela go ba direla molemo;+ mme ke tla dira gore dipelo tsa bone di mpoife, gore ba se ka ba ntlogela.+
41 Ke tla itumelela go ba direla molemo,+ e bile ke tla dira gore ba nnele ruri mo lefatsheng leno,+ ke dira jalo ka pelo ya me yotlhe le ka moya wa me otlhe.’”
42 “Gonne Jehofa a re, ‘Fela jaaka ke tliseditse batho bano masetlapelo ano otlhe a magolo, ka tsela e e tshwanang ke tla ba tlisetsa dilo tsotlhe tse di molemo tse ke ba solofetsang tsone.+
43 Mme masimo a tla rekwa gape mo lefatsheng leno,+ le fa gone lona lo re: “Ke lefatshe le le kgakgabetseng le le se nang motho le phologolo, e bile le tsentswe mo seatleng sa Bakaladia.”’
44 “‘Masimo a tla rekwa ka madi, go tla kwalwa mo ditlankaneng di bo di kanwa, e bile go tla bidiwa basupi mo lefatsheng la ga Benjamine,+ mo mafelong a a dikologileng Jerusalema, mo metseng ya Juda,+ mo metseng ya kgaolo e e dithaba, mo metseng ya naga e e kwa tlase+ le mo metseng e e kwa borwa, ka gonne ke tla busa batshwarwa ba bone,’+ go bua Jehofa.”
Dintlha Tse di Kwa Tlase
^ Seheb., “Nebukaderesare,” tsela e nngwe ya go le kwala.
^ Kgotsa “mo ntlong ya segosi.”
^ Shekele e lekana le 11,4 g. Bona Dintlha B14.
^ Bona “Sekano” mo Ditlhaloso Tsa Mafoko.
^ Kgotsa “diterebe; moretlwa.”
^ Seheb., “o baya molato wa borre mo sehubeng sa bana ba bone.”
^ Seheb., “kgakololo.”
^ Seheb., “nama yotlhe.”
^ Seheb., “Nebukaderesare,” tsela e nngwe ya go le kwala.
^ Seheb., “ba lebisa mekwatla ya bone kwa go nna, e seng difatlhego.”
^ Seheb., “ke ne ke tsoga go sa le phakela ke bo ke ruta.”
^ Bona “Gehena” mo Ditlhaloso Tsa Mafoko.
