Lekwalo la ga Jakobe 3:1-18
3 Bakaulengwe ba me, ga lo a tshwanela go nna barutisi lo le bantsi, ka gonne lo a itse gore re tla amogela katlholo e e boima thata.+
2 Gonne rotlhe re dira diphoso* makgetlo a le mantsi.+ Fa mongwe a sa dire phoso mo go se a se buang, ga a na boleo* e bile o kgona go laola le mmele otlhe wa gagwe.
3 Fa re tsenya ditomo mo melomong ya dipitse gore di re utlwe, re laola le mebele ya tsone.
4 Gape akanyang ka dikepe: Le fa di le dikgolo e bile di kgokgoediwa ke diphefo tse di maatla, di laolwa ka selaolasekepe se sennye thata gore di ye gongwe le gongwe kwa motho yo o di kgweetsang a batlang go ya teng.
5 Ka jalo, loleme le lone ke karolo e nnye mo mmeleng, le fa go ntse jalo lo ikgantsha thata. Ruri go tlhokega molelo o monnye go tlhosetsa sekgwa se segolo thata!
6 Loleme le lone lo tshwana le molelo.+ Loleme ke karolo ya mmele wa rona e e tletseng tshiamololo, ka gonne lo leswafatsa mmele otlhe+ e bile lo ka senyetsa motho botshelo. Lo tshwana le Gehena* ka gonne lo baka tshenyo.
7 Batho ba kgona go kgwabofatsa mofuta mongwe le mongwe wa sebatana le nonyane le segagabi le setshedi sa lewatle, tota e bile ba setse ba di kgwabofaditse.
8 Le fa go ntse jalo, ga go na motho ope yo o ka kgwabofatsang loleme. Ga lo laolesege e bile lo utlwisa botlhoko, gape lo tletse botlhole jo bo bolayang.+
9 Re baka Jehofa,* Rraarona ka lone, gape re hutsa batho ba ba bopilweng “mo setshwanong sa Modimo”+ ka lone.
10 Mo molomong o le mongwe go tswa tshegofatso le phutso.
Bakaulengwe ba me, dilo ga di a tshwanela go direga ka tsela eno.+
11 Sediba ga se ntshe metsi a a botshe le a a bogalaka ka nako e le nngwe, gakere?
12 Bakaulengwe ba me, setlhare sa mofeige ga se ka ke sa ungwa maungo a motlhware, kgotsa setlhare sa morara* sa ungwa difeige, gakere?+ Motswedi wa metsi a a letswai le one ga o ka ke wa ntsha metsi a a monate.
13 Ke mang yo o botlhale le yo o tlhaloganyang mo go lona? A a bontshe ka boitshwaro jwa gagwe jo bo siameng gore o dira sengwe le sengwe ka bonolo a tlhotlhelediwa ke botlhale.
14 Mme fa lo na le lefufa+ le manganga*+ mo dipelong tsa lona, lo se ka lwa ikgantsha+ lwa bo lwa bua se se kgatlhanong le boammaaruri.
15 Jono ga se botlhale jo bo tswang kwa godimo; ke jwa lefatshe;+ ke jwa bophologolo, jwa bodimona.
16 Gonne gongwe le gongwe kwa go nang le lefufa le manganga* gone, gape go tla nna le tlhakatlhakano le sengwe le sengwe se se bosula.+
17 Mme motho yo o nang le botlhale jo bo tswang kwa godimo sa ntlha o itshekile,+ go tswa foo o na le kagiso,+ ga a gatelele gore dilo di dirwe ka tsela ya gagwe,+ o ikemiseditse go ikoba, o kutlwelobotlhoko thata e bile o na le maungo a a molemo,+ ga a tlhaole batho,+ ga a itire se a seng sone.+
18 Mo godimo ga moo, batho ba ba nnang ba dirisana le ba bangwe sentle, ba dira gore go nne le kagiso,+ mme seo se felela ka gore ba dire ditiro tse di siameng.+
Dintlha Tse di Kwa Tlase
^ Seger., “re kgopiwa.”
^ Kgotsa “o itekanetse.”
^ Bona Ditlhaloso Tsa Mafoko.
^ Bona Dintlha A5.
^ Kgotsa “diterebe; moretlwa.”
^ Kgotsa gongwe “lo itseela kwa godimo.”
^ Kgotsa gongwe “lo itseela kwa godimo.”
