Ka Matlhatso March 1, 2014, batho ba le 832 ba ne ba kopane mmogo kwa Holong ya Dikopano ya Basupi ba ga Jehofa ya kwa Toropong ya Benin go tla go keteka phitlhelelo e e kgethegileng mo Nigeria. Fa e sale go tloga ka 1999, fa thulaganyo ya go aga Diholo Tsa Bogosi mo dinageng tse di humanegileng e ne e simololwa, Basupi ba ga Jehofa ba agile Diholo Tsa Bogosi di le 3 000 kwa nageng eo.

Pokano eo e ne ya simolola ka pego e khutshwane ya hisitori ya tiro e e neng ya dirwa go aga mafelo a go obamela Modimo kwa Nigeria fa e sale ka bo1920. Kwa tshimologong, go ne go dirisiwa matlo a batho le diholo tsa motse. Holo e e neng ya agiwa kwa toropong ya Ilesa ka bo1935, ke yone lefelo le le neng le dirisiwa fela ke Basupi ba ga Jehofa. Magareng ga 1938 le 1990, palo ya diphuthego e ne ya oketsega ka makgetlo a ka nna 200, go tswa go diphuthego di le 14 go ya go di le 2 681, mme go nnile thata gore bontsi jwa tsone di nne le lefelo la go kopana. Diphuthego di le thataro di ne di dirisa Holo ya Bogosi e le nngwe. Kwa mafelong a mangwe, Holo e ne e tlala thata jaana mo batho ba neng ba tshwanelwa ke go ema kwa ntle le go reetsa dipokano ka fensetere. Mme go ne go na le diphuthego di le dintsi tse di neng di sa ntse di kopanela mo magaeng a batho le kwa sekolong.

Ka 1990, ofisi ya lekala ya Basupi ba ga Jehofa e ne ya tshegetsa tiro eo ka go adima diphuthego madi gore di ikagele Holo ya Bogosi. Ka 1997, Dikomiti Tsa Kago Tsa Kgaolo di ne di thusitse diphuthego go aga le go baakanya diholo di le 105. Ka 1997 go ya go 1999, go ne go agiwa diholo di le 13 tse nngwe le nngwe ya tsone e neng e wediwa mo malatsing a le supa go ya go a le 15.

Seo se ne se sa lekana ka gonne palo ya Basupi ba ga Jehofa kwa Nigeria e ne e gola ka lobelo lo lo kwa godimo thata. Ka April 1998, ofisi ya lekala e ne ya bega gore naga eo e tlhoka Diholo Tsa Bogosi di ka nna 1 114.

Kwa pokanong eo e e neng e tshwaretswe kwa Toropong ya Benin, leloko la Komiti ya Lekala ya Nigeria e bong Don Trost, o ne a raya bareetsi a re: “E ne e le namane e tona ya tiro! Re ne re ipotsa gore re tla e pota kae?” Karabo e ne ya goroga ka gonne go simologa ka 1999 go ne ga nna le Ditlhopha Tsa go Aga Diholo Tsa Bogosi tse mo go tsone go nang le batho ba le barataro go ya go ba le robedi ba ba neng ba thusa diphuthego go ralala naga eo. E re ka ba ne ba dirisa mekgwa e e sa raraanang, ba ne ba kgona go aga diholo di ka nna 17 kgwedi le kgwedi mo lobakeng lwa dingwaga di le 14 tse di fetileng.

Fa Mokaulengwe Trost a sena go tlhalosetsa bareetsi ka se se fitlheletsweng, o ne a ba bolelela go re tiro e ntse e larile kwa pele. Ka 2013, palogare ya Basupi ba ga Jehofa kwa Nigeria e ne ya oketsega ka 8 000. O ne a re: “Seno se raya gore re tla tlhoka go aga Diholo Tsa Bogosi di le 100 ngwaga le ngwaga.” Ka 2013, go ne go na le Basupi ba le 351 000 mo diphuthegong di feta 5 700 kwa Nigeria.