Basupi ba ga Jehofa ba abela mongwe le mongwe Thanolo ya Lefatshe le Lesha ya Dikwalo Tse di Boitshepo fa a batla go e bala.

Le fa mekgatlho e e farologaneng ya Baebele e gatisitse Dibaebele di le dimilione le dithanolo tse dintsi, khumanego le kganetso ya bodumedi di dirile gore batho ba le bantsi ba se ka ba nna le Dibaebele ka dipuo tsa bone. Ka jalo, Basupi ba ga Jehofa ba aba Thanolo ya Lefatshe le Lesha ka dipuo di feta 115.

Bona dikai dingwe:

• Rwanda: Silvestre le Venantie, ba ba nang le bana ba banè ba re: “Re humanegile, ka jalo ga re kgone go rekela mongwe le mongwe mo lelapeng la rona Baebele. Gone jaanong mongwe le mongwe wa rona o na le khopi ya gagwe ya Thanolo ya Lefatshe le Lesha ka Se-Kinyarwanda e bile re bala Baebele mmogo letsatsi le letsatsi.”

  Moruti mongwe wa kereke ya Anglican mo lefelong leo o ne a re: “Eno ke Baebele e ke kgonang go e tlhaloganya. E botoka thata fa e bapisiwa le Dibaebele tsotlhe tse nkileng ka di bala. Ruri Basupi ba ga Jehofa ba rata batho!”

• Democratic Republic of the Congo: Dingwe tsa dikereke di ne di gana go rekisetsa Basupi Dibaebele ka Se-Lingala​—nngwe ya dipuo tse di buiwang thata mo nageng eno.

  Mme se se gakgamatsang ke gore fa Thanolo ya Lefatshe le Lesha e sena go gololwa ka Se-Lingala, Basupi ba kwa Congo bone ba ne ba bala Baebele eno ba bo ba e abela batho ba bangwe. Tota e bile, tsela e Thanolo ya Lefatshe le Lesha e neng e itumeletswe ka yone fa e ne e gololwa, e ne ya dira gore mapodise a a neng a le mo setadiamong a tsene mo moleng go ya go itseela dikhopi tsa Baebele.

• Fiji: Dibaebele tsa Se-Fiji di ja madi a mantsi mo e leng gore mo nakong e e fetileng Basupi ba ga Jehofa ba ne ba dirisa Thanolo ya Lefatshe le Lesha ya Seesemane. Le fa go ntse jalo, ka 2009, batho ba kwa Fiji ba ne ba amogela Thanolo ya Lefatshe le Lesha ya Dikwalo Tsa Bokeresete Tsa Segerika (Tesetamente e Ntšha) ka puo ya bone.

  Monna mongwe o ne a kgatlhilwe thata ke tsela e Thanolo ya Lefatshe le Lesha e utlwalang ka yone mo a neng a kopa go nna le khopi ya yone. Le fa go ntse jalo, Basupi ba ne ba mmolelela gore o ne a tla tshwanelwa ke go leta lobaka lwa kgwedi gore Dibaebele di goroge kwa toropong e a nnang kwa go yone. E re ka monna yono a ne a sa batle go leta, o ne a rulaganya go kopana le Mosupi mongwe yo o nnang bokgakala jwa dikilometara di feta 35 yo o neng a tla mo naya Thanolo ya Lefatshe le Lesha. Monna yono o ne a re: “Thanolo eno e botoka thata go na le e re e dirisang. E a utlwala e bile e a tlhaloganyesega.”

• Malawi: Fa Davide a simolola go ithuta le Basupi ba ga Jehofa, maloko a kereke ya Baptist ya mo lefelong leo a ne a ya kwa lelapeng la gagwe mme a mo amoga Baebele e ba neng ba mo neile yone. Ka jalo, fa Thanolo ya Lefatshe le Lesha e gololwa ka Se-Chichewa, Davide o ne a tloga a bona sengwe se a sa bolong go se batla.

  E re ka Dibaebele di ja madi a mantsi kwa Malawi, Davide o ne a ipotsa gore a ka dira jang gore a nne le Baebele e nngwe. Mme fa a sena go newa khopi ya Thanolo ya Lefatshe le Lesha o ne a re: “Gone jaanong ke na le Baebele e e botoka go gaisa e ke neng ke na le yone!”

Dingwaga tse di fetang 60 tse di fetileng, fa karolo ya ntlha ya Thanolo ya Lefatshe le Lesha e ne e gololwa ka Seesemane kwa kopanong ya kwa New York City, bareetsi ba ne ba kgothadiwa jaana: “E baleng yotlhe. Ithuteng yone . . . E neyeng batho ba bangwe.” Gore seo se direge, Basupi ba ga Jehofa ba ne ba gatisa dikhopi di feta dimilione di le 175 tsa Thanolo ya Lefatshe le Lesha. Mo godimo ga moo, o ka bala Baebele mo Internet ka dipuo di ka nna 50.