Basupi ba ga Jehofa ba itsege ka tiro ya go rera ka ntlo le ntlo. Bosheng jaana, ba dirisa le dikolotsana tse dintle tsa go baya dikgatiso fa ba rera mo mafelong a a tlhanaselang.

Mofuta ono wa go rera o ntse o rotloediwa. Ka November 2011, setlhotswana sa Basupi ba kwa New York City se ne sa simolola go itsise batho molaetsa wa Baebele ba dirisa dikolotsana le ditafole tsa dikgatiso. Tsela eno ya go rera e ne ya atlega thata jaana mo e ileng ya dirisiwa le kwa ditoropong tse dingwe.

Ka March 2015, go ne ga romelwa dikolotsana di le 165 390 kwa diphuthegong mo lefatsheng lotlhe. Gape go dirisiwa ditlhomo, ditafole le dikhaontara tsa go baya dikgatiso.

Go rera ka ntlo le ntlo e sa ntse e le one mokgwa wa konokono wa go isa molaetsa wa Baebele kwa bathong. Mme gone, go bonala mokgwa wa go rera ka dikolotsana o bereka fela thata. Ela tlhoko dikai tse di latelang.

Kwa Peru, Raul o ne a ya kwa Basuping ba ba neng ba eme gaufi le kolotsana a bo a re: ‘Lo ntse lo le kae? Ke na le dingwaga di le tharo ke batlana le Basupi! Ke ne ka leboga Modimo fa ke bona kolotsana ya lona.’

Le fa gone Basupi ba ne ba tle ba etele lefelo le a nnang kwa go lone, Raul o ne a se ke a nna gone motshegare kgotsa ka mafelobeke. O ne a re o kile a ithuta Baebele le Basupi le gore o batla go tswelela pele ka thuto ya gagwe. Go ile ga dirwa dithulaganyo tsa gore a tsweledise thuto ya gagwe.

Banyalani bangwe kwa Bulgaria ba ne ba tsaya buka ya Sephiri sa Boitumelo mo Lelapeng mo kolotsaneng. Ba ne ba boa beke e e latelang mme ba tsaya dibuka tse dingwe tse pedi: Buka Ya me Ya Dipolelo Tsa Baebele le ya Ithute mo Morutising yo Mogolo. Mosupi yo o neng a eme gaufi le kolotsana o ne a ba botsa gore ba na le bana ba ba kae. Ba ne ba re: “Ga re ise re nne le bone mme gone fa re nna le bone re batla go ba ruta ka Modimo. Dibuka tseno di tla re thusa tota.”

Monna mongwe kwa Ukraine yo o neng a apere diaparo tsa sesole o ne a tla kwa Basuping ba ba neng ba eme gaufi le kolotsana. O ne a re: “Bomma ke kopa gore lo mpolelele gore Haramagedona e tla leng.” E ne e le mongwe wa ba ba neng ba lwa kwa ntweng e neng e sa tswa go runya kwa Ukraine. Dilo tse di diregang mo lefatsheng di ne di dirile gore a tlhomamisege gore Haramagedona e gaufi mme o ne a ipotsa gore goreng Modimo a diega jaana. Baboledi bano ba ne ba mmontsha go tswa mo Baebeleng gore Modimo o na le lebaka la go bo a sa tsenye letsogo mo dilong tsa mo lefatsheng le gore mo nakong e e sa fediseng pelo o tlile go nyeletsa ba ba bosula. Monna yoo o ne a tsaya makasine wa Tora ya Tebelo le wa Tsogang! le buka ya Is There a Creator Who Cares About You?

Kwa Makedonia, lekawana lengwe le ne la bolelela Basupi ba ba neng ba eme gaufi le kolotsana gore o a tle a bale dimakasine tsa rona mme gone jaanong o kopa buka ya Totatota Baebele e Ruta Eng? O ne a re o ya go e balela kwa laeboraring.

O ne a boa morago ga diura tse pedi a sena go bala ditsebe tsa ntlha tse 79, a bo a re: “Buka eno e fetola botshelo jwa motho! Ke gone ke bonang gore bontsi jwa dilo tse ke ntseng ke di dumela ga di boammaaruri. Buka eno e tlhalosa dilo ka tsela e e utlwalang sentle. Ruri e fetotse tsela e ke tlhaloganyang botshelo ka yone!”