KABANATA 7

Handa Na ba Akong Bumukod?

‘Kung minsan, pakiramdam ko minamaliit ako ng mga tao kasi nasa poder pa rin ako ng mga magulang ko. Para bang maituturing lang akong adulto kung nakabukod na ako.’​—Katie.

“Naiinis ako dahil hindi ko pa rin magawa ang gusto ko. Iniisip ko na ngang bumukod.”​—Fiona.

KAHIT hindi ka pa handa, baka gusto mo nang bumukod sa mga magulang mo. Normal lang na maramdaman mo iyan. Gaya ng binanggit sa Kabanata 3, layunin ng Diyos na ang mga kabataan ay maging adulto, bumukod, at magkaroon ng sariling pamilya balang-araw. (Genesis 2:23, 24; Marcos 10:7, 8) Pero paano mo malalaman kung handa ka nang bumukod? Pag-isipan ang tatlong mahahalagang tanong. Ang una . . .

 Ano ang Intensiyon Ko?

Tingnan ang listahan sa ibaba. Lagyan ng numero ayon sa kahalagahan ang mga dahilan kung bakit gusto mo nang bumukod.

․․․․․ Umiwas sa mga problema sa bahay

․․․․․ Maging mas malaya

․․․․․ Tumaas ang tingin sa akin ng mga kaibigan ko

․․․․․ Samahan ang isang kaibigan na kailangan ng roommate

․․․․․ Magboluntaryo sa ibang lugar

․․․․․ Matutong tumayo sa sariling paa

․․․․․ Hindi maging pabigat sa magulang

․․․․․ Iba pa ․․․․․

Wala namang masama sa mga dahilang iyan. Pero ang tanong, Ano ba talaga ang motibo mo? Halimbawa, kung iniisip mong magagawa mo ang lahat ng gusto mo kapag bumukod ka na, nagkakamali ka!

Si Danielle, na pansamantalang nagsarili noong 20 anyos siya, ay natuto sa kaniyang karanasan. Sinabi niya: “Kahit bumukod ka na, hindi mo rin magagawa ang lahat ng gusto mo, kasi busy ka sa trabaho o kaya gipit ka sa pera.” Si Carmen naman, na nangibang-bansa nang anim na buwan, ay nagsabi: “Masaya, pero madalas na wala akong libreng oras! Ako lahat ang gumagawa ng gawaing-bahay​—paglilinis ng apartment, pagkukumpuni, pag-aayos ng bakuran, paglalaba, paglalampaso, at kung anu-ano pa.”

Huwag magpadalus-dalos sa pagpapasiya. (Kawikaan 29:20) May katuwiran ka mang bumukod, higit pa roon ang kailangan mo. Dapat kaya mo nang alagaan ang sarili mo. Kaya ang ikalawang tanong ay . . .

Handa Na Kaya Ako?

Ang pagbukod ay parang pagha-hiking. Magha-hiking ka  ba sa kagubatan kung hindi ka marunong magtayo ng tent, magparingas ng apoy, magluto, o tumingin ng mapa? Siyempre hindi! Pero maraming kabataan ang bumubukod kahit wala silang gaanong alam sa bahay.

Sinabi ng marunong na haring si Solomon na “pinag-iisipan ng matalino ang kaniyang mga hakbang.” (Kawikaan 14:15) Para malaman mo kung handa ka nang bumukod, pag-isipan ang sumusunod na punto. Lagyan ng ✔ ang mga kaya mo nang gawin at ng X ang mga kailangan mo pang pag-aralan.

□ Paghawak ng pera: “Hindi ako ang nagbabayad ng bills ko,” ang sabi ni Serena, 19. “Kaya takót akong bumukod at magbadyet ng sarili kong pera.” Paano ka matututong humawak ng pera?

Ayon sa isang kawikaan sa Bibliya: “Ang taong marunong ay makikinig at kukuha ng higit pang turo.” (Kawikaan 1:5) Kaya maaari mong tanungin ang magulang mo kung magkano ang badyet ng isang tao sa loob ng isang buwan para sa upa o hulog sa bahay, pagkain, sasakyan, o pamasahe. Magpaturo ka sa magulang mo kung paano magbadyet at magbayad ng mga bill. a

 □ Gawaing-bahay: Sinabi ni Brian, 17, na takót siyang bumukod dahil ayaw niyang maglaba. Paano mo malalaman na kaya mo nang alagaan ang sarili mo? Ganito ang mungkahi ni Aron, 20: “Magsarili ka kunwari sa loob ng isang linggo. Gamitin mo ang pera mo para bumili at magluto ng sarili mong pagkain. Ikaw ang maglaba at mamalantsa ng damit mo. Ikaw rin ang maglinis ng bahay. At huwag kang magpahatid o magpasundo sa mga pupuntahan mo.” Makikinabang ka sa paggawa nito: (1) Matututo ka ng mahahalagang kasanayan, at (2) mas mapapahalagahan mo ang ginagawa ng mga magulang mo.

□ Pakikisama: Kasundo mo ba ang mga magulang at kapatid mo? Kung hindi, baka isipin mong mas mabuti pang lumipat ka ng bahay kasama ng kaibigan mo. Pero pansinin ang sinabi ni Eve, 18: “Bumukod ang dalawa kong kaibigan at nangupahan. Best friends sila, pero nang magkasama sila sa isang apartment, hindi sila nagkasundo. Ang isa masinop, ’yung isa makalat. Ang isa spiritual-minded, ’yung isa hindi masyado. Hindi talaga sila puwedeng pagsamahin!”

Ano ang solusyon? Sinabi ni Erin, 18: “Sa bahay, matututo kang makisama, lumutas ng  problema, at magparaya. Yung mga bumubukod para umiwas sa sermon ng mga magulang, hindi natututong lumutas sa problema; natututo silang tumakas sa mga ito.”

□ Regular na pag-aaral ng Bibliya at pagsamba: Ang ilan ay humihiwalay sa pamilya dahil ayaw nilang sumama sa relihiyosong gawain ng magulang nila. Ang iba, wala ngang intensiyon na pabayaan ang regular na pag-aaral ng Bibliya at pagsamba kahit bumukod na sila, pero unti-unti nila itong nakatamaran. Paano mo ito maiiwasan? b​—1 Timoteo 1:19.

Gusto ng Diyos na Jehova na kumbinsido tayong lahat sa mga bagay na pinaniniwalaan natin. (Roma 12:1, 2) Kaya gumawa ng mahusay na iskedyul para sa personal na pag-aaral ng Bibliya at pagsamba, at sundin ito. Bakit hindi mo ito isulat sa kalendaryo at tingnan kung masusunod mo ito sa loob ng isang buwan nang hindi ka na sinasabihan ng magulang mo?

Ang huli at ikatlong tanong na dapat mong pag-isipan ay . . .

Ano ba ang Gusto Ko sa Buhay?

Gusto mo bang bumukod para tumakas sa mga problema? O para makawala sa mga magulang mo? Kung oo, ang  nasa isip mo ay ang iiwan mo, hindi ang patutunguhan mo. Parang pagmamaneho iyan na sa rearview mirror lang nakatingin​—likuran lang ang nakikita mo, hindi ang unahan. Ang punto? Huwag puro pag-alis sa bahay ang isipin​—ipokus ang tingin sa magandang tunguhin.

Ang ilang kabataang Saksi ni Jehova ay lumilipat sa ibang lugar o bansa para doon mangaral. Ang iba ay nagboboluntaryo sa tanggapang pansangay ng mga Saksi ni Jehova o sa pagtatayo ng mga gusali para sa pagsamba. Gusto naman ng iba na matutong magsarili bago sila mag-asawa. c

Anuman ang tunguhin mo, pag-isipan itong mabuti. “Ang mga plano ng masikap ay tiyak na magdudulot ng kapakinabangan,” ang sabi ng isang kawikaan sa Bibliya, “ngunit ang bawat isa na padalus-dalos ay tiyak na patungo sa kakapusan.” (Kawikaan 21:5) Makinig sa payo ng iyong magulang. (Kawikaan 23:22) Ipanalangin ito. Bago ka magdesisyon, isaalang-alang ang mga simulain sa Bibliya na tinalakay rito.

Kaya imbes na itanong, ‘Handa na ba akong bumukod?’ ang dapat mong itanong ay ‘Kaya ko na ba talagang magsarili?’ Kung ang sagot mo sa pangalawang tanong ay oo, baka nga kaya mo nang tumayo sa sarili mong paa.

[Mga talababa]

TEMANG TEKSTO

“Iiwan ng lalaki ang kaniyang ama at ang kaniyang ina.”​—Mateo 19:5.

TIP

Subukang ibigay sa mga magulang mo ang halagang nagagastos para sa iyong pagkain, upa sa bahay, at iba pang gastusin. Kung hindi mo kaya o ayaw mong magbigay ng pera para sa gastusin sa bahay, hindi ka pa talaga handang bumukod.

ALAM MO BA . . . ?

Ang intensiyon mo sa pagbukod ang magsasabi kung magiging maligaya ka kapag wala ka na sa poder ng magulang mo.

ANG PLANO KONG GAWIN!

Ang tunguhin ko kung kaya ako bubukod ay ․․․․․

Ang mga gusto kong itanong sa (mga) magulang ko hinggil sa bagay na ito ay ․․․․․

ANO SA PALAGAY MO?

● Kahit may problema ka sa pamilya, paano ka makikinabang kung hindi ka muna bubukod?

● Habang hindi ka pa bumubukod, ano ang puwede mong gawin para sa iyong pamilya at para makapaghanda ka sa pagkakaroon ng sariling pamilya?

[Blurb sa pahina 52]

“Normal lang na gusto mong maging mas malaya. Pero kung ang habol mo lang ay makawala sa mga pagbabawal, hindi ka pa talaga handang bumukod.”​—Aron

[Larawan sa pahina 50, 51]

Ang pagbukod ay parang pagha-hiking​—may mga kailangan ka munang matutuhan bago mo gawin ito