Kikila ki te tamaiti tama i te ata. E foliga tuku tautahi ma mataku, ni? Nae i ei he taimi na vēia ai koe?​— E vēnā nā fakalagona o nā tino i iētahi taimi. E taku mai e te Tuhi Paia nae i ei i nā uō a Ieova na lagona vēnā. He tahi o ki latou ko Elia. Ke akoako ki tatou e uiga ki a te ia.

Na nofo ia Elia i Ihalaelu i he taimi kua leva, ka ko heki fānau ia Iehu. Ko Aapo, te tupu o Ihalaelu, nae hē tāpuaki ki te Atua moni, ko Ieova. Ko Aapo ma tana āvaga, ko Iehapela, na tāpuaki ki te atua pepelo ko Paala. Tēia lā e tokalahi ai nā tino i Ihalaelu na kamata oi tāpuaki ki a Paala. Ko te Kuini ko Iehapela nae matuā hāuā ma fofou ke finau nā tino uma e tāpuaki ki a Ieova, vēnā ma Elia! E kē iloa te mea na fai e Elia?​—

Na hola kehe ia Elia! Na hola mamao ki te toafa ma mumuni i he ana. E manatu  koe, aiheā na fai vēia ai e ia?​— Io, ko ia na mataku. Kae ko Elia e heki tatau ke mataku. Aiheā? Auā na ia iloa ko Ieova e fehoahoani ki a te ia. Na fakaali muamua e Ieova tona malohi ki a Elia. Muamua, na talia e Ieova te tatalo a Elia e auala i te togi ifo o he afi mai te lagi. Ko tēia lā e mafai ke fehoahoani ia Ieova ki a Elia nei lava!

Ka koi i te ana ia Elia, na talanoa atu vēia ia Ieova: ‘Ko he ā tā koe e fai i ki nā?’ Na tali vēia ia Elia: ‘E na ko au lava e tāpuaki atu ki a te koe. E na ko au lava, ma e mataku au na ia au e finau.’ Na mafaufau ia Elia kua finau uma iētahi tino e tāpuaki ki a Ieova. Kae ia na talanoa Ieova ki a Elia: ‘Hēai, e hē moni. E i ei te toka 7,000 o iētahi tino e tāpuaki mai ki a te au. Lotomakeke! E lahi nā galuega mo koe ke fai!’ He ā tō manatu na fiafia ia Elia oi fakalogo ki te tala tēia?​—

He ā te mea kua akoako e koe mai te mea na tupu ki a Elia?​— Ka hē toe lagona e koe te tuku tautahi ma te mataku. E i ei au uō e alolofa ki a Ieova ma alolofa atu ki a te koe. E lahi foki te malohi o Ieova, ma fehoahoani atu i taimi uma ki a te koe! E fiafia koe i te kē iloa ko koe e hē tuku tautahi moni?​—