SIZ birnäçe ýyl mundan öň Indoneziýanyň Uly Sangir adasyna baran bolsaňyz, onda kenaryň ýakasynda üç uýany görerdiňiz. Adanyň ýaşaýjylary olary Mukaddes Kitabyň wagyzçylary diýip tanaýar. Emma uýalar şol wagt başga iş bilen meşgullanýardy.

Uýalar deňze girip, futbol topy ýaly ullakan daşlary kenara çykarardylar. Soňra olary döwüp, towugyň ýumurtgasy ýaly böleklere bölerdiler we daşlary gaplara salyp, basgançakdan ýokary çykyp öýlerine getirerdiler. Olar her gün şeýdip daş üýşürerdiler. Soňra daşlary uly gaplara salyp ýük maşynyna ýüklärdiler. Şol daşlar ýol gurluşygy üçin ulanylýardy.

Üç uýanyň biriniň ady Hulda. Onuň beýleki uýalara garanda köp işlemäge wagty bardy. Huldanyň gazanjy maşgalasyny eklemäge ýetýärdi. Ýöne ol köpräk işläp planşet almagy maksat edinýär. Hulda planşet alyp, oňa JW Library programmasyny ýükläp, adamlara wagyz etmek we çuňňur şahsy okuwyny geçirmek isleýärdi.

Hulda her gün irden iki sagat goşmaça işleýär. Ol bir ýarym aý işläp kiçi ýük ulagyny dolduryp biljek daş ýygnaýar. Olary satyp planşet alýar.

Hulda şeýle gürrüň berýär: «Men agyr zähmet çekip ýadadym, ellerim gabardy. Emma planşet satyn alyp, adamlara wagyz edenimde we ýygnak duşuşyklaryna taýýarlananymda bar ýadawlygym, agyrylarym zym-zyýat boldy». Hulda planşeti tüýs wagtynda aldy. Sebäbi koronawirus keseli ýaýran döwründe ýygnaklar internet arkaly geçirildi. Biz Huldanyň maksadyna ýetendigine örän begenýäris.