MUSANYŇ kanunynda ant içmek barada berlen tabşyryk ýerlikli hasaplanylýardy. Emma Isanyň günlerinde ýehudylar her bir aýdan sözüniň dogrudygyny görkezjek bolup ant içýärdiler. Olar ant içmeklige sowuk-sala garap başladylar. Şeýdip, bu babatda berlen tabşyrygyň gymmatyny gaçyrdylar. Şonuň üçin Isa ant içmek barada iki gezek görkezme berdi. Ol: «Siziň „Hawa“ diýen sözüňiz „Hawa“, „Ýok“ diýeniňiz „Ýok“ bolsun» diýip öwretdi (Mat. 5:33—37; 23:16—22).

Bir kitapda: «Ýehudylar aýdan sözüni tassyklamagy örän wajyp hasaplaýardylar. Şoňa görä-de her bir zat üçin ant içýärdiler» diýilýär (Theological Dictionary of the New Testament). Ine, şonuň üçinem Talmudda haçan ant içmeli we haçan içmeli däldigi barada ýörite sanawy berlen bolmaly.

Ýehudylaryň bu nädogry garaýşy barada diňe Isa aýtmandy. Meselem, taryhçy Iosif Flawiýiň aýtmagyna görä, ýehudylaryň dini topary ant içmekligi ýalan sözlemekdenem agyr günä hasaplaýardylar. Olar diňe ýalançy adam birini ynandyrmak üçin ant içýär diýýärdiler. Ýehudylaryň apokrifik (toslama) kitabynda, ýagny Siharyň pähiminde: «Ant içýän adam baryp ýatan günäkär» diýilýär. Isa edil şeýle sözleri aýtmasa-da, ant içmeklige sowuk-sala garamaly däldigini aýtdy. Eger biz hemişe dogry sözlesek, onda aýdýan sözlerimizi tassyklamak üçin ant içmek gerek bolmaz.