Иса өлмезиниң өң янында шейле дийди: «Патышалык барадакы бу Хош Хабар хемме миллетлере гүвәлик хөкмүнде дүнйәниң әхли еринде вагыз эдилер; ахырзамана шонда гелер» (Матта 24:14). Эмма хош хабары бүтин дүнйәде нәдип вагыз эдип болар? Бу бабатда бизе Исаның галдыран гөрелдеси көмек эдер (Лука 8:1).

Биз өйден-өе вагыз этмәге чалышярыс. Иса шәгиртлерине хош хабары өйден-өе вагыз этмеги өвредипди (Матта 10:11—13; Ресулларың ишлери 5:42; 20:20). I асырда яшан хош хабарчылара ниреде вагыз этмелидиги бабатда гөркезме берлипди (Матта 10:5, 6; 2 Коринтослылар 10:13). Шу гүнлер хем бизиң вагыз ишимиз гурамачылыклы алнып барыляр ве хер йыгнага вагыз этмек үчин айратын ер белленилйәр. Бу бизе Исаның әхли адамлара «вагыз эдиң» диен табшырыгыны долы берҗай этмәге ярдам эдйәр (Ресулларың ишлери 10:42).

Биз адамларың болян ерлеринде вагыз эдйәрис. Иса көпленч адамларың бар еринде, ягны деңзиң кенарында я-да гуйының башында вагыз эдйәрди (Маркус 4:1; Яхя 4:5—15). Биз хем онуң гөрелдесине эерип, әхли ерлерде, ягны көчелерде, адамларың ишлейән ерлеринде, дүканларда, сейилгәхлерде я-да телефон аркалы вагыз эдйәрис. Шейле-де биз мүмкин болдугындан гоңшуларымыза, ишдешлеримизе, сынпдашларымыза ве доган-гарындашларымыза вагыз эдйәрис. Шейлеликде, бүтин дүнйәде миллионларча адамлар «гутулыш» хабарыны эшидйәрлер (Зебур 96:2).

Сиз Худайың Патышалыгы барадакы хош хабары ве онуң берҗек аҗайып гелеҗеги хакында киме гүррүң бермек ислейәрсиңиз? Билен затларыңызы адамлара гүррүң бермәге яйданмаң!

• Нәхили «хош хабар» бүтин ер йүзүнде вагыз эдилмели?

• Ехованың Шаятлары нәдип Исаның гөрелдесине эерйәрлер?