1. Иса вагыз этмәге нәхили гараярды? Дүшүндириң.

ИСА Худайың Патышалыгы барада гүррүң бермеги говы гөрйәрди. Мукаддес Язгыларда айдылмагына гөрә, ол, эсасан, Патышалык барада өвредйәрди ве адамлара вагыз эденде, оны 100 гезекден говрак агзап гечди. Хава, Иса Худайың Патышалыгыны йүрекден гыммат сайярды (Матта 12:34-и окаң).

2. Матта 28:19, 20-нҗи аятлардакы табшырыгы нәче адам эшиден болмалы ве биз нәме үчин шейле нетиҗә гелип билерис?

² Иса диреленинден бираз вагт геченсоң, Патышалыгың гелҗекки вагызчыларының 500-ден говрагына гөрүнди (1 Кор. 15:6). Белки-де, ол Патышалык барадакы хабары «бүтин миллетлере» вагыз этмек табшырыгыны шонда берендир; бу юмшы ерине етирмек хәзире ченли аңсат дәл *. Иса шол әгирт улы ишиң «дүнйәниң соңуна ченли» алнып барылҗакдыгыны өңүнден айтды ве бу шейле хем боляр. Сизем Исаның табшырыгыны ерине етирип, шол пыгамберлигиң берҗай болмагына гатнашян болсаңыз герек (Мат. 28:19, 20).

3. Хош хабары вагыз этмек барадакы табшырыгы ерине етирмегимиз үчин бизе хайсы үч тарапдан голдав берилйәр?

 ³ Иса вагыз этмек барада табшырык беренсоң, шәгиртлерине: «Мен... сизиң билен боларын» дийип вада берди (Мат. 28:20). Шейлеликде, бу әгирт улы вагыз иши Исаның ёлбашчылыгы астында амала ашырылмалыды. Ехова Худай хем бу табшырыгы ерине етирмегимиз үчин, бизи «әхли герекли затлар» билен үпҗүн эдйәр (Евр. 13:20, 21, ТД). Биз шу макалада оларың үчүси, ягны 1) бизе берлен эсбаплар, 2) бизиң уланян усулларымыз ве 3) бизе берилйән тәлим барада гүррүң эдерис. Гелиң, илки билен, соңкы 100 йылың ичинде уланан эсбапларымызың кәбирине середелиң.

4. Биз вагыз эденимизде нәме үчин дүрли эсбаплары уланярыс?

⁴ Иса «Худайың Патышалыгы хакдакы сөзи» дүрли ере экилен тохум билен деңешдирди (Мат. 13:18, 19). Багбан топрагы экише тайярламак үчин дүрли гураллары уланяр. Шонуң ялы-да, Патышамыз энчеме йылдан бәри миллионларча адамларың йүрегини Патышалык барадакы хош хабары кабул этмәге тайярламагымыз үчин, бизе дүрли эсбаплары берйәр. Бу эсбапларың кәбири онларча йыл уланылан болса-да, кәбирлери хәзире ченли гымматыны гачырмады. Муңа гарамаздан, оларың әхлиси бизе хас өкделик билен вагыз этмәге көмек эдйәр.

5. Вагыз этмек үчин уланылан карточка нәме ве ол нәдип уланылярды?

⁵ Көплере вагыз гуллугына башламага ярдам эден эсбапларың бири вагыз этмек үчин уланылан карточкадыр. Вагызчылар оны 1933-нҗи йылда уланып башладылар. Карточканың ини такмынан 7, 5 ве узынлыгы 12, 5 сантиметр болуп, онда Мукаддес Язгыларың хабары гысгача беян эдилйәрди. Вагтал-вагтал тәзе карточкалар чыкарылып, үйтгешик пикирлер айдылярды. Вагыз үчин теклип болса өрән йөнекейди! Чарлз Эрленмиер доган 10 яшындака, карточкалар аркалы вагыз этмәге илкинҗи гезек гатнашяр. Ол шейле диййәр: «Биз көпленч адамлара: „Шу карточканы окамагыңызы хайыш эдйәрис“ диййәрдик. Өй эеси оны окансоң, эдебият берип, ёлумызы довам эдйәрдик».

6. Вагыз этмек үчин уланылан карточкаларың нәхили пейдасы барды?

⁶ Вагыз этмек үчин уланылан карточка көп тарапдан пейда берйәрди. Кәбир доган-уяларың вагыз этмәге гүйчли ислеги болса-да, олар чекинйәрдилер ве нәме дийҗегини билмейәрдилер. Кәбирлериниң болса, айдара зады көпди. Олар адама билйән затларының әхлисини бирнәче минутда гүррүң берип билердилер, эмма оларың теклиби сыпайычылыклы болмазды. Мунуң терсине, карточкадакы гысгадан говы сайланан сөзлер вагызчының айтмалы затларыны дүшнүкли беян эдйәрди.

7. Карточканы уланмакда нәхили кынчылыклар болярды?

⁷ Элбетде, карточкалары уланмакда кәбир кынчылыклар хем болярды. Ехова энчеме йылдан бәри гуллук эдйән Грейс Истеп уя шейле ятлаяр: «Кәвагт адамлар бизе: „Хава, онда нәме айдыляр? Сен маңа өзүң гүррүң берәйсене!“ диййәрдилер». Шейле-де кәбир адамлар карточкада язылан зады окап билмейәрди. Кәбирлери болса, карточка оларың өзлерине берилйәндир өйдүп, оны алып, гапысыны япярдылар. Эгер өй эеси гаты гахарланса, карточканы йыртым-йыртым эдйәрди. Муңа гарамаздан, доганларымыз адамлар билен гүррүңдеш болмагы ве Патышалыгың векиллеридигини ачык айтмагы өврендилер.

8. Патефонлар нәдип уланылярды? Дүшүндириң. (Макаланың башындакы сурата середиң).

⁸ 1930-нҗы йылларда ве 1940-нҗы  йылларың башында башга бир эсбап, ягны патефон уланылярды. Доганларың кәбири оны «Харун» дийип атландырярды, себәби бу энҗам вагызчыларың айтмалы затларының көпүсини адамлара етирмәге ярдам эдйәрди (Мүсүрден чыкыш 4:14—16-нҗы аятлары окаң) *. Эгер өй эеси гаршы болмаса, вагызчы Мукаддес Язгылара эсасланан дөрт ярым минутлык нутугы диңледйәрди ве эдебият хөдүр эдйәрди. Кәвагт Мукаддес Язгылардакы хабары тутуш машгала болуп диңлейәрдилер. 1934-нҗи йылда Гаравул диңи җемгыети, эсасан, вагыз гуллугында уланмак үчин ниетленен патефонлары чыкарып башлады. Нетиҗеде, дүрли темалар боюнча 92 саны нутук язга гечирилди.

9. Патефон аркалы вагыз этмек нәхили нетиҗе берйәрди?

⁹ Мукаддес Язгылара эсасланан нутугы диңлән Хиллари Гослин атлы бир адам гоңшуларына хош хабары диңлетмек үчин, вагызчыдан патефоныны бир хепделик гоюп гитмегини хайыш эдйәр. Шол вагызчы доланып геленде, бирнәче адамың хакыкат билен гызыкланандыгыны билйәр. Вагтың гечмеги билен, оларың көпүси өзүни Ехова багыш эдйәр ве Хиллариниң ики гызы Гилеад мекдебинде окап, дашары юртда гуллук этмәге белленйәр. Вагыз этмек үчин уланылан карточкалар ялы, патефон хем көплере вагыз гуллугына башламага көмек этди. Соңра Патышамыз Иса Месих Вагыз мекдеби аркалы оларың айтмалы сөзлерини агзына салды.

10, 11. Хакыкаты яйратмакда газетлер хем-де радио нәдип уланылды ве бу усуллар нәме үчин нетиҗели дийсе болар?

¹⁰ Патышамызың ёлбашчылыгы астында Худайың халкы хош хабары, мүмкин болдугындан, хас көп адамлара вагыз этмек үчин дүрли усуллары уланяр. Бу «ишчилериң аз» дөврүнде хас-да ваҗыпдыр (Матта 9:37-ни окаң). XX асырың башында вагызчыларың аз еринде хош хабары халк көпчүлигине вагыз этмек үчин газетлер уланылярды. Чарлз Тейз Рассел доган хер хепде вагызларыны телеграмма билен неширят гуллугына иберйәрди. Неширят гуллугы хем олары АБШ-ның, Канаданың ве Европаның газетлерине ёллаярды. 1913-нҗи йылда Рассел доганың вагызлары 2 мүңден говрак газетде чап эдилип, олары 15 миллион адам окаярды!

¹¹ Рассел доган арадан чыкансоң, хош хабары яйратмакда башга бир усул уланылып башланды. 1922-нҗи йылың 16-нҗы апрелинде Рутерфорд доган илкинҗи гезек радиода нутук билен чыкыш этди ве оны такмынан 50 мүң адам диңледи. 1924-нҗи йылың 24-нҗи февралында гураманың илкинҗи радиостанциясы «WBBR» арагатнашыга чыкды. Хош хабары вагыз этмекде уланылян бу тәзе усул барада 1924-нҗи йылың 1-нҗи декабрында чыкан «Гаравул диңинде» шейле дийилди: «Биз радионың хакыкаты яйратмакда хәзире ченли уланан усулларымыздан хас тыгшытлы ве пейдалы болҗакдыгына ынанярыс». Газетлер ялы, радио хем вагызчыларың аз еринде хош хабары көп адамлара етирмәге ярдам этди.

12. а) Көпчүлик ерлеринде вагыз этмегиң хайсы гөрнүши сизе хас яраяр? б) Көпчүлик ерлеринде вагыз этмек бабатда горкымызы еңмәге нәме көмек эдип билер?

¹² Шу гүнлер, эсасан, көпчүлик ерлеринде, ягны автобус дуралгаларында, вокзалларда, автодуралгаларда, сейилгәхлерде  ве сөвда меркезлеринде вагыз этмеклиге хас көп үнс берилйәр. Эгер гуллугың бу гөрнүшлериниң кәбирине гатнашмак сизе кын болса, онда энчеме йылдан бәри айланян гөзегчи болуп гуллук эдйән Анжело Манеро доганың айдан сөзлери барада ойланып, дога этсеңиз говы болар. Ол шейле дийди: «Биз гуллугың тәзе гөрнүшине Ехова гуллук этмегиң хем-де вепадарлыгымызы гөркезмегиң тәзе усулы, айыпсызлыгымызың тәзе сынагы хөкмүнде гараярдык ве нәхили усул билен болса-да, Худая йүрекден гуллук этмек ислейәрдик». Вагыз гуллугының тәзе гөрнүшине гатнашмак аңсат дүшмесе-де, бу бизе Ехова бил баглап, иманымызы беркитмәге ве рухы тайдан өсмәге көмек эдйәр (2 Коринтослылар 12:9, 10-нҗы аятлары окаң).

13. Веб-сайтымыз нәмә мүмкинчилик берйәр ве сиз адамлара сайтымызы салгы берениңизде нәхили гызыклы вакалар болды?

¹³ Вагызчыларың көпүси адамлара jw.org. сайтымызы салгы бермеги говы гөрйәр. Бизиң сайтымызда Мукаддес Язгылара эсасланан эдебиятлары 700-ден говрак дилде окап я-да йүкләп алып боляр ве хер гүн оңа 1, 6 миллиондан говрак адам гирйәр. Гечен йылларда уланылан радио ялы, веб-сайтымыз хем хош хабары дүнйәниң иң чет ерлерине-де етирмәге мүмкинчилик берйәр.

14. Вагызчылара нәхили тәлим берилмелиди ве хайсы мекдеп олара өкделик билен вагыз этмәге көмек эдйәр?

¹⁴ Биз хош хабары яйратмакда уланан эсбапларымызың ве усулларымызың кәбирине серетдик. Эмма бизе берилйән тәлим барада нәме дийсе болар? Айдалы, өй эеси патефонда диңлән нутугындакы пикирлер билен ылалашмаяр я-да вагыз этмек үчин уланылан карточкада окан зады билен гызыкланяр. Шейле ягдайда вагызчылар гаршылыклары сыпайычылыклы еңип гечмеги ве акйүрекли адамлара өкделик билен өвретмеги башармалыды. Худайың мукаддес рухуның гөркезмеси билен, Нейтан Норр доган имандашларына вагыз гуллугында геплемек укыбыны уланмагы өвретмегиң зерурдыгына гөз етирди. Нетиҗеде, 1943-нҗи йылда йыгнакларда Вагыз мекдеби гечирилип башланды. Бу мекдеп бизе өкделик билен вагыз этмәге көмек эдйәр.

15. а) Вагыз мекдебинде чыкыш эден кәбир доган-уялар нәхили дуйгулары башдан гечирдилер? б) Сиз Зебур 32:8-дәки Ехованың вадасының ерине етйәндигине өз дурмушыңызда нәдип гөз етирдиңиз?

¹⁵ Доган-уялара көпчүлигиң өңүнде чыкыш этмеги өвренйәнчә вагт герек болды. Хулио Раму доган 1944-нҗи йылда Вагыз мекдебинде илкинҗи гезек нутук билен чыкыш эдйәр. Ол Мукаддес  Язгыларың бары-ёгы бәш аядында агзалян Дөвег атлы адам барада чыкыш этмели боляр. Хулио: «Мениң аягым сандыр-сандыр эдип, элим титрейәрди, дишлеримем шакырдаярды» диййәр. Ол тутуш нутугының довамында шол бәш аят барада гүррүң эдендигини айдып, сөзүни шейле довам эдйәр: «Мен нутугымы үч минутда тамамладым. Шонда мен сахнада илкинҗи гезек чыкыш этсем-де, муңа хөвесими гачырмадым». Йыгнагың өңүнде чыкыш этмек аңсат болмаса-да, Вагыз мекдебине чагаларам язылярды. Ёкарда агзалан Анжело Манеро доган орта мекдебе яңы-якында гатнап башлан бир огланҗыгың илкинҗи гезек нутук билен чыкыш эдишини ятлап, шейле диййәр: «Ол шейле бир алҗырады велин, хатда мөңңүрип аглап башлады. Эмма ол шонда-да чыкыш этмеги йүрегине дүвенсоң, нутугың ахырына ченли соҗап гечди». Сиз чекинҗеңлик я-да башга затлар себәпли йыгнакда җогап бермән, я оңа гатнашман отурярсыңызмы? Эгер шейле болса, горкыңызы еңип билер ялы, Еховадан көмек сораң. Худай Вагыз мекдебинде илкинҗи гезек чыкыш эден доган-уялара көмек эдиши ялы, сизем хөкман голдар (Зебур 32:8-и окаң).

16. Гилеад мекдеби а) өңки йылларда; б) 2011-нҗи йылдан бәри нәме максат билен гечирилйәр?

¹⁶ Ехованың халкына диңе Вагыз мекдебинде тәлим берилмейәр. Миссионерлер ве башга-да доган-уялар Гилеад мекдебинде окап, көп пейда алдылар. Бир тәлим берйән доганың айтмагына гөрә, бу мекдеп, эсасан, «доган-уяларың ыхласлы вагыз этмәге ислегини артдырмак максады билен гечирилйәр». 1943-нҗи йылдан бәри бу мекдепде 8 мүң 500-ден говрак доган-уялар тәлим алып, 170-ден хем көп юртда миссионер болуп гуллук этдилер. 2011-нҗи йылдан бәри Гилеад мекдебине диңе йөрите долы вагтлы гуллукчылар, ягны йөрите пионерлер, этрап гөзегчилери, бейтелчилер ве хениз бу мекдепде окамадык миссионерлер чагырыляр.

17. Гилеад мекдебинде берилйән тәлим нәхили нетиҗе берйәр?

¹⁷ Бу гошмача тәлим нәхили нетиҗе берйәр? Гелиң, бир мысала середелиң. 1949-нҗы йылың август айында Япониядакы вагызчыларың саны 10-а хем етмейәрди. Эмма шол йылың ахырында Гилеад мекдебинде окан 13 саны миссионер Япония гелип, ыхласлы вагыз эдип башлаяр. Хәзир Японияда 216 мүңе голай вагызчы бар ве оларың такмынан 42 гөтерими пионер болуп гуллук эдйәр!

18. Етишен месихчилере рухы тайдан хас беркемәге көмек эдйән мекдеплери агзап гечиң.

¹⁸ Патышалык гуллугының мекдеби, Пионерлер мекдеби, Хош хабарчылар мекдеби, Этрап гөзегчилери ве оларың аяллары үчин мекдеп, Филиал комитетиниң агзалары ве оларың аяллары үчин мекдеп ялы башга-да мекдеплер Ехованың халкының рухы тайдан хас өсмегине ве беркемегине ярдам эдйәр. Догрудан-да, Патышамыз шәгиртлерине тәлим бермегини довам эдйәр.

19. Рассел доган вагыз иши бабатда нәме дийди ве онуң айдан сөзлери нәдип ерине етйәр?

¹⁹ Худайың Патышалыгының беркарар эдиленине 100 йылдан говрак вагт гечди. Патышамыз Иса Месих бизе тәлим бермегини довам эдйәр. 1916-нҗы йылда Чарлз Тейз Рассел доган өлүминиң өң янында өңденгөрүҗилик билен вагыз ишиниң нәхили депгинде алнып барылҗакдыгы барада белләп, эгиндешлериниң бирине шейле дийди: «Вагыз иши барха гүйчленйәр ве ене-де гүйчленер, себәби хош хабар бүтин дүнйәде вагыз эдилмели» («Faith on the March», А. Х. Макмиллан, сах. 69). Онуң айдянлары догруды! Иң ваҗып иши ерине етирмегимиз үчин, парахатлык Худайының бизи герекли затлар билен үпҗүн эдйәндигине өрән бегенйәрис! Хава, Ехова Худай ислегини берҗай этмегимиз үчин, бизе «әхли герекли затлары» берйәр.