Ол мунуң шейледигине өз дурмушында гөз етирипди. Давут Худайың хемише аладасыны эдйәндигини билйәрди (Зеб. 37:25). Элбетде, Давудың айдан сөзлери Худайың гуллукчыларының хич хачан етер-етмезчиликден көсенмеҗекдигини аңлатмаяр.

Давудың өзи хем кәвагт кын ягдайлара дүшүпди. Ол Саулдан гачып йөркә, азыгы гутаряр. Шонда Давут өзи ве янындакылар үчин бир адамдан чөрек сораяр (1 Шам. 21:1—6). Гөршүмиз ялы, ол «чөрек дилейәр». Эмма Давут шейле кын ягдайда-да Ехованың оны терк этмеҗекдигини билйәрди. Биз Давудың дилегчилик эдип йөрендиги барада хич ерде окамаярыс.

Матта 6:33-е гөрә, Иса Патышалыгың бәхбитлерини биринҗи орунда гойян месихчилериң аладасыны Ехованың этҗекдигине ынандырды. Иса: «Сиз өңүрти Худайың Патышалыгыны, Онуң догрулыгыны агтарың, шонда бу затлар (ийип-ичги ве эгин-эшик) хем сизе онуң үстүне гошулып берлер» дийди. Элбетде, Иса ызарламалар себәпли «доганларының» ачлыкдан көсенҗекдигини хем айдыпды (Мат. 25:35, 37, 40). Павлус ресул шейле ягдая дүшүпди. Онуң кәте ачлыкдан, сувсузлыкдан эҗир чекен вагтлары болупды (2 Кор. 11:27).

Ехова бизиң дүрли ёллар билен ызарланҗакдыгымызы айдяр. Ол Иблисиң атан төхметине җогап берип билмегимиз үчин, бизиң кәбир затлардан махрум эдилмегимизе ёл берйәр (Эйюп 2:3—5). Меселем, фашистлериң концлагеринде кәбир доган-уяларымыз ховп астына дүшдүлер. Олары Еховадан дәндирҗек болуп, етерликли иймит бермән залымлык билен сынадылар. Эмма вепалы Шаятлар Еховадан йүз өвүрмедилер; Худай хем олары терк этмеди. Ехова оларың бу сынагына ёл берди. Себәби ол әхли месихчилериң дүрли сынаглара дүшмегине ёл берйәр. Муңа гарамаздан, Ехованың өз ады үчин хорлук чекйәнлериң әхлисини голдаяндыгына хич хили шүбхе ёк (1 Кор. 10:13). Шейле-де биз Филипилилер 1:29-дакы шу сөзлери унутмалы дәл: «Чүнки сизе диңе Иса Месихе иман этмек дәл, эйсем Онуң хатырасына җебир-җепа чекмек хем берлендир».

Ехова гуллукчыларыны голдаҗакдыгыны вада берйәр. Меселем, Ишая 54:17-де: «Сениң гаршыңа ясалан яраг дерде ярамаз» дийилйәр. Худайың берен шу ве бейлеки вадалары тутуш халкыны халас этҗекдигине гүвә гечйәр. Эмма хер бир месихчи дүрли сынаглара, хатда өлүм ховпуна-да душ гелип билер.