Mba i er ve batisema ve hingir Mbashiada mba Yehova kpa ve de u pasen kwagh, shin ve hidi ijime ve de u kohol imôngo a mbashiada mbagenev je kpa, mba nyaghen ve ga. Kpa ka se wase ve a wase sha er vea hide a lu a isharen i civir Aôndo yô.

 Or ka nana er isholibo tsô maa se dugh nan ken tiônnongo kera ga. Kpa aluer hingir ikye i Orshiada u nan er batisema u peren atindi a Aôndo, inja er u iin shin nzughul a mbayev mba kiriki nahan, man nan gema ishima ga yô, a nyagh nan shin a dugh nan ken tiônnongo kera. Bibilo pase wanger wanger ér: “Dugh nen iferor la ken a ven kera.”—1 Mbakorinte 5:13.

 Gema di or u i dugh nan kera kpa kwase u nan man mbayev mba nan ve lu Mbashiada mba Yehova her di ye? Ve pav sha gbaa u kwaghaôndo kpa tsombor ve yô, u pav ga. Vea za hemen u eren akaa a hen tsombor vea or la imôngo her.

 Mba i dugh ve ken tiônnongo kera kpa vea fatyô u zan mbamkohol asev. Aluer nana soo yô, mbatamen mba ken tiônnongo vea wa nan kwagh ken Bibilo. I soo ér a wase or la nana hide nana kuma u lun Orshiada u Yehova. Ior mba i dugh ve ken tiônnongo, kpa ve va de u eren akaa a dang shi ve tese wang ér sar ve u eren sha atindi a Bibilo sha mimi yô, ka i hide a ve, ve hide a hingir Mbashiada mba Yehova her.