M vese hen gar u Santiago, gartamen u tar u Chile, hen ijiir i mcimbim ma bom kua iniongo i mbaaferev de ishar shi i eren ifer her wuee yô. Shighe u m lu anyom ataan la, i wua terem. Shighe karen yô, ngôm maa za lu vea orgen u wa tswam yô. Or ne a shi gbidyen se didi. Zan zan hegen kpa, ka mea umbur akaa a vihin a sha ayange la yô, ishima i doom ker ga.

M gbe vesen yô, mbaaferev na m nyôr u eren ipila je falegh gba. Yange m ungwan icer i i koho jang jang yô, shi m ma msôrom i kar ikyaa inya, shi ashighe agen m ma mcimbim ma bom kpaa. Hanma shighe yô, m gbidye iyol sha godobi vea mbateen mcimbim ma bom, mba yange ve nôngo acin imôngo ér vea wuam yô. Kwagen la, nongo u mbaaferev ugen za va a icôr iferor ugen ér a va wuam, nahan or la kuman ihyô kpa m nôngo m yevese m yem. Sha shighe ugen la, nongo u mbateen mcimbim ma bom hônom gbuuka sha ityou, shi ve lu nôngon ér vea sendem.

Ken inyom i 1996 la, m hii u sôôr kwase ugen, iti na ér Carolina. Nahan ken inyom i 1998 la se vôsô. Se mba maren wan wase u nomso u iunda la yô, kpiligh mo iyol er ityoromshima yam la na m hingir u eren a tsombor wam dang dang, er terem ngise eren nahan yô. Maa m za iyouci i sôron ior mba garen ityough ker, i hen ijiir yase la. M za ma mcimbim shi i tesem akaa a me er yô, kpa wase ga. M za hemen u vihin ishima sha hanma kwagh u cuku; m kera faantyô u kôron iyol yam tsaha ga. Yange m za er kwagh u ibume kpishi; m nôngo mer me wua iyol yam kera, tsô me de u nan tsombor wam ishimavihin. Kpa kwagh ka a er i doo yô, m kan shio.

Yange m lu ornyimanaôndo anyom vese, kpa m va soo u nan Aôndo jighjigh. Nahan m gba zan adua u mbaaleluya. Hen shighe ne, kwase wam di lu henen Bibilo vea Mbashiada mba Yehova. Yange m soo kwagh u Mbashiada mba Yehova ga, nahan ashighe kpishi m ngor a ve, m lam a ve côu côu. Kpa ve gema ve lam a mo kundu kundu, i de i kpiligh mo a kpiligh iyol.

Iyange igen la, Carolina kaa a mo ér mo m ôr Pasalmi 83:18 ken Bibilo yam. Ivur la pase wang ér iti i Aôndo ka Yehova. Yange kpiligh mo iyol er m fe kwagh u aôndo ugen ken côôci yam  la, i lu kwagh u Yehova ga yô. Ken mhii u inyom i 2000 la, mo kpa m hii u henen Bibilo vea Mbashiada.

Er yange m za hemen u henen Bibilo yô, m kav er Yehova a lu Aôndo u zungwen mhôônom shi a den ior kwaghbo kpaa yô, nahan m zua a ishimasurun. U tesen ikyav yô, Bibilo ôr kwagh u Yehova ken Ekesodu 34:6, 7 ér, ngu “Aôndo u mgboughon a mhôônom ma zungwen kua mlumun u sha mhôôn, u wan ishima man u lun a erdoo man mimi wuee je, u eren a ior udubu imôngo dedoo, u deen ifer man tindi u peren man isholibo.”

Nahan cii kpa, lum ican u eren kwagh u m lu henen la. Yange m na jighjigh mer mayange me kôrcio u kighir ityoronshima yam la ga. Hanma shighe yô, m vihi ishima, tsô Carolina a gba wan mo kwagh kundu kundu. Yange a umbur mo er Yehova a fe iniôngon yam la yô. Iwasen na la nam agee, m za hemen u keren mer me er ishima i Yehova, shin er ashighe kpishi yange m fa kwagh u m lu sha mi jighilii ga nahan kpaa.

Iyange igen yô, anmgbian u lu henen Bibilo a mo la, iti na ér Alejandro, kaa ér mo m ôr Mbagalatia 5:22, 23. Avur la kaa ér ityamegh ki jijingi u Aôndo yô ka “dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha.” Alejandro pasem ér me fatyô u lun a aeren ne sha tahav av ga, saa me suur sha icighan jijingi u Aôndo. Kwagh u mimi u Alejandro ôrom ne yange gema mhen wam vindi vindi.

Shighe kar yô, m za mkohol u vesen u Mbashiada mba Yehova. Er m nenge Mbakristu kohol ijiir i môm shi ve lu eren akaa sha inja vough vough, shi ve lu sha ashe wang kpaa yô, m na jighjigh mer ka kwaghaôndo u mimi je m zough a mi ne. (Yohane 13:34, 35) I erem batisema ken uwer u Febewari 2001.

Yehova gemam, mo ipilaor, m hingir or u eren kwagh a ior ken bem. M nenge mer á dughum shin amgbiôr a yange m hange shimi la. Yange ior kpishi kôrom ihyom, kpa m na ve ibo ga. Nahan kpa, hegen yô, saan mo iyol u civir Yehova vea kwase wam man ônov asev mba nomso uhar ken bem.

Ka i kpiligh anmgbianev av mba hen tsombor kua ahuraior a am iyol er m de akaa kpishi ken uma wam yô. Sha nahan yô, ve mbagenev kpishi ve tese isharen i henen mimi u Bibilo. Shi m wase mbagenev hingir u fan Yehova. Saan mo iyol kpishi u nengen er mimi u Bibilo a gem uuma vev kpaa yô!