Yange i nger kwaghôron u profeti u Mika la anyom nga kar er deri ataratar nahan yô, kwaghôron u profeti la maa kure. I mar Yesu ken gar u Betelehem. Anyom nga kar er 30 nahan yô, ken inyom i 29 la, vegher u hiihii u kwaghôron u profeti Daniel ôr sha kwagh u m ve u Mesiya la maa kure. I er Yesu batisema shi Aôndo tsegha un sha icighan jijingi. Mesiya shin Vor, u ior kegh mve u ú ica i gba la va sha shighe vough!

Yange mba eren Yesu batisema je maa hii u eren tom na u “pasen Loho u Dedoo u tartor u Aôndo” la. (Luka 8:1) Yesu lu inja legh legh shi eren kwagh a ior kundu kundu shi kwagh u ior gba un ishima sha mimi, vough er i tsengaôron nahan. Yange tesen ior sha dooshima man sha gbenda u a wase ve yô, shi lu been ior “hanma injauange” kpaa, man kwagh ne tese wang ér Aôndo ngu a na. (Mateu 4:23) Mbayev man mbaganden kpishi zaan hen Yesu, shi ve kure ikyaa ér: “Se zua a Mesiya ve”!—Yohane 1:41.

Yesu tsengaôron ér cii man Tartor na u hii u hemen tar cii yô, ityav mbi nôngon man ityartenger kua akaabo agen kpishi aa er shin tar. Yange taver mbahenen nav cii asema, kaa a ve ér “kuran nen.”—Marku 13:37.

Yesu lu or u vough, u za hemen u ungwan imo i Aôndo yô. Nahan cii kpa, lu a mbaihyomov mba ve va wua un yô. Ku na la maa hingir nagh ku vough, ku hiden nan se uma u tsôron ken Paradiso, u Adam vea Ifa ta kera la.

Ku u Yesu la yange u kure kwaghôron u profeti, shi mnder u Aôndo nder un shin mbakpenev sha iyange i sha utar, hingir jijingi u ageegh la kpa kure kwaghôron u profeti. Yesu maa ande hen mbahenen nav mba hemban iorov 500. Cii man Yesu kôndo yem sha yô, yange tindi mbadondon un ér ve za pase “akuraior cii” loho u dedoo sha kwagh na man Tartor na. (Mateu 28:19) Yange ve er tom ne vindi vindi kpa?

​—A har sha Mateu, Marku, Luka, Yohane, 1 Mbakorinte.