MKAANEM man ka ma mimi kpen kpen! Ashighe kpishi uma wase ngu a iv a “zayol man ishima i vihin.” Alaghga u pine wer, ‘Or a fatyô u lun a uma u injaa ken tar ne je kpa?’

Nenge ase kwagh u kwase ugen u i yer un ér Maria ne. Maria lu kwase u lun a gbong gbong iyol, kpa hegen u a lu anyom 84 ne yô, kera fetyô u duen ken won iyol na ga. Kwagh môm nzughul un ga, kpa ka inja er iyol na yô vor hegen nahan. Nahan a er nan ve una nenge ér imba uma la ka u injaa?

We u nenge nena? Alaghga shighe ngu u yange u pine iyol you wer, uma wou ngu a inja je kpa, yô. Adooga tom wou ua na u vôr kpishi. Shi alaghga mbagenev vea wuese we kpaa ga. Aluer kwagh za u iyol hegen ga je kpa, ishima ia fatyô u nyian we sha kwagh u ken hemen. Ashighe agen a huan we, shin u ule je kpaa. Shi afaerenga tsombor wou ngu bem bem ga. Adooga or wou u ishima ishima nan saa ku. Orgen u i yer un ér André yô, yange soo ter na kpishi, kpa angev va kôr ter na kpoo, maa kpe. Ku ne nyoon André tsung, je a hen ér kwagh môm ngu u been a mnyoonom mara ga.

Sea tagher a nyi ican je kpa, gba kpee u se fa kwagh ne: Se fatyô u lun a uma u injaa je kpa? Se time sha uma u Yesu Kristu, or u yange lu shin tar ne anyom 2,000 ken ijime la tsô se zua a mlumun. Shin er Yesu tagher a atsan kpishi nahan kpa, yange lu a uma u injaa. Aluer se dondo ikyav na la yô, se kpa se lu a uma u injaa.