Kporom Hen Aôndo

Yehova Kôr Iferkwagh Ihyom

BIBILO kaa ér: “Or ka nana lu a tahav sha orgen yô, nan eren nan ican.” (Orpasenkwagh 8:9) Mkaanem ma i nger anyom a kar hegen er 3,000 nahan ne, ma pase kwagh u a lu eren shin tar u se lu shimi ne vough. Ka a na orumace tahav yô, nan gande ave, ka nana lu nyityô or shin nana due han han je kpaa. Ashighe kpishi ka nan nzughul a atsanaior kua mba ve lu a or u wasen ve ga la. Yehova nenge ieren i nzughul a ior la nena? Se zua a mlumun sha mpin ne ken Esekiel 22:6, 7, 31.—Ôr.

Ken Atindi a Yehova na Mbaiserael la, a pase wang ér mayange mba ve lu sha aan a utaha la, ve de nzughul a mbagenev ga. Yange mbahemenev mba ken Iserael vea waan ancôgholov ikyo, shi vea zungwen mbaatsanev man mba sha kwarkyaa ga mhôônom yô, Yehova a ver ikyurior la doo doo. (Duteronomi 27:19; 28:15, 45) Nahan kpa, sha ayange a Esekiel la, mbatarev mba ken Yerusalem man mba ken Yuda lu nzughul a ior sha igbenda i vihin tsung. Ve lu nzughul a ior nena?

Hanmô ortaregh u ken Iserael yô, yange nan lu eren “tahav mbu nan, nan lu haan awambe” inya. (Ivur 6) Ishember i “tahav,” i i ter heen ne ngi ôron kwagh u hemen. Aluer mbahemenev mba i gbe u vea wa tindi ikyo shi vea nenge ér i kura tindi shon la, gema mba nzughul a ior shi wuan mbaishôôv yô, a er nan je ve iferkwagh ia de lunu?

Esekiel yange ôr mkaanem ma ken ivur i sha 6 la been yô, a na mbahemenev mbara, kua mba ve dondo ve u peren atindi a Yehova la cii ibo. A kaa a ér: “I civir ter man ngô ken a we ga.” (Ivur 7) Er ve kera lu a icivir sha ian i Yehova ver mbamaren sha mi ken tsombor la ga yô, ve vihi kwagh u tsombor, u lu kwagh u vesen ken tar u Iserael la.—Ekesodu 20:12.

Ior mba eren afer mbara lu nyighen mba ve lu a or u wasen ve ga la. Hanma shighe u vea per tindi yô, ve lu tesen ér ve wa Atindi a Aôndo na Mbaiserael sha dooshima la ikyo ga. U tesen ikyav yô, Aôndo yange wa Mbaiserael tindi ér ve eren a ushirmbaiorov mba ve lu hen atô ve la doo doo. (Ekesodu 22:21; 23:9; Levitiku 19:33, 34) Kpa ve lu eren ushirmbaiorov mbara “ican.”—Ivur 7.

Shi ior mbara lu eren ‘ancôgholov man kasev mba côgholov’ mba ve lu a or u wasen ve ga la ican. (Ivur 7) Yehova fa mbamgbe mba ior mba mbamaren vev shin noov vev shin kasev vev ve saa ku la cii. Nahan a tôndozwa ér un iyol na, una va tim mba ve eren ancôgholov man kasev mba côgholov ican la kera.—Ekesodu 22:22-24.

Mbaiserael mba sha ayange a Esekiel la yange ve per Tindi u Aôndo sha igbenda i se ter heen ne kua igenegh kpaa, shi ve wa ikyo sha Tindi u Aôndo wa ve sha dooshima la ga. Nahan Yehova er nena? A kaa ér, “M haa ve ishimavihin Yam.” (Ivur 31) Sha nahan yô, ken inyom i 607 C.S.Y. (Cii man Shighe u Yesu) la, Yehova de Mbababilon va tim Yerusalem, shi kura ior mba ve lu ker la, yem a ve uikyangen.

Mkaanem ma Esekiel mara tese se akaa ahar sha kwagh u Yehova man gbenda u a nengen iferkwagh la. Hiihii yô, Yehova kôr iferkwagh ihyom. Kwagh u sha uhar yô, mhôônom ma ker un a mbaishôôv mba i nzughul a ve la. Aôndo gem kposo ga. (Malaki 3:6) A tôndo zwa ér ica a gba ga tsô una kar a iferkwagh sha, kua mba ve eren afer la cii. (Anzaakaa 2:21, 22) Er nan u seer henen kwagh u Aôndo u ‘kwagh u mimi a doo un ishima’ la, shi u seer henen gbenda u u kporom ikyua a na la ga?—Pasalmi 37:28.

[Mkaanem ma sha peeji 27 la]

Yehova yange pase wang ér mayange mba ve lu sha aan a utaha la, ve de nzughul a mbagenev ga