Kporom Hen Aôndo

“De Se Hide Nen hen Yehova”

Yange u civir Yehova, kpa hegen u dee? U hen sha kwagh u hiden va civir un la, kpa u nenge wer una kera lumun we ga shinii? Yô, ôr ngeren ne kua u a dondo la zulee. I nger ve sha ci wou jighilii.

KWASE ugen u yange de u civir Aôndo, er i tese un shighe u lu yev la yô, kaa ér: “Yange m er msen hen Yehova mer a de me hide me va civir un, shi a dem kwaghbo u m er, m vihi un ishima ker la kpaa.” Mhôônom kôr u a na ga he? Ka u pine wer, ‘Ka i lu Aôndo ken ishima a mba yange ve civir un kpa hegen ve de la nena? Umbur kwagh ve je he? A soo ér ve “hide ve va civir un” je kpa?’ Cii man se na mlumun sha mbampin mbara yô, de se time sha mkaanem ma Yeremia yange nger man. Mbamlumun mba a na sha mbampin mbara vea sur u ishima je ka u tunan ga.—Ôr Yeremia 31:18-20.

Time ase sha akaa a yange na ve Yeremia nger mkaanem nam mara yô. Ken inyom i 740 C.S.Y. (Cii man Shighe u Yesu) la, Yehova de Mbaashiria va yem a ikwe pue i tartor u Iserael la uikyangen. Kwagh ne yange er upuembaanyomov kar imôngo cii man shighe u Yeremia la ye. * Aôndo yange de ér imba kwagh ne i er ior nav sha ci u tsahan ve sha kwaghbo u ve hii u eren kpoghuloo, ve venda u ungwan icintan i a ta ve ciligh ciligh sha ikyev i uprofeti nav la. (2 Utor 17:5-18) Atsan a ve ya ken uikyangen, shighe u ve kera lu ikyua a Aôndo ve ga, shi ve gba ica a tar ve kpishi la na yô, ve gema inja kpa? Yehova yange hungur a ior nav gbindigh gbindighii? Shi una lumun ér ve hide hen tar ve, ve va civir un je he?

“M Vaa Afanyô”

Shighe u ior mban lu ken uikyangen la, ve kav ibumegh vev, nahan ve gema ishima. Yehova yange kav er ve gema ishima sha mimi yô. Ungwa ase er Yehova pase ieren man mlu u ken ishima u Mbaiserael mba ve lu ken uikyangen, mba i kohol ve cii i yilan ér Eferaim la.

Yehova kaa ér, ‘M ungwa Eferaim lu toghor iyol.’ (Ivur 18) Yange ungwa Mbaiserael toghor iyol sha kwagh u isholibo ve la va ve a mi la. Kwase u fan takerada ugen pase inja i ishember i “toghor iyol” la ér ka u “gbidyen ikyarkyase shin kunden iyol gbigh gbigh.” Yange ve lu inja er ma wan u hembanato u a lu jingir ityough sha ci u atsan a un ve a mi sha iyolna, shi i sar un tsung u hiden sha uma u yange lu sha mi shighe u lu hen ya na la. (Luka 15:11-17) Lu nyi ior mban lu ôrono?

‘U tsaham, er gumbua u a lu a hoghol a igbur ga yô.’ (Ivur 18) Mbaiserael yange ve tese ér ve kuma tsaha. Kera kpa, ve lu er gumbua u a lu a hoghol a igbur ga nahan. Takerada ugen kaa ér alaghga Mbaiserael lu er gumbua u “luun er yange una hembe ato ga yô, ma i gbidye un sha gbough ga yô.”

‘Gemam, tsô me gema; gadia ka We U lu TER, Aôndo wam, ye.’ (Ivur 18) Yange ve hide a iyol ijime, nahan ve yila Aôndo. Isholibo yange i ya tor ken a ve, kpa ve zamber a Aôndo ér a wase ve vea hide a er ishima na. Bibilo igen i i yer ér  Contemporary English Version la kaa ér: “U ngu Aôndo wase. De se hide hen a we, se va civir we.”

‘M vaa afanyô, m va ahenge, m tôô iheen.’ (Ivur 19) Mbaiserael yange ve vaa afanyô sha isholibo i ve er la. Ve lumun ibo. Shi ve ya kunya, ve ure sha u vaan afanyô.—Luke 15:18, 19, 21.

Mbaiserael gema ishima, ve zungwe tsung, ve pase asorabo ve hen Aôndo, shi ve undu igbenda ve i bo la. Mgemshima ve la una na ishima ia gba Aôndo shimi je he? Una de ér ve hide hen tar ve, ve va civir un kpa?

“Mimi Je, Me Zungwe Un Mhôônom”

Mbaiserael yange ve doo Yehova ishima tsung. A kaa ér: “Mo M ngu Iserael ter je, man Eferaim ka wan Wam.” (Yeremia 31:9) A er nan je ve ter u lun a dooshima una venda u lumun wan na u a gem ishima la sha wono! Nenge ase er Yehova tese ior nav dooshima, er ter ka nan tese wan u nan dooshima nahan yô.

‘Eferaim ka wan u ishima ishima u doon Mo ishima kpen kpen gaa? Gadia hanma shighe u ka Mea teren un sha ishimavihin yô, M gba umbur un di sha gbashima je.’ (Ivur 20) Mkaanem mara ka ma kundun iyol tsô! Yange gba u Aôndo una ôr kwagh a ônov nav “sha ishimavihin,” una ta ve icin kwa kimbir kimbir sha igbenda ve i bo la, er ter u nan lu a dooshima, kpa nan gem nan lumun ibumegh ga nahan. Er ve venda u ungwan un sha apera yô, a de i yem a ve uikyangen, nahan ve undu tar ve. Kpa, shin er lu u una tsaha ve nahan kpa, hungur a ve ga. Lu u una hungur a ve mayange ga. Ter u lun a dooshima nan hungur a ônov mba nan ga. Nahan kpa, lu un ken ishima nena shighe u nenge ônov nav gema ishima sha mimi laa?

‘A sar ishima Yam tsung, mimi je, Me zungwe un mhôônom, kape TER A kaa ne.’ (Ivur 20) Yange sar Yehova a ônov nav tsung. Mgem u ve gema ishima sha mimi la yange kôr un ken ishima, shi sar un tsung u ve hide hen a na kpaa. Yange “mhôônom kôr” Yehova a ônov nav kpishi shi wa iyol kegh kegh u ngohol ve, er ter u ken injakwagh i Yesu ôr sha kwagh u wan u a undu ter na la nahan.—Luka 15:20.

‘Yehova De Me Hide Me Va Civir We’

Mkaanem ma i nger ken Yeremia 31:18-20 la ma wase se u zuan a mkav sha kwagh u mhôônom ma ma kôron Yehova a ior nav la. Aôndo hungur a mba yange ve civir un kpa hegen ve de la ga. Aluer amba la nahan soo u hiden hen a na di ye? Aôndo “kegh iyol u den [ve] kwaghbo.” (Pasalmi 86:5) Mayange una hule mba ve gem ishima, ve hiden hen a na mbara ér ve yem kera ga. (Pasalmi 51:17) U ma i lu nahan la yô, ka i gema i saan un iyol u ngohol ve.—Luka 15:22-24.

Kwase u i ter kwagh na sha mhii u ngeren ne la yange tsua ér una hide a va civir Yehova, nahan a za mkombo ken Iyou i Tartor i Mbashiada mba Yehova. Sha hiihii la, gba u una nôngo a mbamhen mba sha mi ga, mba lu a mi la. A kaa ér: “Yange m nenge mer m gba kwagh ga.” Kpa mbatamen mba ken tiônnongo taver un ishima shi ve wase un u hiden taver ken jijingi. A kaa ér, “Doom kpishi er Yehova a de ér m hide m va civir un nahan!” A ôr kwagh ne nahan sha u tesen ér un ngu a iwuese kpishi.

Aluer yange u civir Yehova kpa u va de, shi ka u ape hiden va civir un yô, se mba lôhôn we ser za mkombo ken Iyou i Tartor i Mbashiada mba Yehova, i i lu ikyua a we la. Umbur wer Yehova zungu mba ve gem ishima ve hide hen a na la mhôônom, nahan yô, “De se hide nen hen Yehova.”

[Ngeren u shin kpe]