Hen Kwagh Ken Mkaanem Ma Aôndo

Ka An Nan Lu Yesu Kristu?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Ka an nan lu Yesu Kristu?

Ken uumace cii, ka Yesu tseegh yange vande lun or u ken jijingi sha cii ve mase van shin tar ne ye. (Yohane 8:23) Yange lu or u hiihii u Aôndo gba yô, shi gema wase u gban akaa agen cica cii. Ka Yesu tseegh Yehova yange gba un sha uwegh nagh ye, sha nahan yô i yila un ér “Waniunda” u Aôndo. Yesu shi lu Orshua u Aôndo, nahan yô mba yer un ér “Imo” kpaa.—Yohane 1:1-3, 14; ôr Anzaakaa 8:22, 23, 30; Mbakolose 1:15, 16.

2. Er nan ve Yesu yange va shin taraa?

Aôndo yange tindi Wan na shin tar; yange musan uma na zum u lu sha la a va wan ken iyav mbu iniunkwase i Mbayuda igen, i yilan i ér Maria. Nahan Yesu lu a ter ken uumace ga. (Luka 1:30-35) Yesu va shin tar ne sha ci u atôakyaa atar: (1) sha u va tesen se mimi sha kwagh u Aôndo, (2) sha u va veren se ikyav i se dondo sha u eren ishima i Aôndo yô, man (3) sha u a̱ va nan uma na u vough la sha u a lu “ipaan” sha ci wase. —Ôr Mateu 20:28; Yohane 18:37.

3. Er nan i gbe u a paa se?

Ipaan ka kwagh u i kimbi sha ityough ki or sha u yiman nan ken ikyangenev mbi nan lu ker la yô. Ku man iyolbeen lu vegher u awashima u Aôndo sha ci u uumace shighe u a gba ve la ga. Er nan ve se fe nahana? Aôndo yange kaa a Adam, nomsoor u hiihii la ér aluer a er kwagh u Bibilo i yer ér isholibo la yô, una kpe. Luun er Adam yange er isholibo ga yô, ma kpe mayange ga. Shin er Adam tsa anyom uderi imôngo zum u a hemba Aôndo ato kera la nahan kpa, yange hii u kpen sha iyange i a hemba Aôndo ato la je. (Genese 2:16, 17; 5:5) Adam yange pelegh a isholibo i̱ er la sha ônov nav cii, kua injar i isholibo shon, ka ku je la. Sha nahan yô, ku “nyôr” shin tar u uumace sha ikyev i Adam. Ka sha nahan man i gbe u a paa se ye.—Ôr Mbaromanu 5:12; 6:23.

 4. Er nan ve Yesu yange kpe?

Ka an yange nan lu sha ian i paan se sha u waren se sha ikyev i ku? Zum u or ka nana kpe yô, nan kimbi injar i isholibo la sha ci u asorabo a nan tseegh tsô. Or u lun vough ga môm môm nana fatyô u paan mbagenev sha ci u asorabo a ve ga.—Ôr Pasalmi 49:7-9.

Yesu zua a myen hen ma orumace u yange nan lu ter na ga, sha nahan yô, a kpe sha ci u asorabo na ga, kpa lu sha ci u asorabo a mbagenev. Aôndo yange tindi Wan na sha u a̱ va kpe sha ci wase, nahan a̱ tese er uumace ve doo un ishima kpishi yô. Yesu kpa tese se dooshima sha u ungwan imo i Ter na, nahan a gema uma na a na sha ci wase.—Ôr Yohane 3:16; Mbaromanu 5:18, 19.

5. Yesu ngu eren nyi hegene?

Yesu yange been ior angev shi nderen mbakpenev shi waren ior ken atsan a ve, nahan yô á tese kwagh u una va er sha ci u uumace mba ve lu ungwan imo i Aôndo la. (Luka 18:35-42; Yohane 5:28, 29) Yesu yange kpen yô, Aôndo nder un, nahan hingir or u ken jijingi. (1 Peteru 3:18) Yesu maa za tema ken uwegh ku yanegh ku Aôndo gba keghen zan zan shighe u Yehova kar nan un tahav mbu lun Tor u tar ne jimin cii la. (Mbaheberu 10:12, 13) Hegen ne Yesu ngu Tor sha, shi mbadondon un mba ve lu shin tar la mba yôôn loho u dedoo sha tar jimin cii.—Ôr Daniel 7:13, 14; Mateu 24:14.

Ica a gba ga tsô, Yesu una er tom a tahav mbu torough nav mbura sha u kuren hanma ican i yan cii man sha u timin mba ve eren ior ican la kpaa. Ior umiliôn umiliôn mba ve ne Yesu jighjigh shi ve ongo imo na la vea ember uma ken paradiso shin tar.—Ôr Pasalmi 37:9-11.

Wea soo u seer zuan a iwanger yô, ôr ityough 4 ki takerada u Bibilo Tese Ér Nyi Jimi? ka Mbashiada mba Yehova ve gber u ye.

[Foto u sha peeji 23]

Ior umiliôn umiliôn mba ve ne Yesu jighjigh shi ve ongo imo na la vea ember uma ken paradiso shin tar