I Tsengaôron Mve u Mesiya

MBAYUDA yange ve fa kwagh u Yesaia man uprofeti mbagenev tsengaôron sha kwagh u mve u Mesiya yô, nahan ve lu keghen mve na la tsung je. Sha ayange a Yesu la, Mbayuda kpishi lu “veren ashe” ér Mesiya sôôn van. (Luka 3:15) Kwagh er doo yô, akaaôron a profeti a ken Bibilo la tsengaôron akaa kpishi sha kwagh u uma u Mesiya. Orumace môm tsô ngu u yange ma nan tsengaôron akaa ne iyol i nan ga shin ma nan kure a sha Yesu tsô kpaa ga.

I Tsengaôron Kwagh u Mar u Mesiya Vighe Vighe. Yesaia tsengaôron ér ka iniunkwase ia mar Mesiya shin Kristu ye. Apostoli Mateu yange pase mar u Yesu u sha ivande la vighe vighe been cii yô, a kaa wener: “Akaa ne cii er sha u kwagh u Ter ôr sha ikyev i profeti la, a̱ kure sha mi vough, er: Iniunkwase ia wa iyav, ia mar wan u nomso; á yila Un iti er Emanuel, inja na yô er, Aôndo ngu a vese.” (Mateu 1:22, 23; Yesaia 7:14) Yesaia shi tsengaôron ér Kristu una due ken tsombor u Davidi; yange yila Yese, ter u Davidi sha iti jighilii ér Yesu una due ken tsombor na. Man kape lu kpaa je la, Yesu due ken tsombor u Davidi jighilii. (Mateu 1:6, 16; Luka 3:23, 31, 32) Ka nahan ve, cii man i mar Yesu yô, ortyom Gaberiel kaa a Maria ngô u Yesu wener: ‘Ter Aôndo kpaa Una na Un ikyônough ki torough ki Ter Na Davidi’ ye.—Luka 1:32, 33; Yesaia 11:1-5, 10; Mbaromanu 15:12.

I Tsengaôron Kwagh u Uma u Mesiya Vighe Vighe. Shighe u Yesu gande or la a ôr mkaanem magenem ma profeti Yesaia ken shinagoge genger genger; mkaanem ma Yesu ôr la wa ma i nger heen ne kpa ker. Ma kaa ér: “Jijingi u Ter ngu sha a Mo, sha ci u A shighem mkurem, A tindim er M̱ yôô Loho u Dedoo hen mbaatsanev.” Yesu pase ér mkaanem man kure sha a na; a kaa ér: “Nyian i kure icighanruamabera ne ken ato a en ve.”  (Luka 4:17-21; Yesaia 61:1, 2) Yesaia shi tsengaôron ér Yesu una lu or u ishima legh legh, u eren kwagh a mba ican i tser ve la a iyol hiden ijime. Mateu nger wener: “Ior kpishi dondo sha a Na; A bee ve angev cii; man A ta ve icin er, ve̱ de pasen Un ken igbar ga; sha er kwagh u profeti Yesaia lu kaa la a̱ kure sha mi vough yô, er . . . Una er num ga, ayôôso kpaa Una yôôso ga . . . Ijinga i hemben Una sombo i ga.”—Mateu 8:16, 17; 12:10-21; Yesaia 42:1-4; 53:4, 5.

I Tsengaôron Kwagh u Ican i Mesiya Una Ya La. Yesaia yange tsengaôron wener Mbaiserael kpishi vea venda Mesiya, nahan una hingir ve “iwen i keman nguhar sha mi.” (1 Peteru 2:6-8; Yesaia 8:14, 15) Man sha mimi yô, er Yesu lu eren uivande kpishi nahan kpa, ior “na Un jighjigh ga, sha er kwaghôron u profeti Yesaia lu ôr la a̱ kure sha mi vough yô, er: Tere, ka an je nan ne kwagh u i ongo hen vese la jighjighii?” (Yohane 12:37, 38; Yesaia 53:1) Kwagh môm u yange na ve Mbayuda na Yesu jighjigh ér ka Mesiya ga yô, ka mhen u shami ga u Mbayuda kpishi lu a mi ér Mesiya una kar a hemen u Mbaromanu kera fese, una gema a ver tartor u Davidi, u ua lu sha tseeneke u ú shin tar la. Kpa er Yesu ya ican shi i mase wuan un yô, Mbayuda kpishi lumun ér Yesu ka Mesiya ga. Kpa, jighilii yô Yesaia yange tsengaôron ér Mesiya una ya ican cii ve una hingir tor ye.

Mesiya tsengaôron kwagh na iyol na ken takerada u Yesaia wener: “M gema ijime Yam M na mbagbidyen, . . . M yer ishigh Yagh kera sha u cian kunya kua azer a haan ga.” Mateu ôr se kwagh u yange za hemen shighe u i lu ôron Yesu ijir la ér: “Ve ta Un azer sha ishi, shi ve ta Un azu kpaa; mbagenev ta Un sambe.” (Yesaia 50:6; Mateu 26:67) Yesaia nger wener, “i er Un ican je, nahan kpaa A rumun er i̱ hee Un, zwa tsô kpaa A bugh ga.” Nahan shighe u Pilatu pine Yesu kwagh sha akaa a Mbayuda wa un iyol la yô, “A bugh un zwa sha ma kwaghôron môm ga; nahan kpiligh gomna iyol.”—Yesaia 53:7; Mateu 27:12-14; Aerenakaa 8:28, 32-35.

I Tsengaôron Kwagh u Ku u Mesiya. Kwaghôron u profeti Yesaia kure sha kwagh u ku u Yesu man sha kwagh u uma na u ken hemen kpaa. Yesaia tsengakaan wener: “I ver Un uwar a mbaerenakaabo imôngo, kpa ken ku Na yô, A lu a mbanyarev imôngo.” (Yesaia 53:9) Kwaghôron u profeti u i lu inja er anzughul nga sha mi ne yange kure nena? Yange i mande Yesu a mbanumungbenda uhar shighe u i wua un la. (Mateu 27:38) Kpa Yesu kpen kera yô, ornyar ugen, iti ér Yosev u ken Arematia tôô ikyom i Yesu wa ken uwar na u he u a time ken vande yô. (Mateu 27:57-60) U masen yô, ku u Yesu la kure vegher u injaa u kwaghôron u profeti u Yesaia la. Yesaia ôr kwagh u Mesiya nahan wener: “Wanakiriki Wam u perapera la, Una gema ior kpishi vea hingir mbaperapera; Una tôô afer a ve sha iyol Na kpaa.” Sha kpôô yô, ku u Yesu la paa uumace, u tôô myohom ma isholibo sha mbaperapera cii kera.—Yesaia 53:8, 11; Mbaromanu 4:25.

Akaaôron a Profeti a Aa Kure Keng Keng Yô

Mbaapostoli man Yesu iyol na ôr akaa a ken Ruamabera a tesen or u nan lu Mesiya yô; yange ve hemba teren akaaôron a profeti Yesaia la aa akaa a ken ityakerada i Bibilo igenegh. Nahan kpa, lu takerada u Yesaia tseegh tsengaôron akaa a ken hemen ga. Akaaôron a  profeti agen kpishi a i nger ken Ruamabera u ken Zwa Heberu la kpa kure sha Yesu man Tartor na shi akaaôron ne pase akaa a dedoo a Tartor la ua er ken hemen yô. * (Aerenakaa 28:23; Mpase 19:10) Yange gba u akaaôron a profeti ne aa kure sha mi keng, a bunde ga nena? Yesu yange kaa a Mbayuda mbagenev mba ve lu ungwan a na la wener: “De henen nen ner, M va sha u bunden atindiakaa kua uprofeti ga, [ka Ruamabera u ken Zwa Heberu je la] M va sha u bunden a bunde ga, kpa ka u eren sha mi vough. Gadia mimi je M kaan ne ne, zan zan Sha man tar kpaa vea kar kera je, kpa mayange ishangekwagh môm shin anikyav môm tsô kpaa una kogh ken atindiakaa kera ga, zan zan akaa cii aa kure sha mi vough.”—Mateu 5:17, 18.

Yesu shi pase akaaôron a profeti a ken Bibilo a yange kure sha shighe na la man a aa va kure ken hemen la kpaa. (Daniel 9:27; Mateu 15:7-9; 24:15) Heela tseegh ga, Yesu man mbahenen nav tsengaôron akaa a aa va er ken hemen yô, man se mba nengen er akaa ne agen a lu eren sha nyian yô. Kwaghngeren u dondon ne una pase se akaa ne man akaaôron a profeti agen a ken Bibilo, a aa va kure ken hemen la.

[Footnote]

[Picture on page 4]

‘Iniunkwase . . . ia mar wan u nomso’

[Picture on page 5]

‘M yer ishigh Yagh kera sha u cian kunya ga.’