1. Ka akaa a nan or msaanyol a nyi agumaior kpishi a a lu Mbakristu la a lu erene?

SE MBA ken shighe u injaa kpen kpen. Ior umiliôn imôngo ken akuraior cii mba van ken mcivir u mimi hegen; man igbe je imbakwagh ne ngi a er ga. (Mpa. 7:9, 10) Agumaior kpishi nga zuan a akaa a doon tsung ken tom u ve lu eren u tesen ior akaa a mimi a ken Bibilo, a aa fatyô u nan ve uma la. (Mpa. 22:17) Agumaior agen nga henen Bibilo a ior, wasen ve u sôron uuma vev. Mbagenev mba pasen loho u dedoo ne sha gbashima, hen ajiir a i lamen zwa ugen yô. (Ps. 110:3; Yes. 52:7) U er nan ve we kpa u er tom u nan we msaanyol, u ior mba Yehova ve lu eren ne?

2. Ikyav i Timoteu la i tese ér ka i doo Yehova u nan agumaior ityom ken nongo na nena? (Nenge foto u a lu sha mhii u ngeren ne la.)

² Er u lu gumor yô, u fatyô u tsuan akaa a aa bugh u gbenda u eren ityom i injaa ken mcivir u Aôndo yô. U tesen ikyav yô, Timoteu u i mar un hen gar u Lisetera la, yange tsua akaa sha kwaghfan, nahan kwagh ne bugh un gbenda u va eren tom u mishen shighe u alaghga lu a iv anyom 20 ga, shin poso anyom 20 kpuaa la. (Aer. 16:1-3) Ikyav tese ér iwer ngi kar kpuaa yô, Paulu tindi Timoteu u lu gumor la ér a za hen tiônnongo u i sember veren ken Tesalonika la, a za taver anmgbianev mba i lu tôvon ve a ican kpoghuloo la asema. Mtev u sha ican ne na yô, Paulu  undu ijiir la, kpa a na jighjigh er Timoteu una kôrcio u taver anmgbianev mbara asema. (Aer. 17:5-15; 1 Tes. 3:1, 2, 6) U fatyô u gbidyen kwar nengen er yange a lu Timoteu ken ishima shighe u i tindi u imba ityom ne la kpa?

3. Ka kwagh u hemban cii u nyi u fatyô u tsuan wer u er ken uma wouwe, man ka hanma shighe i doo u ú er kwagh ne?

³ Ka hegen u u lu iyev ne je i lu shighe u ú tsua akaa a vesen ken uma wou ye. Kpa ken akaa a u soo u tsuan la cii, kwagh ugen ngu u a hembe lun kwagh u vesen yô; ka u tsuan wer u civir Yehova je la. Ka hanma shighe i hembe doon u eren nahana? Yehova kaa ér: “Umbur u A gbe u la sha ayange a iyev ou.” (Orpa. 12:1) Gbenda u Yehova a soo ér u “umbur” un yô, ka u civir un a ishima you cii. (Dut. 10:12) U we tsuan wer u civir Aôndo a ishima you cii la ka kwagh u hemban cii u ú er yô. Kwagh ne una gema uma wou jimin cii.—Ps. 71:5.

4. Dugh u we tsuan wer u civir Yehova la kera yô, ka akaa agen a nyi nahan kpa aa bende a gbenda u ú civir Aôndo laa?

⁴ Sha mimi yô, ka u tsuan wer u civir Yehova la tseegh i lu kwagh u a bende a mlu wou u ken hemen ga. U tesen ikyav yô, alaghga a gba u ú tsua u vôson kwase shin nom, shi u tsua or u ú soo u vôson la kua tom u u soo u eren, zuan a inyaregh la kpaa. Akaa ne cii nga hange hange, nahan kpa a doo u ú vande tsuan wer u civir Yehova a ishima you cii ve. (Dut. 30:19, 20) Sha ci u nyi? Sha ci u akaa ne cii gba zua. Or u ú tsough u vôson kua tom u ú tsough u eren la cii vea bende a gbenda u ú civir Aôndo la. (Nenge Luka 14:16-20.) Kape isharen i u lu a mi u civir Aôndo la kpa ia bende a ivaa kua tom u ú soo u eren la je la. Sha nahan yô, vande tsuan akaa a a hembe lun hange hange la.—Fil. 1:10.

5, 6. Tese er or ka nana tsua akaa ken uma u nan sha kwaghfan ve, kwagh u injaa a due ker yô. (Shi nenge ngeren u ken Iyoukura ne, u a kaa ér “Kwagh u M Tsua u Eren Shighe u M Lu Iyev La” kpaa.)

⁵ Aluer u tsua u civir Aôndo yô, doo u u hen sha kwagh u a soo ér we u er la, kua gbenda u ú soo u civir un la kpaa. Anmgbian ugen ken tar u Japan nger wener: “Shighe u m lu anyom 14 la, m due kwaghpasen vea ortamen ugen, nahan ortamen ne nenge er kwaghpasen la maam iyol ga yô. Nahan a kande teghelee a kaa a mo ér: ‘Yem ken ya Yuichiro, za tema hen sha kwagh u Yehova a er sha ci wou la zulee.’ Nahan m er kwagh u kaa la. Je yô, m za hemen u henen sha kwagh ne shi eren msen ayange imôngo. Kure kure tsô, mnenge wam gema. Ica i gbe ga yô, gba maan mo iyol u civir Yehova. Yange i doom u ôron ngeren mba ve er kwagh u mbamishen la, nahan m hii u henen sha kwagh u eren Aôndo tom a ishima yam cii.”

⁶ Anmgbian Yuichiro za hemen kaa ér: “Yange m hii u eren akaa a aa wasem u za eren Yehova tom ken ityar i ken won yô. U tesen ikyav yô, m tsua u henen zwa Buter ken makeranta. M been makeranta yô, m tsua u eren tom u tesen ior zwa Buter sha ashighe ashighe, sha er me kôrcio u eren pania yô. M va nyôron anyom 20 yô, m hii u henen zwa Mongolia, shi m zua a ian i za kohol imôngo vea annongo u mbapasenkwagh ugen ken zwa Mongolia. Anyom nga kar ahar yô, m za zende ken tar u Mongolia, ken inyom i 2007 la. M dugh kwaghpasen vea upania mbagenev yô, m nenge er sar ior kpishi u fan mimi yô, nahan m soo u moughon yemen ken tar shon za wasen ve. Nahan m hide ken tar u Japan m za wa iyol. Hii ken uwer u Aipor 2008 la je, m za hemen u pasen kwagh ken Mongolia. Uma taver hen ijiir ne tsô. Kpa ior mba ungwan loho u dedoo hen ijiir ne, shi m ngu wasen ve u kporom ikyua a Yehova. M nenge mer kwagh u m tsough u eren ne ka kwagh u hemban doon ken uma cii.”

7. Ka akaa a nyi i gbe kpee u se tsua ayol a ase, man ka ikyav i nyi Mose a ver se?

 ⁷ Gba kpee u hanma Orshiada u Yehova nana tsua kwagh u nan soo u eren a uma u nan la. (Yos. 24:15) Se fatyô u kaan a mô wen ser nana er kwase shin nom, shin tesen nan or u nana vôso shin tom u nana er ga. U tsua tom u a tôô u shighe gôgônan u henen ga la kpa? Ne agumaior agen ne mba sha ajiir a ior ve gbe ican yô; mbagenev di mba sha ugeri mba ior ve lu a kwagh ave kpishi yô. Shi se fa er ne agumaior a sha tar cii, aeren a en man jighjigh wen u nan man asaren a en kua akaa a ne fe u eren la a kaha kpishi yô. Alaghga mbamlu enev mba kposo kposo, er agumaior a Mbaheberu, a a lu ken tar u Igipiti u tsuaa la kpa mbamlu vev kaha a u Mose, u lu gumor la nahan. Un lu a hanma kwagh cii ken ya u tor, kpa agumaior a Mbaheberu agen di gema lu ikpan. (Eks. 1:13, 14; Aer. 7:21, 22) Ve lu uma sha shighe u gba u vea tsua akaa a vesen a vea er yô, er se kpa i lu nyian nahan. (Eks. 19:4-6) Lu u hanmô ve nana tsua kwagh u nan soo u eren a uma u nan la. Mose yô, tsua kwagh u vough.—Ôr Mbaheberu 11:24-27.

8. Ka han agumaior aa fatyô u zuan a iwasen i tsuan akaa ken uma sha kwaghfana?

⁸ Yehova una wase u u tsuan akaa sha kwaghfan hen shighe u u lu iyev ne. Una tese u akaawan a ken Bibilo a aa wase u ken hanma mlu u u nyer ker cii yô. (Ps. 32:8) Heela tseegh ga, mbamaren ou mba ve fe mimi la, man mbatamen mba ken tiônnongo vea wase u u fa er u dondo akaawan ne ken uma wou yô. (Anz. 1:8, 9) De ase se time sha akaawan a ken Bibilo atar, a aa wase u u tsuan akaa sha kwaghfan, sha gbenda u zua a mtsera ken hemen yô.

9. (a) Yehova na se ian i civirigh i tsuan kwagh u se soo la nena? (b) Ka sea ‘vande keren Tartor’ yô, kwagh ne a bugh se aan a eren nyi?

⁹ Vande keren Tartor u Aôndo man perapera na. (Ôr Mateu 6:19-21, 24-26, 31-34.) Yehova na hanmô wase ian i civirigh i tsuan kwagh u nan soo yô. A kaa ér gba u ú na shighe wou u uye la jimin cii sha u pasen kwagh u Tartor ga. Kpa Yesu yange wa se kwagh u una wase se u vanden keren kwagh u Tartor yô. Gbenda u u dondo kwaghwan ne la ua bugh u ian i tesen wer Aôndo doo u ishima, shi kwagh u mbawan ndor a we gba u ishima shi ishimaverenkeghen you i va lun uma gbem sha won la kpa ngi u kwagh u vesen. Or u u tsough u vôson man tom u u soo u eren la, tese ér ishima hemba nyian we sha akaa a iyolough, a u ‘vanden keren Tartor na man perapera na’ la shinii?

10. Ka nyi yange i na Yesu msaanyolo, man ka akaa a nyi u tsua ve aa na u msaanyolo?

¹⁰ Zua a msaanyol sha u eren akaa sha ci u mbagenev. (Ôr Aerenakaa 20:20, 21, 24, 35.) Yesu yange wa se kwagh u vesen u una wase se ken uma yô. Un lu or u saan un iyol kpishi yô, sha ci u yange er ishima i Ter na, lu ishima na ga. Yange i doo un u nengen er mbaasemaamimi ve lu ungwan loho u dedoo yô. (Luka 10:21; Yoh. 4:34) Alaghga tsô we kpa u vande zuan a msaanyol u or ka nana wase mbagenev ve nan zua a mi la. Aluer u ngu dondon akaawan a Yesu ne shighe u u lu tsuan akaa a vesen ken uma yô, u zua a msaanyol shi Yehova kpa u na a saan un iyol.—Anz. 27:11.

11. Er nan ve yange kera saan Baruki iyol ga, man lu nyi kwagh Yehova wa unô?

¹¹ Se mba zough a msaanyol u hemban cii la sha u eren Yehova tom. (Anz. 16:20) Alaghga tsô lu kwagh u Baruki, akawe u Yeremia yange hungur a mi je ne. Shighe ugen la, kera saan un iyol u eren Yehova tom ga. Yehova kaa a na ér: “U ngu keren akaa a vesen sha ci wou iyol youwe? De kera keren a ga; gadia nenge, M ngu van a kwagh u bo sha uuma cii, . . . kpa Me gema uma wou a̱ hingir we er ka ishar u ye yô, sha ajiir a ú zenden cii.” (Yer. 45:3, 5) U nenge kwagh ne nena? Ka nyi yange man i na Baruki msaanyolo? Ka u keren akaa  a vesen shinii, ka u eren Aôndo tom sha mimi, nahan waren mtim u Yerusaleme?—Yak. 1:12.

12. Ka nyi Ramiro yange tsua u eren ve i na un msaanyolo?

¹² Anmgbian ugen u yange zua a msaanyol sha u eren akaa sha ci u mbagenev yô, lu Ramiro. A kaa ér: “M due hen tsombor u u gbe ican yô. Se mba hen agar agen sha Iwo i Andes. Nahan shighe u anmgbian wam u vesen kaa ér una kimbim yunivasiti la, kwagh ne lum zegekwagh. Kpa i sember eren mo batisema, m hingir Orshiada u Yehova, shi pania ugen kaa ér mo m va kohol un se za pase kwagh hen angar ugen. Tsô m mough m yem vea na, m za hen ityough ki hondon, maa m bugh ijiir i hondon ityough zuan a inyaregh kuren mbamgbe av. Se lu tesen ior Ruamabera, shi ve kpishi ve lu keghen ato a vese. Shighe kar yô, i ver tiônnongo u he ken zwa wam u ityôô, nahan m gema nyôron mbamkombo vea tiônnongo shon. M pase kwagh hanma shighe ka anyom pue je ne. Tom môm ua fatyô u nan mo msaanyol er u wasen ior kaven loho u dedoo ken zwa ve u ityôô la ga.”

13. Hii nan ve i hembe doon u or a hii u eren Yehova tom kpoghuloo shighe u nan lu iyev laa?

¹³ I saan we iyol u eren Yehova tom shighe u u lu iyev ne. (Ôr Orpasenkwagh 12:1.) De henen wer saa u vande zuan a tom u injaa cii ve u hii pania u eren ga. Ka shighe u u lu iyev la i hembe doon u u hii u eren Yehova tom kpoghuloo ye. Ka nyi u soo wer u er sha ci u Yehova er u lu iyev nee? Alaghga awashima wou ka u hingir pania. Adooga u soo u za pasen kwagh hen haregh u i lamen zwa ugen yô. Shin alaghga u nenge a igbenda igen i u soo u seer eren tom hen tiônnongo wou yô. A lu nyi u we ishima u eren ken tom u Yehova kpa, gba u u ker gbenda u nengen sha ugbayol ou. Pine iyol you wer: Ka nyi tom me ere, man a tôôm shighe nana u henen u?

14. Shighe u or nan lu tsuan akaa a nana er ken hemen yô, ka akaa a nyi i doo u nana wa ikyo sha mini?

¹⁴ Akaawan a Bibilo a atar a se tim sha mi la aa wase u u tsuan tom u u soo u eren yô. Atica a ou a ken makeranta aa fatyô u pasen we ityom i hen haregh wou, i u tsua u eren yô. Shi ior mba eren tom hen ma afishi a gomoti agen vea fatyô u ôron we ityom i kwagh a gbe sha mi hen haregh wou la, shin ape u we ishima u za eren tom la. Er akaa a ior mban vea ôr u la aa lu u iwasen nahan kpa, gba u u wa ikyo. Ior mba Yehova a doo ve ishima ga ne vea fatyô u meen we, nahan tar ne ua hii u doon we ishima. (1 Yoh. 2:15-17) Aluer u kenger akaa a a lu shin tar ne yô, aa tsume a we a ngôôr ga.—Ôr Anzaakaa 14:15; Yer. 17:9.

15, 16. Ka unô vea hemba wan we kwagh u injaa sha kwagh u tomo?

¹⁵ U faan ityom i i lu la yô, a gba u u ker kwaghwan u injaa. (Anz. 1:5) Ka an nana fatyô u wasen we u tsuan tom u u hendan a akaawan a ken Bibilo ga laa? Ungwa kwaghwan u mba Yehova a doo ve ishima, shi ve soo u, shi ve fa u kua mbamlu ou tsembelee la. Vea wase u u fan kwagh u u kôrcio u eren la, kua mbaawashima ou. Alaghga kwagh u vea ôr u la una wase u u hiden henen sha akaa a u we ishima u eren la. Aluer Yehova doo mbamaren ou ishima yô, ve kpa vea wase u kpen kpen! Shi mbatamen mba ken tiônnongo kpa ka mba ve vie ken jijingi, mba vea fatyô u wan we kwagh u injaa yô. Heela tseegh ga, lam a upania man mbakuran mba ningir sha kpaa. Pine ve wer: Yange ve tsua u eren Yehova tom hanma shighe sha ci u nyi? Yange ve er nan ve ve hii tom pania, man mba nengen sha ugbayol vev nena? Ka msaanyol u nyi ka ve zua a mi ken tom ve u pasen kwagh laa?—Anz. 15:22.

¹⁶ Mba ve fe u tsembelee la vea fatyô u wan we kwagh u injaa. Ikyav i tesen yô, alaghga u soo u den kôleeji wer u hii pania u eren sha ci u u soo ican i ken makeranta ga. Alaghga or u u doo nan ishima la nana kav ityôkyaa i i ne ve u soo u den makeranta la, nahan nana wase u lun a ieren i gban uwer sha kwagh ga la. Man ka ieren i ia wase u u eren Yehova tom kpoghuloo je ne.—Ps. 141:5; Anz. 6:6-10.

17. Ka akaa a nyi i gbe u se palegh u tsuana?

¹⁷ Hanma or u nan lu civir Yehova cii nana tagher a ameen a aa fatyô u paven nan a Yehova yô. (1 Kor. 15:33; Kol. 2:8) Kpa ityom igen ngi hembe karen jighjigh wase u nan a igen. U fa mbagenev hen ijiir you mba ‘tso a ur ve sha kwagh u jighjigh u nan’ zum u ve tsua u eren ma tom ugen yôô? (1 Tim. 1:19) Aluer u palegh u tsuan akaa a aa vihi u a Yehova yô, u lu tesen je wer u ngu or u fan kwagh.—Anz. 22:3.

18, 19. Aluer ka a sar u u eren Yehova tom ga yô, ka nyi i doo u u ere?

¹⁸ Aluer sar u sha mimi u civir Yehova yô, dondo igbenda i a bugh sha ci wou i eren un tom er u lu iyev ne la. Ka shighe u i doo u u tsua akaa a aa na a saan we iyol u civir Yehova je ne.—Ps. 148:12, 13.

¹⁹ Kpa aluer gema sar u u eren Yehova tom ga di yô, ka nyi i doo u u ere? De gbe u nôngon wer u taver jighjigh wou u nan ga. Apostoli Paulu yange pasen er un nenge sha afatyô na ér una er kwagh u Aôndo a soo la been yô, a nger wener: “Aluer mhen wen una kaha kposo sha ma kwagh yô, heela kpaa, Aôndo Una pase ne. Kpa kwagh u se zua a mi la yô, se zende nen sha mi vough.” (Fil. 3:15, 16) De hungur dooshima u Aôndo a tese u la ga, shi ungwan kwaghwan na u injaa la kpaa. Or môm kuma sha Yehova ga; una wase u u tsuan akaa sha kwaghfan er u lu iyev ne.