Ngeren u Pasen Kwagh u Uma u Or

M Kôr Mkaikyondo u Oryuda Kuma Anyom Akunduatargber Hegen

Kwaghôron u Leonard Smith

Shighe u m lu anyom pue kar a kar la, m ôr avur a Bibilo ahar agen kôrom sha mtema. Shin er hegen i tse je i kom anyom 70 nahan kpa, me fatyô u umbur shighe u yange m kav inja i kwagh u i nger ken Sekaria 8:23, ape i ôr kwagh u “iorov pue” vea kôr “mkaikyondo u Oryuda” la. Shi ijiir la kaa ér, vea kaa a Oryuda la ér: “Sé za a ven imôngo, gadia se ungwa ser, Aôndo ngu a ven.”

ORYUDA la tile sha ityough ki Mbakristu mba i shigh ve mkurem la, man “iorov pue” mbara di tile sha ityough ki “iyôngo igen” shin “Mbayonadabi,” er yange i yilan ve tsuaa tsuaa la nahan. * (Yoh. 10:16) Shighe u m fa mimi sha kwagh ne la, m kav mer, u ishimaverenkeghen yam i lun uma gbem sha won shin tar la i̱ kure sha mi vough yô, gba u me sue nongo u mba i shigh ve mkurem la.

Shi injakwagh i Yesu ôr ken Mateu 25:31-46, sha kwagh u “iyôngo” man “ivo” la kpa yange i kôrom sha mtema. “Iyôngo” la ka mba i ne ve ishô ken ayange a masejime ne sha ci u ve er a anmgbianev mba Yesu mba i shigh ve mkurem, mba ve lu shin tar la doo doo, sha u suen ve yô. Yange m lu gumor u ken nongo u Yonadabi, nahan m kaa a iyol yam ér, ‘Leonard, aluer u soo wer Kristu a nenge u ér u ngu iyôngo na yô, a gba u ú sue anmgbianev nav mba i shigh ve mkurem la, shi u lumun hemen ve, sha ci u Aôndo ngu a ve.’ Mfe ne kuram hemba anyom akunduatargber hegen.

KA IAN I NYI M LU A MI KEN NONGO U YEHOVA?

Yange i er ngôm batisema ken inyom i 1925 la, ken iyou i nyôron mkombo igen shin Betel. I yilan iyou la ér London Tabernacle, anmgbianev mba hen ningir la eren mbamkombo ker. Yange i marem sha iyange i Oktoba 15, 1926. Ken uwer u Maaci 1940 la yô, i erem batisema sha mkohol ugen u se za hen gar u Dover, u a lu hen kpemnger ken tar u Ingila la. M vese m hingir u soon mimi u ken Bibilo la kpishi. Er ngôm lu môm ken Mbakristu mba i shigh ve mkurem la yô, ‘mkaikyondo u Oryuda’ u m hii kôron yô, lu u ngôm. Kpa sha shighe la, terem man anngôm u kwase u vesen lu a gba civir Yehova ga. Yange se lu hen Tiônnongo u Gillingham, u a lu hen atô u imbusutarimese man ityoughkitaregh ki tar u Ingila, ape Mbakristu mba i shigh ve mkurem yange ve hemba iyenge la. Ngôm verem ikyav i tseen ishima sha tom u pasen kwagh la.

Ken uwer u Setemba 1941 la, i time sha kwagh u or u nan kom u hemen sha won cii la ken kwaghôron ugen sha mkohol u vesen u se za ken gar u Leicester yô, kwaghôron la lu a itinekwagh ér “Intergrity,” (“Mtil sha Mimi”). Kwaghôron la yange wasem, m hii kaven mer, se kpa se mba ken ikyaa i i lu hen atô u Yehova man Satan la. Sha nahan yô, gba u se ta ikyaa a Yehova shi se tile sha mimi hen a na sha ci u ka un a lu Tor u Hemban sha won cii ye.

Yange i ôr sha mkohol la var var ér ior ve er tom u pania, shi í taver agumaior asema ér ve tsua u eren tom u pania. Kwaghôron u lu a itinekwagh ér “Pioneer’s Place  in the Organization” (“Ian i Pania ken Nongo u Yehova”) la yange na yô, m pine iyol yam mer, ‘Ka ian i nyi m lu a mi ken nongo u Yehova?’ Mkohol u vesen la yange wasem u fan mer, er m lu ken nongo u Yonadabi yô, m ngu a tom u wasen nongo u mba i shigh ve mkurem la ken tom u pasen kwagh la sha afatyô wam cii. Nahan shighe u m lu ken gar u Leicester la je, m nger apelekeshen u eren tom u pania la.

TOM U PANIA SHIGHE U I LU NÔNGON ITYAV LA

Sha iyange Disemba 1, 1941, shighe u m iv anyom 15 la, i nam tom u ikpur pania. Ngôm lu or u hiihii u m hii eren tom u ikpur pania vea na yô, kpa inyom kar i môm yô, gba u una de tom u pania sha ci u angev. Nahan afishi a branci a ken London hide tindi Ron Parkin ér a za er tom u pania vea mo, un ngu ken Kômatii u Nengen sha Branci u ken tar u Puerto Rico la hegen.

Yange i tindi se ken gar u Broadstairs man Ramsgate, agar ne nga hen kpemnger, ken eniel u Kent, ape se za kôr haya u iyou la. Shighe la i naan ikpur mba pania inyaregh ki Amerika ki kuman er Udola $8 nahan sha uwer, sha u kuren mbamgbe vev. Shighe u se kimbi haya yô, se mase shin a aninyar kpuaa tseegh, shi se fa ape kpernan se zua a kwaghyan kpaa ga. Nahan kpa, Yehova lu kuren mbamgbe asev hanma shighe, sha igbenda kposo kposo.

Yange se naha ikyekye kpoghuloo, a ikyav mbi yuhwan sha mi, se tagher vanger a ahumbe a taver a yange a mough ken zegemnger u i yer ér North Sea la. Shi yange i gba u se wa ishima a ubom mba yange i shi keren ve, ve kar ken eniel u Kent ve za ta sha gar u London la. Kwagen la, m tsuwe sha ikyekye m gba hen inya, sha ci u bom ugen va kar sha ityough yagh, kar za bughur ikyua ken hemen. Nahan cii kpa, yange saan se iyol kpishi ken anyom a se lu eren tom u pania ken eniel u Kent la.

M HINGIR “GUMOR U EREN TOM SHIN BETEL”

Ngôm yange a shi wuese tom u shin Betel. Yange a kaa ér: “Ma kwagh môm sarem u ma u hingir gumor u eren tom shin Betel ga.” Nahan nenge er yange saan mo iyol shi kpiligh mo iyol shighe u i lôhôm ér m za wase tom shin Betel u ken London, ken ukasua utar, ken uwer u Janawari 1946 la yô. Ukasua mba utar mbara mba been yô, Pryce Hughes, u nengen sha afishi a branci la kaa ér m za hemen u eren tom shin Betel. Ityesen i yange m ngohol shin Betel la wasem ken uma wam jimin cii.

Hen shighe la, tsombor u Betel u ken London la kuma er iorov 30 nahan tseegh, shi mba kpishiv lu agumaior a lun kwav, kua anmgbianev mba i shigh ve mkurem la, er Pryce Hughes man Edgar Clay kua Jack Barr, u va hingir môm ken Mbahemenev mba Shin Itine la nahan. Er m lu gumor yô, lum kwagh u civirigh kpishi u suen anmgbianev mba Kristu, sha u eren tom sha hemen u mba ve lu “mtuunummbaiorom” la!—Gal. 2:9.

Iyange igen yô, anmgbian ugen shin Betel kaa a mo ér, anmgbian u kwase ugen soo u nengen a mo, a tile ngu sha hunda u ken ishi la. Kwagh u kpiligh mo iyol yô lu ngôm, yange wa kwagh ugen ken imbyulugh u vesen gema wa ken ihyan. A kaa a mo ér, un soo u nyôron ga, sha ci u un soo u yangen mo tom ga, kpa gema imbyulugh la nam man yem. Ngôm yange wa koti u wuhee ken imbyulugh la. Iyua i yange nam ne umbur mo kwagh u Hana yange a za na wan na Samuel ikyondo shighe u lu eren tom ken tabernakel la.—1 Sam. 2:18, 19.

MAKERANTA U GILEADI U M ZA LA KA KWAGH U HUNGUR MO GA

Ken inyom i 1947 la, i lôhô se iorov utaan mba se lu eren tom shin Betel yô, ér se za Makeranta u Gileadi ken tar u Amerika, nahan ka ker ken inyom igen yô, se za makeranta ne u sha kwa 11 la. Shighe u se za nyôr ken Amerika la, ndôhôr vegher u ken imbusutarimese i kpentar u New York, ape i eren makeranta  ne la kpishi. Yange doom kpishi er m lu a koti u wuhee u ngôm nam la nahan!

Iwer ataratar i m lu ken makeranta u Gileadi la ka kwagh u hungur mo ga. Er m lu vea mbayevmakeranta mba ve due ken ityar 16 la imôngo yô, m seer zuan a mfe sha akaa kposo kposo, shi m gema gbenda u m nengen ior mbagenev la kpaa. Yange m ngohol ityesen i i wasem u seer kporom ikyua a Yehova yô, shi m luun imôngo vea Mbakristu mba vian tsema tsema kpaa. Môm ken mba se za makeranta la imôngo yô, lu Lloyd Barry, anmgbian Albert Schroeder di lu môm ken mba ve tesem la, John Booth di lu abashia u Kingdom Farm (Sule u Tartor), (ape i ver Makeranta u Gileadi la); mban cii va hingir Mbahemenev mba Shin Itine. Kwaghwan u anmgbianev mban yange ve wam sha dooshima la doom kpen kpen, kua ikyav ve i tilen sha mimi hen Yehova man nongo na la kpaa.

M ER TOM U SÔRON ATÔÔANONGO SHI M HIDE M YEM SHIN BETHEL

Yange m been Makeranta u Gileadi yô, i tindin ér m za er tom u sôron atôônanongo ken kpentar u Ohio ken tar u Amerika. Shighe la m lu anyom 21 tseegh, nahan kpa, anmgbianev mbara wuese gbashima u m lu a mi sha inja i gumor la, shi ve eren kwagh a mo kundu kundu. Yange m hen kwagh sha ikyev i mbaganden mba hen ningir la kpishi.

Iwer ngi karen kpuaa yô, i kaa ér mo m hide shin Betel u ken Brooklyn la, a za seer tsaase mo. Hen shighe la, m hingir u fan mtuunum, er Milton Henschel man Karl Klein man Nathan Knorr man T. J. (Bud) Sullivan kua Lyman Swingle nahan, mban cii ve va hingir Mbahemenev mba Shin Itine. Yange lu kwagh u doon kpishi u nengen er ve lu eren tom, shi nengen aeren a ve a Mbakristu la. Vangertiôr u m lu a mi ken nongo u Yehova la seer kpishi je. Yange i hide i tindim ken veghertar u Yuropa ér m za za hemen a tom u pasen kwagh ker.

Ngôm yange kpe ken inyom i 1950 la. Mba iin ku cii yô, m lam a terem man anmgbian wam u kwase u vesen, Dora. Yange m pine ve mer ve ôrom sha mimi, kwagh u ve we ishima u eren, hegen u Ngô wase a kpe, shi mo kpa m undu ya ne. Yange ve fa anmgbian Harry Browning, u bee iyol shi lu môm ken Mbakristu mba i shigh ve mkurem la, shi ve naan un icivir kpaa. Nahan ve lumun ér a lam a ve ken Mkaanem ma Aôndo. Ka kom inyom i môm yô, i er Terem vea Dora batisema. Ken masejime yô, i tsua Terem ér a lu ortamen ken Tiônnongo u ken Gillingham la. Terem kpe kera yô, Dora vôso Roy Moreton, u lu ortamen u jighjigh, shi civir Yehova sha mimi zan zan kar kpen ken inyom i 2010 la.

M ZA WASE TOM KEN TAR U FRANCE

Yange m hen zwa French man zwa Jaman kua zwa Latin ken makeranta, kpa zwa French hemba taver mo cii. Nahan shighe u i kaa a mo ér m za wase tom shin Betel u ken gar u Paris, ken tar u France yô, ishima tam akperan kpishi. M ze yô, m za hingir u eren tom vea Henri Geiger, ortamen u nengen sha afishi a branci, u bee iyol shi lu môm ken mba i shigh ve mkurem la. Tom la lu u kiriki ga cii, shi m er akaa a kpeegh kpishi je kpaa, kpa m gema m hen u eren kwagh a uumace mbagenev ken bem.

Heela tseegh ga, shi m lu môm ken mba wan agoyol sha ci u mkohol u ityar ityar u i hii eren ken Paris ken inyom i 1951, shighe u ityav bee ica lu a gba ga la. Ortamen u zenden sha ugen, u lu gumor yô, iti na ér Léopold Jontès, yange va shin Betel sha u va wasen mo tom. Ken masejime yô, Léopold hingir ortamen u nengen sha afishi a branci. Yange i er mkohol u ityar ityar ne ken agirigi u i yer ér Palais des sports la, ikyua a imaagh ki i yer ér Eiffel Tower la. Ior mba ken ityar 28 yange ve va mkohol ne. Sha iyange i masetyô la, saan Mbashiada mba ken tar u France mba kuman iorov 6,000 la iyol kpishi u nengen a iorov 10,456 mba ve va mkohol ne la.

 Shighe u m za nyôr ken tar u France sha hiihii la, m lu a fa zwa French tsembelee ga. Kwagh u yange m er u hemba vihin je yô, m soon u lamen zwa French ga, saa kwagh u m hen mer m fa u ôron tsembelee tseegh. Kpa aluer u cia wer u va ôr kwagh shami ga yô, mayange a fatyô u kôôm we ga, shi u fatyô u zan ikyura kpaa ga.

M nôngo mer me bee a mtaver ne, nahan m za nyôr makeranta u tesen mbavannya mba ken ityar igen zwa French. M zaan kwaghhenen aikighe, shighe u se lu a mkombo ga yô. Tsô m hii u soon zwa French, nahan er ayom lu karen la, m lu hemban soon kwagh u ú cii. Kwagh ne yange wasem kpishi je, sha ci u m va kôrcio u wasen tom u geman kwagh ken zwa French, hen afishi a branci a ken tar u France ne. Shighe kar yô, m hingir orgeman kwagh iyol yam, m gema zwa Buter ken zwa French. Yange lum kwagh u civirigh kpishi u geman kwaghyan u injaa u ken jijingi, u nongo u wanakiriki ne u ne la sha ci u anmgbianev mba lamen zwa French mba sha tar cii la.—Mat. 24:45-47.

IVESE MAN AAN A TOM AGEN

Ken inyom i 1956 la, m vôso Esther, pania ugen ken tar u Switzerland, u yange se vande fan ayol a ase kera, ken anyom a karen ken ijime la yô. Se er ivese ken Iyou i Tartor i i̱ lu ikyua a iyagh ki Betel u ken London (ape i yilan tsuaa tsuaa ér London Tabernacle, henpe yange i er ngôm batisema la). Lu Anmgbian Hughes yange na kwaghôron u ivese yase ye. Ngômkem kpa yange lu her; un kpa lu a ishimaverenkeghen i yemen sha. Yange m zua a ikyar u mimi u ken ivese, u doon mo ishima tseegh tsô ga, shi m zua a shighe u dedoo a lun imôngo vea ngômkem u fan kwagh, u akaa a ken jijingi gba un ishima yô, zan zan kar kuren tom na shin tar ken inyom i 2000 la.

Se mba eren ivese kera yô, mo vea Esther se due se lu tsan ken won u Betel. Kpa m za hemen u wasen tom u geman kwagh shin Betel, kwase wam Esther di lu eren tom u ikpur pania ken uharegh mba ve kase gar u Paris la. Yange wase ior kpishi ve hingir mba civir Yehova. Ken inyom i 1964 la, i lôhô se ér se yem shin Betel. Shighe u i hii veren Ukômatii mba Nengen sha Branci ken inyom i 1976 la, i tsuam ér mo kpa m lu môm ken kômatii la. Ken anyom a karen la, Esther za hemen u suen mo sha dooshima hanma shighe.

“NÉ LU A MO GBEM GA”

Yange m lu a ian i civirigh i hiden zan ken afishi a shin itine a a lu ken gar u New York la sha ashighe ashighe. Yange mea za yô, m zua a kwaghwan u dedoo sha ikyev i Mbahemenev mba Shin Itine kposo kposo. U tesen ikyav yô, kwagen la, ishima lu nyian mo sha kwagh u tom wam; lum er me bee u sha shighe ga nahan, tsô Anmgbian Knorr se teghelee, maa kende kaa a mo ér: “Ishima i de ze u iyol ga. Er tom wou!” Hii shighe la je, hanma kwa u m ngee a tom kpishi yô, ishima kera zem iyol ga, kpa ka m hii u eren u, tegh tegh tsô m kar been, man ashighe kpishi ka m bee u sha shighe vough.

Cii man ku u Yesu yô, a kaa a mbahenen nav ér: “Né lu a Mo gbem ga.” (Mat. 26:11) Se mba se lu iyôngo igen ne kpa se fa je ser, se lu a anmgbianev mba Kristu mba i shigh ve mkurem mbara sha tar gbem ga. Sha nahan yô, m nenge ian i eren tom vea mba i shigh ve mkurem imôngo je hemban anyom 70 la mer, ka ian i civirigh kpen kpen. Doom kpishi u kôron mkaikyondo u Oryuda la.

[Ngeren u shin kpe]

[Mkaanem ma sha peeji 21 la]

Anmgbian Knorr se teghelee, maa kende kaa a mo ér: “Ishima i de ze u iyol ga. Er tom wou!”

[Ufoto mba sha peeji 19]

(Ken imese) Ngôm vea terem

(Ken iyan) Ken makeranta u Gileadi ken inyom i 1948 la, m huwa koti u Ngôm nam la

[Foto u sha peeji 20]

Shighe u i lu tseghan afishi a branci a ken tar u France ken inyom i 1997 la, m lu eren tafinta sha kwaghôron u Anmgbian Lloyd Barry lu nan la

[Ufoto mba sha peeji 21]

(Ken imese) Mo vea Esther sha iyange i se er ivese la

(Ken iyan) Ken tom u pasen kwagh imôngo