Mbampin mba Mbaôron Takerada Ne Ve Pin La

Aluer m ngu a mpin sha ma kwagh u m er ken Bibilo, shin m soo u zuan a kwaghwan sha ma zayol u m lu a mi yô, ka nyi me ere?

I taver hanma wase ishima ken Anzaakaa 2:1-5 ér se “ker” mkav, er ka se ker “akaa a injaa a i yer” a nahan. Kwagh ne tese ér gba u se nôngo kwagh kpoghuloo sha u keren mbamlumun sha mbampin mba se lu a mi sha kwagh u se er ken Bibilo la shi nengen sha mbamzeyol asev kpaa. Se er kwagh ne nena?

Takerada u Benefit From Theocratic Ministry School Education la tese se u tôvon sha kwagh ken ityakerada i “wanakiriki u jighjigh man u fan kwagh” a ne se la. Ngeren u a hii sha peeji 33 zan zan 38, u a lu a itinekwagh ér “How to Do Research” la pase kwagh ne. (Mat. 24:45) I pase sha peeji 36 la er se er tom a takerada u i yer ér Watch Tower Publications Index, u i pav ngeren man avur a Bibilo i ver vough vough ken hanma mgber u ú la yô. Kwagh ne ka a wase se u keren kwagh u se soo la sha asember shin a avur a Bibilo, nahan fan ityakerada i se fatyô u zuan a kwagh u se keren la ker yô. Kundu ishima shighe u ú lu keren mlumun sha ma mpin shin kwaghwan sha ma zayol wou yô. Umbur wer, u ngu keren “akaa a injaa a i yer” a, a ka i tôô shighe i ker a kpoghuloo ve i zua a mi la.

Nahan kpa, avur a ruamabera kua atineakaa agen nga, a i pase kwagh sha mi ken ityakerada yase jighilii ga yô. Shi avur a Bibilo a se pase kwagh sha mi je kpa, alaghga gbenda u se pase la a zua sha kwagh u a tsume u la jighilii ga. Heela tseegh ga, mpin ka a due hen ijiir igen ken Bibilo sha ci u ka akaa cii i pase ken Ruamabera vindi vindi ga. Sha nahan yô, ka hanma mpin u or pin se cii se fatyô u zuan a mlumun u nan sha mi fese je ga. Shighe u kwagh a lu nahan yô, doo u se ker ahaba sha akaa a se fetyô u nan mlumun sha mi ga la ga, sha er se palegh kwagh u a lu “anyiman a gbilinigh tsô, i kera lu ityesen i Aôndo i sha jighjigh u nan la ga” yô. (1 Tim. 1:4; 2 Tim. 2:23; Titu 3:9) Afishi a branci shin afishi a shin tine kpa nga a ian i tôvon shi nan mlumun sha amba a mpin a i lu a ôr kwagh sha mi ken ityakerada yase ga la ga. Er Bibilo i er se kwagh u una wase se ken uma, kpa i pase se akaa kpishi vindi vindi ga, sha u se na Aôndo u a nger i̱ la jighjigh taveraa nahan, i kuma se.—Ôr takerada u Kporom hen Yehova la, sha peeji 185 zan zan 187.

Kpa aluer u nôngo sha afatyô wou cii wer u zua a kwaghwan shin mlumun sha ma zayol u ú lu a mi, kpa u zua a mi ga di ye? I̱ de taver we u za kohol ma anmgbian u nan vighe ken jijingi, shin ma ortamen u hen ityônya ga. Ve fa Bibilo kpishi shi ve via ken mlu u Orkristu la tsembelee. Aluer u ngu keren iwasen sha zayol wou shin sha ma kwagh u ú tsough u eren yô, iwasen i vough i mbatamen vea na u la ia hemba lun we a inja, sha ci u ve fa u shi mba ikyua a we ken mlu wou la. Shi i de hungur we u eren msen hen Yehova sha akaa a a ze u iyol la, sônon un wer icighan jijingi na a hemen we ken mbamhen ou ga, “gadia TER ne kwaghfan, mfe kua mkav.”—Anz. 2:6; Luka 11:13.