Lu Per Er Yeremia Nahan
Lu Per Er Yeremia Nahan
“[Mo Yehova,] ishima ngim per sha kwaghôron Wam sha u Me kure un vough yô.”—YER. 1:12.
1, 2. Er nan ve Yehova tôô mlu u a ‘lu per’ la tese ikyav sha kon u amondi?
KON u amondi ngu môm ken ikyon i sha agungu a Lebanon man a Iserael, i i vanden kparen yô. Uwer u Janawari yange ua been shin a̱ kôron a kôr ken uwer u Febewari nahan maa u hii u kparen uikparen mba lun nyian man pupuu mba doonashe. Inja i iti i kon ne ken zwa Heberu ér, “kon u nderen.”
2 Shighe u Yehova tsua Yeremia ér a lu profeti na la, a tôô kon u amondi ne a tese ikyav sha kwagh u vesen, u lu eren yô. Sha mhii u tom na u profeti la, i tese un gbaa u kon u amondi ne ken mpase u sha mnenge. Inja i mpase ne lu nyi? Yehova pase ér: “Ishima ngim per sha kwaghôron Wam sha u Me kure un vough yô.” (Yer. 1:11, 12) Yehova lu “nderen faa” sha injakwagh, sha u tindin uprofeti nav ér ve ta ior nav icin sha kwagh u una tser ve sha ihyembeato ve yô, er kon u amondi yange u ‘nder’ faa, u kpar nahan. (Yer. 7:25) Man lu u una mem u eren kwagh ne shighe môm ga; una ‘lu per’ zan zan kwaghôron na u profeti la una kar kuren. Ken inyom i 607 C.S.Y. la, Yehova tsaha tar u Yuda, u u venda mimi la sha shighe u yange ver la vough.
3. Ka nyi se ne jighjigh ser Yehova una er keng-ne?
3 Kape nyian kpa Yehova a lu per sha u kuren awashima na je la. Mayange una de er mkaanem nam ma saa gbilin ga. Er Yehova a lu per sha u kuren awashima na nahan, u ngu eren nena? U na jighjigh wer, ken inyom i 2011 ne, Yehova ‘ngu per’ sha u kuren mbaawashima nav kpa? Aluer sea vande mban a akperan sha kwagh u uityendezwa mba Yehova mba vea kure kpee a bunde ga la yô, hegen ka shighe u se lu tsevaa, se de u meer mnyam ken jijingi je ne. (Rom. 13:11) Er Yeremia lu profeti u Yehova yô, un kpa lu per. Aluer se tôv sha ityôkyaa i yange na ve Yeremia lu per sha tom na u Aôndo na un la, man gbenda u yange lu per la kpaa yô, kwagh ne una wase se u fan er se er ve se taver ishima ken tom u Yehova a ne se ne yô.
Loho u Torough Torough
4. Ka mbamtaver mba nyi Yeremia yange tagher a mi ken loho u lu yôôn la, man lu nyi i na ve gba u una yôô u torough torougho?
4 Alaghga Yeremia yange zurum anyom 25 shighe u Yehova na un tom u orkuran la. (Yer. 1:1, 2) Kpa Yeremia nenge ér un ngu an-ye u kpuaa yum; un yina u za lamen sha ishigh ki mbatamen mba ken tar la mba ve lu mbakavenshigh shi ve lu sha aan a utaha kpaa la. (Yer. 1:6) Yange lu u una pase kwagh u yuan ior ken ishima shi una yôô ijirôron i cieryol, hemban cii je yô, hen upristi kua uprofeti mbaaiev man hen utor kua shi hen mba ve ‘kôr igbenda ve’ kua mba ve ‘lu a mhirjime u gbem’ la kpaa. (Yer. 6:13; 8:5, 6) Lu u a va yôhôr icighantempel u tor Solomon, u lu ijiirtamen i mcivir u mimi je nôngo u kuman anyom deri unyiin la. Lu u Yerusalem man Yuda vea hingir ice, shi a kura ior vev a yem a ve uikyangen. Sha kpôô yô, loho u i tindi Yeremia er a za ôr la lu u torough torough!
5, 6. (a) Yehova ngu eren tom a nongo u Yeremia la nyian nena? (b) Ka nyi se lu timen sha mi ken kwaghhenen nee?
5 Sha shighe wase ne kpa Yehova tese uumace dooshima, a ver Mbakristu mba i shigh ve mkurem la mba er ka mbakuran nahan, sha u tan ior icin sha kwagh u ijir i a lu ôron tar ne la. Nongo u Yeremia ne ndera taver ior asema ér ve ver ishima sha ashighe a se lu ker ne, kuma upuembaanyomov imôngo hegen. (Yer. 6:17) Bibilo tese wang ér Yehova u a lu Orkuranshighe u Hemban Cii ne ngu eren a er negh negh ga. Iyange na la ia va sha shighe vough, sha shighe u uumace ve ver ishima ga yô.—Sef. 3:8; Mar. 13:33; 2 Pet. 3:9, 10.
6 Fa wer Yehova ngu per shi una va a tar u he u perapera la sha shighe vough. Mfe u se fe kwagh ne la a̱ mgbegha nongo u Yeremia ne, shi a̱ wase anmgbianev vev mba ve tsegh ayol a ve la u fan er loho u ve lu pasen la u hembe lun torough torough hegen cii yô. Ú ngu eren nena sha kwagh ne? Yesu yange kaa ér gba u ior cii vea ta ikyaa a Tartor u Aôndo. De se time sha aeren atar a yange Yeremia lu a mi ve wase un u lun per ken tom u i na un la, man er se kpa kwagh la una wase se u lun per yô.
Ior Doo Un Ishima
7. Pase er dooshima yange mgbegha Yeremia u pasen kwagh, shin er lu tagher a mbamlu mba taver nahan je kpaa la.
7 Shin er Yeremia tagher a mbamlu mba taver nahan kpa, lu nyi i mgbegha un u pasen kwagha? Ior yange ve doo un ishima. Yeremia fa er ior kpishi lu yan ican sha ci u ieren i mbakuran mba aiev yô. (Yer. 23:1, 2) Mfe ne wase un u eren tom ne sha dooshima man sha mhôôn kpaa. Yange soo wener ior mba hen ityô na ve̱ ungwa imo i Aôndo sha er vea lu uma yô. Yange ve doo un ishima je a vaa sha kwaghbo u lu van sha a ve la. (Ôr Yeremia 8:21; 9:1.) Takerada u Ukwelegh pase vighe vighe ér iti i Yehova man ior nav yange gba Yeremia kwagh shi doo un ishima tsung. (Ukwe. 4:6, 9) Nyian ne, ka wea nenge a̱ “tumbul a [ior, vea] sambe wuee er iyôngo i i lu a orkuran i ga” nahan, i sar u pe ôron ve loho u Tartor u Aôndo ú msurshima la ga he?—Mat. 9:36.
8. Kanyi i tese ér Yeremia yange ya ican kpa vihi ishima ga?
8 Yeremia yange ya ican sha ikyev i ior mba soo u wasen ve la, nahan cii kpa, a or iyev shin a vihi ishima ga. Yange waan ishima a ior shi kunya kôron un a ve, kua Tor Sedekia, u wan ifer la kpaa! Shighe u Sedekia na zwa ér i za wua Yeremia la kpa, a shi a zamber a na ér ma a shi ongo imo i Yehova. (Yer. 38:4, 5, 19, 20) Ior doo se ishima tsung er Yeremia nahan kpa?
Ishimataver i Aôndo Na Un La
9. Er nan ve se fe ser lu Yehova na Yeremia ishimatavera?
9 Shighe u Yehova ôr kwagh a Yeremia sha hiihii la, yange soo u nagher iyol. Kwagh ne wase se u fan ér, gbashima man ishimataver i Yeremia va tese la yange lu sha tahav nav ga. Jighilii yô, ka er Yeremia suur sha Aôndo tôô ave sha ve, zua a agee kpishi er tom na u profeti la kar kuren ye. Mimi je, Yehova yange lu a profeti ne “er orageegh u cier iyol” nahan, gadia a sue Yeremia shi a na un tahav mbu eren tom u i na un la kuren u doo doo kpaa. (Yer. 20:11) Yange i fa Yeremia ér ngu a vangertiôr man ishimataver je yô, shighe u Yesu lu eren tom u pasen kwagh shin tar ne la, mbagenev lu kaan er ka Yeremia a nder shin ku ye!—Mat. 16:13, 14.
10. A fatyô u kaan ér, i ver asande a mba i shigh ve mkurem la “sha akuraior man sha ityartor” sha ci u nyi?
10 Er Yehova a lu ‘Tor u akuraior’ yô, yange tindi Yeremia ér a za yôô ijirôron na hen akuraior man ityartor. (Yer. 10:6, 7) Kpa ka sha nyi gbenda nahan i ver asande a mba i shigh ve mkurem la ‘sha akuraior man sha ityartoro’? (Yer. 1:10) Tor u Hemban sha won cii na nongo u Yeremia ne tom, vough er profeti u tsuaa la kpa yange na un nahan. Sha nahan yô, Aôndo na mbacivir un mba i shigh ve mkurem mbara tahav mbu yôôn ijirôron i Aôndo sha akuraior man ityartor sha tar cii. Nongo u Yeremia ne zua a tahav her Aôndo Uhembansha, nahan mba lamen zwa u wang u ken Mkaanem nam ma a ne i nger la, pasen ér a va wuhe akuraior kua ityartor i i lu sha tar nyian ne cica cii kera shi a tim i, sha shighe u Aôndo a ver la kua sha gbenda u a tsough la kpaa yô. (Yer. 18:7-10; Mpa. 11:18) Nongo u Yeremia ne kange ishima ér mayange vea gba uwer sha tom u Yehova Aôndo a ne ve u yôôn loho na u ijirigh tar sha won cii la ga.
11. Kanyi ia wase se ve se za hemen u pasen kwagh a uwer gban shio zum u se tagher a mbamlu mba tavera?
11 Ashighe agen ka sea tagher a ahendan shin ior vea venda u keghen ato a loho wase shin sea tagher a mbamlu mba taver yô, iyol i kpe se. (2 Kor. 1:8) Kpa se wa nen ityough er Yeremia nahan, iyol i de kpe se ga. Yô, hanmô wase nana za hemen u sônon Aôndo, shi suur sha a na, shi ‘lun a vangertiôr’ her a na sha u a wase se yô. (1 Tes. 2:2) Er se lu mbacivir Aôndo sha mimi yô, gba kpee u se za hemen u lun per, eren ityom i Aôndo a we se sha ikyev la. Gba u se za hemen u pasen kwagh u mtim u Mbakristu Mbaaiev, mba ve til sha ityough ki Yerusalem u yange lu jighjigh her Aôndo ga la, aa uwer gban shio. Nongo u Yeremia ne ka u ua yôô di “inyom i erdoo u TER” tseegh tsô ga, kpa vea yôô “iyange i iyevoron i Aôndo wase” kpaa.—Yes. 61:1, 2; 2 Kor. 6:2.
Iember i Vesen
12. Se fatyô u kaan ser Yeremia yange za hemen u lun a iember ken tom na sha ci u nyi, man ka kwagh u vese u nyi yange na ve kôrcio u eren nahana?
12 Yeremia yange zua a iember ken tom na. A kaa a Yehova wener: “Ka a zua a akaaôron a Ou yô, m ya a, akaaôron a Ou hingir mo iember man msaanyol ken ishima yam; gadia i yilam sha iti You je, TERE.” (Yer. 15:16) Yeremia yange nenge wener, u tilen sha ityough ki Aôndo shi pasen mkaanem nam la ka ian i civirigh je zua ga. Doo u se fa ser, zum u Yeremia va hingir u wan ikyo sha tarnahan u ior nahan un la yô, tom la kera lu un a iember ga. Kpa zum u a hide a ver ishima sha mdoom ma loho u lu pasen la man er u lu hange hange yô, iember na hide her.—Yer. 20:8, 9.
13. Er nan ve i lu hange hange u se koson ayol a ase sha kwaghyan u taver u ken jijingi ve se za hemen u lun a iembere?
13 Kwagh u una na ve se za hemen u lun a iember ken tom wase u pasenkwagh nyian yô, ka u koson ayol a ase sha “kwaghyan u taver,” ka mimi u zan shimi u ken Mkaanem ma Aôndo je la. (Heb. 5:14) Kwaghhenen u zan shimi tsung la wasen se u lun a jighjigh u nan taveraa. (Kol. 2:6, 7) Kwagh ne wasen se u fan ser akaa a se eren la nga a bende a Yehova jighilii. Aluer ka taver se u zuan a shighe u ôron Bibilo yô, doo u se hide se gbidye kwar sha akaa a se we ave u eren la. Shin aluer hanma iyange se mba tôôn miniti kpuaa tseegh henen kwagh shi gbidyen kwar kpa, kwagh ne una na se ‘iember man msaanyol u ken ishima,’ er Yeremia kpa yange zua a mi nahan.
14, 15. (a) Er Yeremia ver ishima sha tom u í na un la zumbee yô, ka nyi yange i̱ due kere? (b) Kanyi ior mba Aôndo ve kav nyian sha kwagh u tom u kwaghpasene?
14 Yeremia yange pase ijirôron kua icintan i Yehova gba wer ga, kpa shi fa ken ishima ér, tom na yô lu “u maan man u lôôn.” (Yer. 1:10) Tom na u maan man u lôôn la yange ume atam. Mbayuda mbagenev kua mba ve lu Mbaiserael ga la, ve war mtim u Yerusalem u ken inyom i 607 C.S.Y. la. Se fa kwagh u mwar u ônov mba Rekabi man Ebedimeleki kua Baruki la. (Yer. 35:19; 39:15-18; 43:5-7) Akar a Yeremia a yange tile sha mimi shi cian Aôndo la, tile sha ityough ki mba ve lu a ishimaverenkeghen i va yan dyako u tar, mba ve ye ikyar a nongo u Yeremia nyian la. Saan nongo u Yeremia ne iyol kpishi u wasen “zegeikpelaior” ne u taver ken jijingi je zua ga. (Mpa. 7:9) Kape akar a mba i shigh ve mkurem, aa a til sha mimi la kpa a lu zuan a mkom tsung sha u wasen mbaasemaamimi sha u ve zua a mfe u fan mimi la je la.
15 Ior mba Aôndo kav ér, mpase u pasen loho u dedoo la saa sha u eren tom sha ci u mtsera u mbagenev mba vea ungwa la tseegh ga, kpa ka gbenda u se civir Aôndo wase kpaa. Or a̱ kegh ato a vese shin nana̱ kegh ga kpa, u se eren Yehova icighantom sha u pasen kwagh la ne se iember i vesen.—Ps. 71:23; ôr Mbaromanu 1:9.
‘Lu Per’ sha Tom U I Ne U La!
16, 17. Kwagh u i nger ken Mpase 17:10 la, man u i nger ken Habaku 2:3 la tese ér se mba ken ayange a masejime nena?
16 Ka sea gbidye kwar sha kwaghôron u profeti u Aôndo a ne i nger ken Mpase 17:10 la yô, se hemba kaven er ayange a se lu ker ne a lu a masejime yô. Tor u sha utaankaruhar, u a lu Tahav mbu Tar cii mbu Amerika vea Ingila la, ngu hemen. Bibilo ôr kwagh u tartor la kaa ér: “Zum u [tor, ua lu tartor u sha utaankaruhar la] una va yô, una tema keng kpa á lu anshighe kpeghee tsô.” Hegen nahan “anshighe kpeghee” la una lu ikyua ikyua u been. Profeti Habaku na se ibumun sha kwagh u mkur u tar u ifer ne kaa ér: “Mpase u sha mnenge ne ngu keghen shighe na, . . . kegh un, gadia una va kpee, una bunde ga.”—Hab. 2:3.
17 Pine ase iyol you wer: ‘Uma wam tese ér mimi je m umbur mer ayange a se lu ker ne ka a masejime kpa? Uma u m eren ne ngu tesen ér m ngu veren ashe mer mkur la a̱ va fefa kpa? Shin akaa a m tsough u eren shi a hembe gban mo ishima la nga tesen ér m ver ishima mer mkur la una va fele ga, shin nga tesen ér kam er una va a va ga kuaa?’
18, 19. Er nan ve hegen i lu shighe u gban uwer ga?
18 Tom u orkuran, u nongo u Yeremia la ngu a kure ga. (Ôr Yeremia 1:17-19.) Ka kwagh u saan iyol kpishi er asande a mba i shigh ve mkurem la ve til her ve tenger ga, er “ityôgh ki iyôgh” man “garutya” nahan la! Ve ‘tsule kwange u mimi hen uya,’ inja na yô, ve de ér mkaanem ma Aôndo ma taver ve asema zan zan vea kar eren tom ve tan ikpi. (Ef. 6:14) Nongo u u lu zegeikpelaior la di kpa kange ishima ér vea sue nongo u Yeremia ne ken tom u Aôndo a ne ve la sha gbashima je.
19 Hegen ka shighe u gban uwer u eren tom u Tartor ga, kpa ka shighe u i doo u se time sha inja i kwagh u i nger ken Yeremia 12:5 la yô. (Ôr.) Hanmô wase nan tagher a mbamzeyol mba i gbe u nana wa ishima a ve keng yô. Alaghga akaa a á lu karen jighjigh wase u nan hegen ne nga inja er ka “mbazenden sha angahar” mba se lu gban ayem a ve nahan. Heela tseegh ga, er “zegecan” la a lu mgbôghom ne, mbamtaver vea lu seer a seer. (Mat. 24:21) Se fatyô u tôôn mbamtaver mba se va tagher a mi ken hemen la karen sha ayem a “nyôngoso a anyinya.” Saa or a lu a ishimataver tsung ve nana fatyô u nyôngoso a anyinya ye. Nahan ka a inja u wan ishima a mbamzeyol mba se tagher a mi hegen, mba alaghga vea wa se ago iyol u va wan ishima a mba se va tagher a mi ken hemen la.
20. U kange ishima wer u er nyi?
20 Se cii se fatyô u dondon ikyav i Yeremia la sha u eren tom u pasenkwagh u i ne se la kuren u doo doo! Aeren er dooshima man ishimataver kua iember i Yeremia lu a mi la mgbegha un u eren tom na u u tôô un anyom a kuman er 67 nahan la kuren u doo doo. Ikparen i kon u amondi i doonashe la umbur se ér Yehova una ‘lu per’ sha kwaghôron na sha u kuren un. Se kpa, se mba a ityôkyaa i injaa i eren nahan. Yeremia yange ‘lu per,’ se kpa se fatyô u lun per.
Baver We Kpa?
• Dooshima yange wase Yeremia u ‘lun per’ ken tom na nena?
• Er nan ve i gbe u Aôndo una na se ishimatavera?
• Lu nyi i wase Yeremia ve za hemen u lun a iember ken tom na?
• Er nan u soo wer u ‘lu per’?
[Mbampin mba ngeren u henen]
[Ufoto u sha peeji 31]
Ú za hemen u pasen kwagh her shighe u ú tagher a ahendan kpa?
