Atôakyaa A Ior Ve Ne La Yehova Nengen A Nena?

OR LA kaa ér, “Kwase u U nem Wer a̱ lu a mo imôngo la, ka un a nem atam a kon la, m ye ye.” Kwase la di gema kaa ér, “Ka iyô, i tsughum, ve m ye ye.” Mkaanem ma mbamaren asev mba hiihii, Adam man Ifa ôr a Aôndo mara lu mhii u uumace hii u nan atôakyaa a keren ishô je la.—Gen. 3:12, 13.

Ijir i Yehova ôr Adam man Ifa sha ihyembeato ve i sha apera la tese ér un lumun a atôakyaa a ve na la ga. (Gen. 3:16-19) Nahan se kure ikyaa ser Aôndo vende atôakyaa cii shinii? Shin ngu a lumun atôakyaa agen ér ka a injaa? Una lumun agen yô, se er nan ve se fa mkposo u atôakyaa a injaa man a injaa ga laa? De se hii nengen er i pase inja i ishember i ityôkyaa la sha er se na mlumun sha mpin ne yô.

Ityôkyaa ka kwaghôron u or er sha ci u pasen er i hii ve nan er ma kwagh shin nan er ga, shin i lu u nana er ma kwagh ga yô. Ityôkyaa ia fatyô u lun kwaghôron u injaa u pasen kwagh u or nan er shami ga, shi una fatyô u lun a zamber u mimi ker, sha er a zungwe or la mhôônom shin a de nan kwaghbo yô. Nahan kpa, ityôkyaa ia fatyô u lun kwaghôron u sha atseregh shin u aiegh shin u or nan er a awashima u yeren kwagh u a lu ityôkyaa jim jim yô, er yange Adam man Ifa er nahan. Er ashighe kpishi atôakyaa ka a nôngo u lun a aiegh yô, ior kpishi atôakyaa nga kom ve ga.

Zum u se lu nan atôakyaa yô, gba u se ver ishima se palegh u ‘tsughun ayol a ase,’ man hemban je yô, aluer atôakyaa shon gba zua vea mcivir wase yô. (Yak. 1:22) Sha nahan yô, de se time nen sha akav a ken Bibilo kua atindiakaa agen a aa wase se se za hemen u ‘keren fan kwagh u a doo Ter ishima yô.’—Ef. 5:10.

Kwagh u Aôndo a Soo Ér Se Er La

Se zua a atindiakaa sha akaa kposo kposo ken Mkaanem ma Aôndo, a i gbe u se ior mba Yehova se kura yô. U tesen ikyav yô, tom u Kristu wa ér “za nen, za gema nen akuraior cii a̱ hingir mbahenen” la, ka tindi u a lu sha ci u mbadondon Kristu mba mimi nyian kpaa yô. (Mat. 28:19, 20) Ka hange hange u se kuran tindi la, je apostoli Paulu yange kaa ér: “Aluer me ôr Loho u Dedoo ga yô, kwagh á tserem.”—1 Kor. 9:16.

Nahan cii kpa, mbagenev mba ve hen Bibilo a vese ica i gbe la mba cian ashe u pasen loho u dedoo u Tartor u Aôndo zan zan hegen. (Mat. 24:14) Mbagenev mba yange ve eren tom u pasen kwagh la kpa ve de hegen. Ka atôakyaa a nyi nahan ashighe agen mba ve pasen kwagh ga la ka ve na? Yehova yange er a ior mba sha ashighe a tsuaa, mba ve ta anu sha akaa a á kaa ér ve er la nena?

Atôakyaa A Aôndo A Lumun a Mi Ga Yô

“Tom la taver yum.” Alaghga a lu mbagenev er tom u pasen kwagh la taver gande nahan, hemban je yô, mba ve cie ashe sha marami la. Nahan kpa, nenge ase kwagh u ikyav i Yona la i tese se yô. Yange i na un tom u ú taver un u eren kpishi yô; Yehova kaa a na ér a yôô mtim u lu van sha Ninive yô. Taver u fan er hii ve cier Yona iyol u eren tom la ga. Gadia Ninive lu gartamen u Ashiria, man Mbaashiria gema lu ior mba i fa ve sha tswam u eren kpoghuloo yô. Alaghga Yona yange una pine  ér: ‘Me za hen ior mbara nahan me war kpa?’ ‘Vea er a mo nena?’ Ica i gbe ga yô, Yona gba toho. Nahan kpa, Yehova lumun a ityôkyaa i Yona lu a mi la ga, hide tindi un ér a za pase ior i Ninive kwagh. Kwa ne yô, Yona taver ishima er tom u i wa un la, nahan Yehova ver tom na la doo doo.—Yona 1:1-3; 3:3, 4, 10.

Aluer u nenge wer tom u pasen loho u dedoo la ngu u ican gande yô, umbur wer “her Aôndo yô, akaa cii a fatyô.” (Mar. 10:27) Fa wer aluer u za hemen u sônon Yehova wer a wase u yô, una na u agee, shi fa kpaa wer una ver u doo doo, zum u ú taver ishima u er tom wou u pasen kwagh la yô.—Luka 11:9-13.

“M soo u eren u ga.” Aluer u ngu a isharen i eren tom wou u pasen kwagh, u Mbakristu la ga yô, u er nena? Umbur wer Yehova una fatyô u eren tom ken a we, nahan benden a asaren a ou. Paulu kaa ér: “Ka Aôndo je A lu eren tom ken a ven ye, sha u kwagh u a doo Un la a̱ sar ne, shi ne̱ eren sha mi kpaa.” (Fil. 2:13) Sha nahan yô, u fatyô u sônon Yehova wer a na ú lu a isharen i eren ishima na. Lu kwagh u Tor Davidi er vough je la. Yange sôn Aôndo ér: ‘Na m zende ken mimi Wou.’ (Ps. 25:4, 5, NW.) We kpa u fatyô u eren nahan sha u sônon Yehova sha gbashima wer a mgbegha ishima you sha er u lu a isharen i eren kwagh u sha ishima na yô.

Ka mimi, aluer se vôr shin iyol kpe se yô, alaghga ashighe agen a gba u se kighir ayol a ase ve se za mkombo ken Iyou i Tartor shin se er tom u pasen kwagh la ye. Aluer kwagh ngu nahan yô, doo u se kure ikyaa ser Yehova doo se ishima sha mimi ga shinii? Mayange ga cii. Mbacivir Aôndo mba jighjigh mba sha ashighe a tsuaa la kpa yange i gba u vea nôngo kwagh kpoghuloo ve vea er ishima i Aôndo ye. U tesen ikyav yô, Paulu kaa ér un ‘gbidye iyol na’ sha injakwagh sha er una ungwan imo i Aôndo yô. (1 Kor. 9:26, 27) Nahan aluer gba u se kighir ayol a ase u eren tom u pasen kwagh la je kpa, se fatyô u lun a vangertiôr ser Yehova una ver se doo doo. Sha ci u nyi? Sha ci u se kighir ayol a ase ser se er ishima i Aôndo sha ityôkyaa i injaa, ka mdoo u Yehova a doo se ishima la je la. Se eren nahan yô, se lu tesen ser kwagh u Satan a kaa ér aluer un kar mbacivir Aôndo yô, vea kera civir un ga la ka mimi ga.—Yobu 2:4.

“M ngu a ian ga.” Aluer u ngu eren tom u pasen kwagh la ga sha ci u ú nenge wer u ngu a ian ga yô, gba kpee u ú hide u hen sha akaa a hembe gban we kwagh la. Yesu kaa ér: “vande keren nen tartor Na.” (Mat. 6:33) Gba u ú eren akaa ken uma wou akuma akuma shin u pande shighe u ka u vihi sha iemberyolough la u na sha tom u pasen kwagh la. Ka mimi, iemberyolough man mbamgbe mbagenev mba a inja, kpa akaa ne ka atôakyaa a injaa je u aa gema a yange u tom u pasen kwagh la ga. Ortom u Aôndo ka nan hemba lun a gbashima sha kwagh u Tartor ken uma u nan.

“M fa kuma ga.” Alaghga u nenge wer u kuma u lun orpasen loho u dedoo ga. Mbatomov mba Yehova mbajighjigh mbagenev mba  sha ashighe a tsuaa la yange ve nenge ér ve kuma u eren ityom i Yehova wa ve la ga. Nenge ase ikyav hen Mose. Zum u Yehova pase un kwagh u a er yô, a kaa ér: “Tere, mo m ngu or u fan kwaghôron ga, ngise kpaa ga, shin hegen er U er kwagh a wanakiriki Wou ne kpaa ze; gadia kwaghôron eren mo ican, nombor kpa yuhwam.” Shin er Yehova taver un ishima nahan kpa, Mose gema kaa a na ér: “Ku, Tere, ma U shi tindi orgene.” (Eks. 4:10-13) Tsô Yehova er nena?

Yehova yange dugh Mose ave sha tom u a wa un ér a er la kera ga. Nahan kpa, a gema a tsua Aron ér a wase un tom shon. (Eks. 4:14-17) Heela tseegh ga, ken anyom a Mose er tom la cii Yehova sue un, lu nan un nyityôkwagh i̱ gba u una lu a mi ve una kôrcio u eren ityom i Aôndo na un la cii. Nyian ne, we kpa u fatyô u lun a vangertiôr wer Yehova una mgbegha mbananjighjigh a we imôngo mba ve vie ken jijingi yô, sha u ve wase u u̱ eren tom wou u pasen kwagh la. Kwagh u hemban cii yô, Mkaanem ma Aôndo pase se ér Yehova una na se kuma u eren tom u a kaa ér se er la kpee.—2 Kor. 3:5; nenge ngeren u kiriki u a lu a itinekwagh ér  “Anyom a M Hembe Zuan a Msaanyol ken Uma Wam Yô” la.

“Or er kwagh u a vihim kpishi yô.” Ior mbagenev ka ve de u eren tom u pasen kwagh la shin ve de u zan mbamkombo mba tiônnongo sha ci u or er kwagh u vihi ve kpishi yum; ve henen ér Yehova una lumun a ityôkyaa i i ne ve ve de tom ve u Mbakristu la kpee je. Shighe u or er kwagh u vihin se yô, kwagh la ka a vihi se, kpa jighilii yô, kpa ngula ka ityôkyaa i injaa i ia yange se u eren  ityom i Mbakristu laa? Alaghga yange ishima vihi Paulu vea anmgbian na u ken Kristu, Barnaba ker zum u ‘anyiman gba her atô ve tsung’ la. (Aer. 15:38, 39) Kpa mô ve nan de u eren tom u pasen kwagh la sha ci u ishima vihi nan yumuu? Mayange ga cii!

We kpa, aluer ishima vihi u sha ci u anmgbian wou u ken Kristu er kwagh u vihin we yô, umbur wer orihyom wou ka anmgbian wou u ken Kristu u a yen la ga, kpa ka Satan, u a keren ér una ya u la. Aluer u ‘tile dông sha jighjigh u nan’ yô, Diabolo una fa u ityô ga. (1 Pet. 5:8, 9; Gal. 5:15) Aluer u ngu a imba jighjigh u nan la yô, mayange je u “va ahenge” ga.—Rom. 9:33.

Shighe u Tahav Mbu Yen Se Yô

Ken akav a se tese kpuaa sha kwagh u atôakyaa ne, ikyav tese ér kwaghmôm u Ruamabera a tese ér ka ityôkyaa i injaa, i or a tile sha mi ve nana de eren akaa a Yehova a kaa ér nana er la, kua tom u i ne se ér se pase loho u dedoo la je kpa ngu ga. Nahan kpa, alaghga se lu a atôakyaa a mimi a a ne ve se eren tom wase u pasen kwagh la kpishi ga yô. Ityom igen i i eren ken tiônnongo ia fatyô u panden shighe u se ver ser se eren tom u pasen kwagh la. Shi ashighe agen yô, alaghga a tume se iyol gayô a vihi se iyol je a gande u eren Yehova tom er i sar se u eren la. Nahan kpa, Mkaanem ma Aôndo taver se ishima ér Yehova fa er i gbe se ishima yô shi umbur mbamyen asev kpaa.—Ps. 103:14; 2 Kor. 8:12.

Sha nahan yô, gba u se wa ikyo sha er se ôr ayol a ase shin mbagenev ijir ngeegh sha akaa ne ga yô. Apostoli Paulu nger ér: “We, u ngu nyi man u ne wanye u orgen ibo? Shin una tile, shin una gba kpaa ka kwagh u ter na je.” (Rom. 14:4) Se kera tôô mlu wase se kar sha u mbagenev ga, kpa se umbur ser “hanmô wase nana va ôr [Aôndo] kwagh u nan iyol i nan je.” (Rom. 14:12; Gal. 6:4, 5) Shighe u se lu eren msen hen Yehova shi pasen un atôakyaa a ase yô, doo u hanmô wase nana er kwagh ne a “imo i dedoo ken ishima.”—Heb. 13:18.

Er i Hii Ve Se Zough a Iember sha u Civir Yehova Yô

Se cii se fatyô u civir Yehova a iember sha ci u atindiakaa a na nga vough shi se fatyô u kuran a. Se fatyô u ôron kwagh nahan sha ci u nyi?

Mkaanem ma Aôndo kaa ér: “De nyum u eren kwagh u dedoo a mba ve kom un la ga, zum u u lu a tahav mbu eren un yô.” (Anz. 3:27) Kanyi u nenge a mi ken injakwagh i sha kwagh u atindiakaa a Aôndo nee? Yehova kaa ér we u ker u lun a tahav er mbu anmgbian wou nan lu a mi la nahan vough ga, kpa ér we u civir un sha u eren kwagh u ‘u u lu a tahav mbu eren yô.’ Sea yina agee nan nan, shin sea lu a tahav er ma nyi kpa, hanmô wase nana fatyô u eren Yehova tom a ishima i nan cii.—Luka 10:27; Kol. 3:23.

[Ngeren u kiriki/Foto u sha peeji 14 la]

 “Anyom a M Hembe Zuan a Msaanyol ken Uma Wam Yô”

Aluer tahav yina se iyol shin ishima yina se kpishi je kpa, doo u se kure ikyaa fese ser mbamtaver mban vea yange se u eren tom u pasen kwagh la sha gbashima ga. U tesen ikyav yô, nenge ase kwagh u yange er anmgbian ugen, u i yer un ér Ernest, a lu ken tar u Kanada yô.

Ernest yange eren ikyeen shi cian ashe kpishi. Zum u a vihi iyol ken ijime kehelee yô, gba u una de tom u kwaghmaan u yange eren la. Shin er a gba iwan nahan kpa, mlu na u lu ker ne na un ian i eren tom u pasen kwagh la kpishi. Er i taver anmgbianev ishima ken mbamkombo mba tiônnongo sha kwagh u tôôn ishuen pania yô, kwagh la na un lu a isharen i eren tom shon. Nahan kpa, yange nenge ér un kuma u eren tom u pasen kwagh imba la nahan ga.

Er a nenge ér tom u ishuen pania gande tahav nav ken inya yô, a pine ér i na un ian i tôôn ishuen pania uwer môm. Eren tom la kur doo doo yô, gema kpiligh un iyol kpishi. Nahan a hen a ishima na ér, ‘M fa mer me kera fatyô u eren u ga.’ Er soo u tesen ér una fatyô yô, a pine ér uwer u dondon la kpa i na un ian i eren ishuen pania. Ken uwer la kpa er tom la kure doo doo.

Ernest er tom u ishuen pania inyom jimin, kpa yange kaa ér, “M fa er mo nahan a tsa shawon me lu pania u keke ga yô.” Kwagh ne kpa soo u tesen ér una fatyô, nahan a pine ér i na un ian i lun pania u keke. Yange er tom u pania ken inyom i hiihii la been yô, kpiligh un iyol je gande. Nahan a za hemen u eren u shi a zua a iember i lun pania u keke anyom ahar, zan zan mzeyol u iyolvihin na la kar wuan un. Nahan kpa, cii man a kpe yô, hanma shighe a ôron a mbavannya nav a mliam ashe ér, “Anyom a m er Yehova tom sha ian i pania u keke la lu anyom a m hemba zuan a msaanyol ken uma wam yô.”

[Foto u sha peeji 13]

Se fatyô u hemban nyityô mtaver u una na se de tom u pasen kwagh cii yô

[Foto u sha peeji 15]

Ka sea eren Yehova tom a ishima yase cii sha u eren hanma kwagh u mbamlu asev ve ne se ian i eren yô, i doo un a vese kpishi