De Dondon Mnenge u Ikpelaior Ga

MNENGE u ior sha kwagh u a lu u vough shin u i lumun a mi man u a kom icivir shin á lu u kunya la kaha sha ajiir kposo kposo. Shi shighe ka una karen yô, mnenge ne a gema. Sha nahan yô, zum u se lu ôron akaa a ken Ruamabera a yange er sha ayange a tsuaa la yô, doo u se va a mhen wase sha kwagh u se lu ôron la ga, kpa se nôngon u fan mnenge u ior lu a mi kua akaa a yange gba ve ishima sha ayange la yô.

U tesen ikyav yô, nenge ase sha akaa ahar a i ter kwa kimbir kimbir ken Ruamabera u Mbakristu u ken Zwa Grika la, ka icivir man kunya je la. Cii ve se̱ kav avur a á er kwagh u icivir man kunya la tsembelee yô, doo u se fa mnenge u ior mba sha ayange la lu a mi sha kwagh u icivir man kunya yô.

Akaa a Yange Gba Ior Ishima sha Derianyom u Hiihii La

Orfantakerada ugen kaa ér: “Icivir man kunya lu akaa a vesen ken adini u Mbagrika man Mbaroma kua Mbayuda. Nomso keren icivir man itizan shi ve keren ér mbagenev ve lumun ve, je yô, ve kpe sha ci u akaa ne.” Er akaa ne hange ve yum yô, ve ngôôr lumun a mhen u mbagenev ga.

Akuraior ne fa kwagh u ian i or lu sha mi la, er u lun kpan shin ikyumenor nahan tsenger tsenger, nahan kwagh u or lun sha ian i injaa man u lun tagher tagher shin lun a icivir la lu ve kwagh u hemban cii. Or luun a icivir sha mnenge u nan tsô ga, kpa i gba u mbagenev kpa vea lumun a nan ve nana lu a icivir ye. Yange a naan or civir yô, i tese ken igbar ér nan eren kwagh er i ver ishima ér nana eren la. Yange a na or icivir yô, i tese ér nan ngu ornyar shin nan ngu sha iantom i injaa, gayô nan ngu tagher tagher, nahan gba u a na nan icivir i í kom sha a nan yô. Shi or yange nan fatyô u zuan a icivir sha ci u nan er kwagh sha inja, shin nan er kwagh u a hembe mbagenev ica je yô. Nahan kpa, yange or, a er kunya kwagh yô, i naha nan tar shi i hee nan ken igbar. Kwagh la luun di ibo i or yan ken ishima i nan tsô ga, kpa a tese ér ityô cii ôr nan ijir na nan ibo.

Shighe u Yesu ôr kwagh u or zan hen mtem za teman sha “ikyônough ki injaagh” shin “ikyônough ki ken ijime” hen iniongo la, lu ôron kwagh u icivir man ihyeen, sha inja i adini u sha ayange la. (Luka 14:8-10) A bunde kpa, acin ahar di tsô yô, mbahenen mba Yesu sendegh anyiman ér, “shin ka an nan lu orvesenou?” (Luka 9:46; 22:24) Ve lu tesen kwagh u hemba gban ior ishima hen ijiir ve la yô. Shi mbahemenev mbawan imanger mba ken kwaghaôndo u Mbayuda la lu nengen ér kwaghpasen u Yesu la ngu panden ve tahav man icivir. Shin er ve nôngo acin imôngo er vea nyiman kwagh a na ken igbar, vea tese ér ve hemba un nahan kpa, ve fa un ityô ga.—Luka 13:11-17.

Mbayuda man Mbagrika kua Mbaroma mba sha derianyom u hiihii la ve lu a mnenge ugen ér, “or u i ker nan i we nan ikyaa iyol ken igbar” yô, nan ya kunya. Yange a kôr or a wuhe yô, i nenge ér ka kwagh u ihyeenegh. Yange a ôr nan ijir, nana lu a ibo ga je kpa, nan hee sha ishigh ki azende a nan man tsombor u nan kua ityô i nan jimin cii. Ihyeen i nan ye la, yange i vihi nan iti, nan kera lu a icivir ga, shi mlu u nan vea mbagenev kpa a  kera doo ga. Kunya u u hemba vihin a u kôron or za wuhen yô, lu ihyeen i eren or akondo shin gbidyen nan la. Kwagh ne yange a na ior ve laha nan, nahan nan kera lu a icivir cuku ga.

Yange a sende or sha kon yô, i na nan kunya u hemban vihin sha won cii. Orfantakerada ugen u i yer un ér Martin Hengel la kaa ér, u wuan or nahan la lu “mtsaha u ikpan. Sha nahan yô, mtsaha ne tese ihyeen man kunya u hemban cii man mtsaha u hemban cii.” Kwagh ne yange a na yô, ior ve gba kighir anmgbianev mba or la man azende a nan ér ve nyiman nan. Er i wua Yesu sha imba gbenda la yô, mba yange vea soo u lun Mbakristu sha derianyom u hiihii la cii, i gba u a nahan ve tar ken igbar. A shi nan kpa, ior kpishi nengen ér u nyôron nongo a or u i sende nan sha kon la lu ibumegh ki kwagh. Apostoli Paulu nger ér: “Se mba pasen kwagh u Kristu u i mande Un sha [kon u mtsaha] la; Mbayuda yô, ka kwagh u nan ve gbev mbu nôngon je, man atôatyev yô, gema ka ve ibumekwagh je.” (1 Kor. 1:23) Mbakristu mba tsuaa mbara hemba mtaver ne nena?

Mnenge Ve Lu Kposo

Mbakristu mba sha derianyom u hiihii mbara kuran tindi, nahan ve palegh u yan kunya sha ci u kwaghbo u eren la. Apostoli Peteru nger ér: “Mô wen nana̱ de yaan ican er ka orwuanor shin ormbaiv, shin or u eren ifer shin or u amber sha akaa nahan ga.” (1 Pet. 4:15) Nahan kpa, Yesu tsengaôron ér a tôv mbadondon un a ican sha ci u iti na. (Yoh. 15:20) Peteru nger ér: “Aluer [or] nana ya ican er Orkristu yô, kunya u̱ de ker nan ga, kpa nana̱ civir Aôndo.” (1 Pet. 4:16) Kunya yange ua kôr or shighe u nan lu yan ican sha ci u nan ngu ordondon Kristu yum ga yô, i  tese ér nan venda aeren a ior mba sha ayange la.

Mbakristu lumun ér vea eren kwagh sha mnenge u ior ga. Ior mba sha derianyom u hiihii la nengen ér, u kaan ér or u i sende nan sha kon nan ngu Mesiya la ka ibumekwagh je. Mnenge la yange una nôngo u kighir Mbakristu sha u ve̱ lumun a gbenda u ior henen kwagh la. Nahan kpa, er ve na jighjigh ér Yesu ngu Mesiya yô, gba u vea za hemen u dondon un, a̱ naha ve a naha tar je kpaa. Yesu kaa ér: “Hanmô u nana cia ashe sha ci Wam man akaaôron a Am hen kov u eren idya man u asorabo ne yô, Wan u or kpaa Una cia ashe sha ci u nan zum u Una va sha icivir i Ter Na a uicighanmbatyomov la.”—Mar. 8:38.

Alaghga nyian kpa, á lu kighir se sha u se̱ undu Kwaghaôndo u Mbakristu. Adooga a lu mba se ze makeranta imôngo shin mbawanndor a vese shin mba se eren tom imôngo la vea lu kighir se ér se er idya, gayô se er anyighe shin ma kwagh ugen u lun a mshi sha mi ye. Ambaaior ne aa nôngo ér kunya u kôr se sha ci u se mba eren kwagh sha inja yum. Nahan doo u se er nena?

Dondo Mba Ve Wa Kunya Ikyo Ga La

Yesu yange lumun u kpen ku u hemban lun u ihyeenegh cii sha er una tese jighjigh na hen Yehova yô. “A taver ishima a [kon u mtsaha], A kera wa kunya ikyo ga.” (Heb. 12:2) Mbaihyomov mba Yesu ta un sambe shi ve ta un azer shi ve er un akondo shi ve gbidye un shi ve mande un shi ve naha un tar. (Mar. 14:65; 15:29-32) Nahan kpa, Yesu wa kunya u ve nôngo ér vea na un la ikyo ga. A er kwagh ne nena? A ker gbenda u palegh ihyeen la ga. Yesu fa er sha ishigh ki Yehova yô, un hee ga yô, nahan mayange a ker icivir hen ior ga. Shin er Yesu kpe ku u kpan nahan kpa, Yehova na un icivir sha u nderen un shi veren un sha ian i icivirigh i hemban cii, ikyua a na. Mbafilipi 2:8-11 kaa ér: “[Kristu Yesu] hide a iyol Na ijime, hingir u ungwan kwagh zan zan ar ken ku, man lu ku u [kon u mtsaha] je. Ka sha ci u nahan man Aôndo A kende Un sha kpishi je ye, A ii Un iti i i hembe hanma iti igen cii, sha er hanma inyu cii i mba ve lu Sha man mba ve lu shin tar man mba ve lu shin atô u taregh kpaa, ia gure inya ken iti i Yesu yô, man hanma nombor kpaa ua pase er Yesu Kristu ka Ter je sha ci u iengem i Aôndo Ter.”

Yesu yange nenge ihyeen i ku na ua va a mi la ér ka beerkwagh ga. Ilyahan i ia va sha Ter na sha ci u gba u a wua un ér, un tuhwa Aôndo la gba Wan u Aôndo kwagh kpen kpen. Yesu sôn Yehova ér a kar un a ihyeen la kera. A er msen ér: “Tôôm iyongo ne kera.” Kpa Yesu er ishima i Aôndo. (Mar. 14:36) Nahan cii kpa, Yesu wa ishima a mtaver u nyôr ker la, a kera wa kunya ikyo ga. Bee kera yô, lu mba ve lumun a mnenge u ior lu a mi sha ayange na la tseegh, ku na la lu ve kwagh u kunya ye. Man Yesu lumun a mnenge la ga je lu lian ga.

Mbahenen mba Yesu kpa i kôr ve shi i gbidye ve. Ieren la hee ve sha ishigh ki ior kpishi. Yange i lahan ve shi i nengen ve ér ve gba kwagh ga. Kpa kwagh la na ve iyolkpen ga. Mbahenen mba mimi yange ve venda u dondon mnenge u ikpelaior, nahan ve wa kunya ikyo ga. (Mat. 10:17; Aer. 5:40; 2 Kor. 11:23-25) Ve fa er gba u vea ‘tôô [kon u mtsaha] ve ayange ayange, vea dondo sha Yesu’ yô. (Luka 9:23, 26)

Hide se nyian di ye? Akaa a tar u nengen ér ka a ibume man a ageegh ga man a icivirigh ga la, Aôndo gem nengen a ér ka akaa a sha kwaghfan man a ageegh man a icivirigh kpaa. (1 Kor. 1:25-28) Aluer se mba dondon mnenge u ikpelaior nahan, a tese ér se tumbur shi mhen wase yina kpishi ga he?

Ior mba ve keren icivir yô, kwagh u tar u henen sha a ve la una gba ve kwagh kpe kpe. Nahan kpa, se soo ser Yehova a lu Ijende yase, er lu ijende i Yesu man mbadondon un mba sha derianyom u hiihii la nahan. Sha nahan yô, se na kwagh u Yehova a nengen ér ka u civirigh la icivir, shi kwagh u a nengen ér ka kwagh u kunya yô, se kpa se nenge un ser ka kwagh u kunya.

[Foto u sha peeji 4]

Yesu yange lumun a mnenge u tar lu a mi sha kwagh u kunya la ga